ປາຖະກະຖາ ກ່ຽວກັບວຽກງານຕ້ານການສໍ້ລາດບັງຫຼວງ, ການຄຸ້ມຄອງພັກ ແລະ ພະນັກງານ ຂອງ ສປ ຈີນ

ໃນວັນທີ 27 ກັນຍາ 2022 ຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຈັດກອງປະຊຸມປາຖະກະຖາກ່ຽວກັບວຽກງານຕ້ານການສໍ້ລາດບັງຫຼວງ, ການຄຸ້ມຄອງພັກ ແລະ ພະນັກງານ ຂອງ ສປ ຈີນ ຮູບແບບວິດີໂອທາງໄກ ຢູ່ຫ້ອງປະຊຸມຫ້ອງວ່າການສູນກາງພັກ ໂດຍການເປັນປະທານກອງປະຊຸມຮ່ວມຂອງ ສະຫາຍ ວັນຄຳ ໄຊວົງສັກ ຄະນະພັກ ຫົວໜ້າກົມຄົ້ນຄວ້າ ແລະ ວາລະສານກວດກາ ຂອງຄະນະກວດກາສູນກາງພັກ ແລະ ສະຫາຍ ຈ້າວຊຶທົງ ຫົວໜ້າກົມອາຊີ 2 ຄະນະພົວພັນຕ່າງປະເທດສູນກາງພັກກອມມູນິດຈີນ, ມີຜູ້ຕາງໜ້າຈາກກົມກວດກາບັນດາກະຊວງ-ອົງການ ແລະ ພະນັກງານ-ລັດຖະກອນ ຂອງຄະນະກວດກາສູນກາງພັກເຂົ້າຮ່ວມ.

ຊຶ່ງຈຸດປະສົງຂອງກອງປະຊຸມຄັ້ງນີ້ ເພື່ອເປັນການປະກອບສ່ວນອັນສໍາຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ, ເວົ້າສະເພາະ ເພື່ອສືບຕໍ່ສາຍພົວພັນຂອງສອງອົງການກວດກາລາວ-ຈີນ ທັງເບື້ອງພັກ ແລະ ເບື້ອງລັດ ຕາມບົດບັນທຶກການຮ່ວມມື ແລະ ຕາມແຜນການ, ໂຄງການ, ກິດຈະກໍາ ທີ່ໄດ້ກໍານົດຮ່ວມກັນ ໃຫ້ໄດ້ຮັບການຈັດຕັ້ງປະຕິບັດຕົວຈິງ ແລະ ສືບຕໍ່ກ້າວໄປສູ່ລວງເລິກ, ໜັກແໜ້ນ ແລະ ມີປະສິດທິຜົນຍິ່ງໆຂຶ້ນ, ການຈັດກອງປະຊຸມປາກະຖາ, ແລກປ່ຽນບົດຮຽນ ແລະ ພຶດຕິກໍາຄັ້ງນີ້ ເພື່ອໃຫ້ພະນັກງານທີ່ເຮັດວຽກງານໃນຂົງເຂດກວດກາ ຂອງ ສປປ ລາວ ໄດ້ຮຽນຮູ້, ເຂົ້າໃຈ ທັງເປັນການຍົກລະດັບຄວາມສາມາດເຂົ້າໃນວຽກງານຂອງຕົນໃຫ້ສູງຂຶ້ນ ທັງໃນດ້ານທິດສະດີ ແລະ ພຶດຕິກໍາ ທີ່ໄດ້ຈາກການຮັບຟັງ ແລະ ແລກປ່ຽນບົດຮຽນ ການຈັດກອງປະຊຸມຄັ້ງນີ້ຊຶ່ງມີຫົວຂໍ້ຄື: (1) ຜົນງານ ແລະ ບົດຮຽນທາງດ້ານວຽກງານການຕ້ານການສໍ້ລາດບັງຫຼວງຂອງພັກກອມມູນິດຈີນ ພາຍຫຼັງກອງປະຊຸມໃຫຍ່ຄັ້ງທີ 18 (2) ບົດຮຽນ ແລະ ພຶດຕິກຳໃນການເພີ່ມທະວີວຽກງານການຄຸ້ມຄອງພັກຢ່າງເຂັ້ມງວດຮອບດ້ານ ຂອງ ພັກກອມມູນິດຈີນ ແລະ (3) ບົດຮຽນ ແລະ ພຶດຕິກຳໃນການເພີ່ມທະວີຄວາມເຂັ້ມແຂງຕໍ່ການຄຸ້ມຄອງພະນັກງານ ແລະ ການຕິດຕາມການນຳໃຊ້ສິດອຳນາດ ຂອງ ພັກກອມມູນິດຈີນ ຈາກບັນດາສະຫາຍຊ່ຽວຊານຈາກ ສປ ຈີນ, ຫຼັງຈາກຮັບຟັງການນໍາສະເໜີແຕ່ລະຫົວຂໍ້ແລ້ວຜູ້ເຂົ້າຮ່ວມກອງປະຊຸມກໍໄດ້ມີບາງຄຳຖາມເຈາະຈີ້ມ ເພື່ອແລກປ່ຽນ ເປັນຕົ້ນແມ່ນກ່ຽວການຈັດຕັ້ງປະຕິບັດຕົວຈິງກ່ຽວກັບຂໍ້ກຳນົດ 8 ຂໍ້; ຂໍ້ກຳນົດວ່າດ້ວຍການລາດຕະເວນ ຂອງ ສປ ຈີນ (ໂດຍສະເພາະແມ່ນບົດຮຽນກ່ຽວກັບການຄົ້ນຄວ້າຊອກພະນັກງານກວດກາໄປປະຈຳຢູ່ພາກສ່ວນຕ່າງໆ) ແລະ ບາງບົດຮຽນກ່ຽວກັບຕາມຕິດຕາມ, ກວດກາພັກ-ລັດ ແລະ ການດໍາເນີນຄະດີການສໍ້ລາດບັງຫຼວງຈໍານວນໜຶ່ງ.

ຕອນທ້າຍຂອງກອງປະຊຸມ ສະຫາຍ ວັນຄຳ ໄຊວົງສັກ ກໍໄດ້ມີບາງຄຳເຫັນຕໍ່ກອງປະຊຸມ ແລະ ສະແດງຄວາມຂອບໃຈຕໍ່ຝ່າຍຈີນ.

ຂ່າວ-ພາບ: ຕູ່ນາ ເລົ່າຖາວອນ

 

แชร์