ຮອງປະທານປະເທດ ໂອ້ລົມຄະນະພັກ - ອົງການປົກຄອງ ແລະພະນັກງານການນໍາຫຼັກແຫຼ່ງແຂວງຈຳປາສັກ

ໃນວັນທີ 23 ກັນຍາ 2022 ທີ່ສະໂມສອນ ຫຼັກ 4 ແຂວງຈຳປາສັກ ທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ຮອງປະທານປະເທດ ແຫ່ງ ສປປ ລາວ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະໂອ້ລົມຄະນະພັກ - ອົງການປົກຄອງ, ພະນັກງານການນໍາຫຼັກແຫຼ່ງແຂວງຈຳປາສັກ, ໂດຍມີທ່ານ ວິໄລວົງ ບຸດດາຄຳ ກຳມະການສູນກາງພັກ, ເລຂາພັກແຂວງ, ເຈົ້າແຂວງຈຳປາສັກ ພ້ອມດ້ວຍຄະນະພັກ - ອົງການປົກຄອງແຂວງ,ພະນັກງານການນໍາຫຼັກແຫຼ່ງຂັ້ນແຂວງ, ເຈົ້ານະຄອນ, ເຈົ້າເມືອງ, ການນໍາພະແນກການກົມກອງອ້ອມຂ້າງແຂວງເຂົ້າຮ່ວມ.

ໂອກາດນີ້ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ລາຍງານການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ,ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບ 2 ວາລະແຫ່ງຊາດ,ການຄວບຄຸມປ້ອງກັນພະຍາດໂຄວິດ -19 ,ການແກ້ໄຂບັນຫາເງິນເຟີ້,ການຜະລິດສິນຄ້າສົ່ງອອກ, ການຄຸ້ມຄອງຮ້ານແລກປ່ຽນ ແລະອັດຕາແລກປ່ຽນ, ການຄຸ້ມຄອງລາຍຈ່າຍ,ການລົງທຶນກໍ່ສ້າງພື້ນຖານໂຄງລ່າງ ເພື່ອແກ້ໄຂຄວາມທຸກຍາກຂອງປະຊາຊົນ,ສະພາບການເກັບລາຍຮັບເຂົ້າງົບປະມານ ແລະອື່ນໆ. ຊຶ່ງຍ້ອນການນຳພາຂອງອົງຄະນະພັກແຂວງ ບວກກັບຄວາມສາມັກຄີເປັນເຈົ້າການຂອງປະຊາຊົນເຂົ້າໃນພາລະກິດປົກປັກຮັກສາ ແລະສ້າງສາພັດທະນາແຂວງກໍຄືປະເທດຊາດເຮັດໃຫ້ທົ່ວແຂວງມີຄວາມສະຫງົບສຸກໂດຍພື້ນຖານ,ການເມືອງມີຄວາມສະຖຽນລະພາບ,ເສດຖະກິດຊີວິດການເປັນຢູ່ຂອງປະຊາຊົນນັບມື້ດີຂື້ນ ຊຶ່ງໃນແຜນ ປີ 2022 ນີ້ ແຂວງຈຳປາສັກໄດ້ວາງຄາດໝາຍຕົວເລກເສດຖະກິດມະຫາພາກ ຄື: ສ້າງມູນຄ່າ ລວມຍອດຜະລິດຕະພັນພາຍໃນໃຫ້ບັນລຸ 23.670 ຕື້ກວ່າກີບ, ອັດຕາການຂະຫຍາຍຕົວເສດ ຖະກິດສະເລ່ຍ ໃຫ້ເພີ້ມຂຶ້ນ 4,51 %, ລາຍຮັບສະເລ່ຍຕໍ່ພົນລະເມືອງໃຫ້ບັນລຸ 3.134 ໂດລາ, ຜ່ານການຈັດຕັ້ງປະຕິບັດຕົວຈິງ ໃນ 6 ເດືອນ ຕົ້ນປີ 2022 ເສດຖະກິດຂອງແຂວງ ໄດ້ ຮັບການພັດທະນາຂະຫຍາຍຕົວດີຂຶ້ນ ລວມຍອດຜະລິດຕະພັນພາຍໃນ ປະຕິບັດໄດ້ 12.839 ກວ່າຕື້ກີບ, ທຽບໃສ່ແຜນປີປະຕິບັດໄດ້ 54%, ສະເລັ່ຍຕໍ່ຄົນໄດ້ 1.342 ໂດລາ ຫຼື ເທົ່າກັບ 16,68 ລ້ານກີບຕໍ່ຄົນ, ໂຄງປະກອບເສດຖະກິດ: ຂະແໜງກະສິກຳ-ປ່າໄມ້ ກວມ 30,33 %, ຂະແໜງອຸດສາຫະກຳກວມ 28.69 % ແລະ ຂະແໜງບໍລິການ ກວມ 40,98 % ຂອງ GDP.

ໂອກາດນີ້, ທ່ານ ນາງ ປານີ ຢາທໍ່ຕູ້ ຮອງປະທານປະເທດ ໄດ້ໃຫ້ກຽດໂອ້ລົມຊຶ່ງກ່ອນອື່ນໄດ້ຕາງໜ້າໃຫ້ກົມການເມືອງສູນກາງພັກກໍຄືລັດຖະບານຕີລາຄາສູງ ແລະ ຍ້ອງຍໍຊົມເຊີຍຜົນງານທີ່ຄະນະພັກ - ອົງການປົກຄອງແຂວງ ແລະປະຊາຊົນບັນດາເຜົ່າຊາວແຂວງຈຳປາສັກຍາດມາໄດ້.ຈາກນີ້ກໍໄດ້ຊີ້ນຳໂດຍເນັ້ນໃຫ້ ແຂວງຈຳປາສັກສືບຕໍ່ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ໃຫ້ພະນັກງານ, ສະມາຊິກພັກ ເຊື່ອມຊຶມ, ກໍາແໜ້ນມະຕິກອງປະຊຸມໃຫຍ່ຄັ້ງທີ XI ຂອງພັກ ໂດຍໃຫ້ຖືເອົາມະຕິ XI ຂອງພັກ, ກົດລະບຽບພັກ ສະໄໝທີ XI ປຽບເໜືອນອາວຸດອັນແຫຼມຄົມ; ຍູ້ແຮງການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາເສດຖະກິດ-ການເງິນ ແລະແກ້ໄຂບັນຫາຢາເສບຕິດໃຫ້ເຂົ້າສູ່ລວງເລິກ ແລະເປັນຮູບປະທໍາ; - ຄຸ້ມຄອງການຈັດເກັບລາຍຮັບ, ແກ້ໄຂການຮົ່ວໄຫຼຂອງງົບປະມານເພື່ອເພີ່ມລາຍຮັບງົບປະມານໃຫ້ສູງຂຶ້ນຕາມທິດຫັນເປັນທັນສະໄຫມ.

ເອົາໃຈໃສ່ຂຸດຄົ້ນທ່າແຮງບົ່ມຊ້ອນຕ່າງໆພາຍໃນແຂວງ (ດ້ານທີ່ຕັ້ງ, ຄວາມອຸດົມສົມບູນດ້ານຊັບພະຍາກອນທໍາມະຊາດ, ມູນເຊື້ອດຸໝັ່ນ ຂອງປະຊາຊົນ, ສ້າງເງື່ອນໄຂອຳນວຍ ໃຫ້ແກ່ການດຶງດູດການລົງທຶນພາຍໃນ ແລະຕ່າງປະເທດ, ພ້ອມທັງມີການຄຸ້ມຄອງທີ່ດີ ແລະ ເອົາໃຈໃສ່ຕໍ່ປະສິດ ທິພາບ-ປະສິດທິຜົນ ຂອງການລົງທຶນ;

ຈາກນີ້ກໍໄດ້ຮຽກຮ້ອງໃຫ້ອໍານາດການປົກຄອງທຸກຂັ້ນສືບຕໍ່ເຝົ້າລະວັງ, ຄວບຄຸມ, ປ້ອງກັນການແຜ່ລະບາດຂອງພະຍາດໂຄວິດ-19 ໂດຍສະເພາະການສັກວັກຊີນໃຫ້ບັນລຸກຸ່ມເປົ້າໝາຍ;ເອົາໃຈໃສ່ຄຸ້ມຄອງລາຄາສິນຄ້າທີ່ຕິດພັນກັບຊີວິດການເປັນຢູ່ຂອງປະຊາຊົນ; ເຊັ່ນ: ອັດຕາແລກປ່ຽນເງິນຕາ, ການຈັດເກັບລາຍຮັບ-ຄຸ້ມຄອງລາຍຈ່າຍໃຫ້ໄດ້ຕາມຄາດໝາຍທີ່ວາງໄວ້ ແລະບັນຫາສຳຄັນອື່ນໆອີກ.
ພາບ-ຂ່າວ: ເກດສະໜາ ແກ້ວສຸວັນນະແສງ

แชร์