ມອບວຽກ 3 ສ້າງໃຫ້ ຍທຂ 18 ແຂວງ

    ວັນທີ 29 ມີນາ 2019, ໃນກອງປະຊຸມວຽກງານໂຍທາທິການ ແລະ ຂົນສົ່ງປະຈຳປີ 2018, ກະຊວງໂຍທາທິການແລະຂົນສົ່ງ (ຍທຂ) ໄດ້ຈັດພິທີເຊັນ ສັນຍາມອບວຽກ 3 ສ້າງລະຫວ່າງກົມຂົວທາງ, ກົມເຄຫາ ແລະ ຜັງເມືອງ, ກົມຂົນສົ່ງ, ກົມການບິນພົນລະເຮືອນ, ກົມນ້ຳປະປາ ແລະ ກົມທາງນ້ຳກະຊວງ ຍທຂ ກັບບັນດາທ່ານຫົວໜ້າພະແນກ ຍທຂ ປະຈຳ 18 ແຂວງ, ໂດຍຕິດພັນກັບຂໍ້ແຂ່ງຂັນຮັກຊາດແລະພັດທະນາ, ຊຶ່ງເຂົ້າຮ່ວມ ແລະເປັນສັກຂີພິຍານຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ພ້ອມດ້ວຍບັນດາພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ລັນ ແສງອາພອນ ຫົວໜ້າກົມຈັດຕັ້ງແລະພະນັກງານກ່າວວ່າ: ສຳລັບເນື້ອໃນຂໍ້ແຂ່ງຂັນຄັ້ງນີ້ປະກອບມີວຽກດ້ານການເມືອງ-ແນວຄິດ 4 ຂໍ້, ດ້ານ ວິຊາສະເພາະມີ 5 ຂໍ້, ດ້ານພັດທະນາກົງຈັກການຈັດຕັ້ັງ ແລະບຸກຄະລາກອນ 2 ຂໍ້, ດ້ານການປ້ອງກັນຊາດ-ປ້ອງກັນຄວາມສະຫງົບ 3 ຂໍ້, ຊຶ່ງໃນນັ້ນຄະນະ ພັກ, ຄະນະນໍາຫ້ອງການ, ກົມ, ສະຖາບັນ, ກອງວິຊາການ, ລັດວິສາຫະກິດທີ່ຂຶ້ນກັບກະຊວງຍທຂ, ພະແນກ ຍທຂ ແຂວງ-ນະຄອນຫຼວງ ແລະ ຫ້ອງການ ຍທຂ ປະຈໍາເມືອງເປັນເຈົ້າການຄົ້ນຄວ້າເຊື່ອມຊຶມຂໍ້ແຂ່ງຂັນ ແລ້ວນໍາໄປຜັນຂະຫຍາຍ, ນໍາພາຈັດຕັ້ງປະຕິບັດຢູ່ໃນກົມກອງຂອງ ຕົນໃຫ້ປະກົດຜົນເປັນຈິງ, ໂດຍມີການແບ່ງ ຄວາມຮັບຜິດຊອບພາຍໃນການຈັດຕັ້ງ ແລະບຸກຄົນຢ່າງຈະແຈ້ງ; ໃຫ້ແຕ່ລະກົມ ກອງ, ລັດວິສາຫະກິດທີ່ຂື້ນກັບກະຊວງ ຍທຂ, ພະແນກ ຍທຂ ແຂວງ-ນະຄອນຫຼວງ ແລະຫ້ອງການ ຍທຂ ປະຈໍາເມືອງ ເປີດຂະບວນການແຂ່ງຂັນ “ຮັກຊາດ ແລະພັດທະນາ” ແລະຜັນຂະຫຍາຍວຽກງານ 3 ສ້າງຢ່າງແຂງແຮງຢູ່ພາຍໃນກົມກອງຂອງຕົນໃຫ້ເປັນຂະບວນຟົດຟື້ນ,ໂດຍຄະນະຮັບຜິດຊອບວຽກງານແຂ່ງຂັນແຕ່ລະຂັ້ນ,ໜ່ວຍງານຊ່ວຍວຽກຂອງຕົນມີການຕິດຕາມຊຸກຍູ້ປຸກລະດົມ,ສະຫຼຸບຕີລາຄາ, ຖອດຖອນບົດຮຽນແຕ່ລະໄລຍະ ແລະ ລາຍງານຂໍທິດຊີ້ນໍາຈາກຄະນະນໍາກະຊວງໃຫ້ເປັນປົກກະຕິທັນເວລາ, ພ້ອມ ກັນນັ້ນກໍໃຫ້ຖືເອົາ ຂະບວນການແຂ່ງຂັນ “ຮັກຊາດ ແລະ ພັດທະນາ” ຄັ້ງນີ້ເປັນການຍົກສູງຄວາມ ສາມາດນໍາພາ ແລະຄວາມເປັນແບບຢ່າງນໍາໜ້າໃຫ້ແກ່ຄະນະພັກ, ສະມາຊິກພັກ ແລະພະນັກງານລັດຖະກອນຜູ້ທີ່ມີຜົນງານດີເດັ່ນຕ້ອງໄດ້ຮັບການປະຕິບັດນະໂຍບາຍໃຫ້ຖືກຕ້ອງເໝາະສົມ, ຜູ້ທີ່ຍັງອ່ອນກໍ່ຕ້ອງໄດ້ຊ່ວຍເຫຼືອກໍ່ສ້າງໃຫ້ທັນເວລາ, ການເປີດຂະບວນການແຂ່ງຂັນ “ຮັກຊາດ ແລະພັດທະນາ” ແມ່ນໃຫ້ເລີ່ມແຕ່ເດືອນມີນາ 2019 ໄປຮອດເດືອນມີນາ 20 20 ແລ້ວໃຫ້ດໍາເນີນການຕີລາຄາປະເມີນຜົນ ແລະ ສະຫຼຸບຖອດຖອນບົດຮຽນ ແລະ ຍ້ອງຍໍການຈັດຕັ້ງປະຕິບັດໃນຮອບ 1 ປີ ແລ້ວຈຶ່ງເປີດຂະບວນການແຂ່ງຂັນໃໝ່ໃນປີຕໍ່ໄປ.

ຂ່າວ: ພິມພອນ     

แชร์