ນັກຮຽນໂອກິນະວະ ຊ່ວຍເຫຼືອກໍ່ສ້າງໂຮງຮຽນປະຖົມທີ່ອັດຕະປື

  ບັນດານັກຮຽນຈາກມັດທະຍົມ 3 ແຫ່ງ, ຮ່ວມກັບຜູ້ປະສານງານຂອງພວກເຂົາຈາກແຂວງໂອກິນະວະ,ປະເທດຍີ່ປຸ່ນໄດ້ເຂົ້າຢ້ຽມຄຳນັບທ່ານ ນາງ ແສງເດືອນ ຫຼ້າ ຈັນທະບູນລັດຖະມົນຕີກະຊວງສຶກສາທິການ ແລະກີລາໃນວັນທີ 27 ມີນາ 2019, ພວກເຂົາໄດ້ຈັດຕັ້ງກິດຈະກຳລະດົມທຶນຊ່ວຍເຫຼືອໃຫ້ປະ ຊາຊົນລາວນັບຕັ້ງແຕ່ເດືອນຕຸລາໃນປີທີ່ຜ່ານມາ ໂດຍເປັນການຮ່ວມ ມື “ການຮ່ວມມືໂອກິນະວະ”, ຊຶ່ງ ເປັນສະຫະກອນຂອງຜູ້ບໍລິໂພກທີ່ ໂອກິນະວະ ເພື່ອຕອບສະໜອງຕໍ່ຄວາມເສຍຫາຍຈາກໄພພິບັດນ້ຳຖ້ວມທີ່ເມືອງສະໜາມໄຊ ແຂວງ ອັດຕະປື, ຍັງເປັນບ່ອນທີ່ໄດ້ມີການຈັດຕັ້ງ “ໂຄງການເຫຼົ້າລາວ” ເພື່ອຍົກລະດັບຄຸນນະພາບເຫຼົ້າທ້ອງຖິ່ນ ໂດຍເປັນການຮ່ວມມືໂອກິນະວະພາຍໃຕ້ໂຄງການຮ່ວມມືຂອງອົງ ການໄຈກ້າ.

 ບັນດານັກຮຽນຈາກມັດທະຍົມ ດັ່ງກ່າວໄດ້ພ້ອມໃຈກັນສົນທະນາ ແລະທົບທວນເຖິງການຊ່ວຍເຫຼືອປະຊາຊົນໃນເມືອງສະໜາມໄຊ. “ພວກເຮົາສາມາດເຮັດຫຍັງໄດ້ ແນ່?” “ລະພວກເຮົາຈະຊ່ວຍຄົນລາວແນວໃດດີ?” ພວກເຂົາໄດ້ຂໍ້ສະຫຼຸບວ່າພວກເຂົາຈະຮ່ວມກັນສ້າງໂຮງຮຽນປະຖົມໃຫ້ແກ່ເດັກນ້ອຍທີ່ ໄດ້ຮັບຜົນກະທົບຈາກໄພພິບັດດັ່ງ ກ່າວ. ພວກເຂົາໄດ້ໄປປຶກສາກັບຜູ້ປະສານງານການຮ່ວມມືໂອກິນະ ວະ, ຊຶ່ງເພິ່ນກໍໄດ້ແນະນຳໃຫ້ໄປຂໍ ທິດຊີ້ນຳຈາກທ່ານຮອງເຈົ້າແຂວງ ແຂວງອັດຕະປຶ ແລະທ່ານເຈົ້າເມືອງ ເມືອງສະໜາມໄຊ. ການນຳຂອງ ແຂວງອັດຕະປືກໍໄດ້ອວຍພອນຊົມເຊີຍໃຫ້ແນວຄິດດັ່ງກ່າວ. ດັ່ງນັ້ນ, ໃນເດືອນຕຸລາ ປີ 2018, ບັນດານັກຮຽນມັດທະຍົມດັ່ງກ່າວກໍເລີ່ມຕົ້ນລະດົມທຶນຈາກຄົນໂອກິນະວະ. 6 ເດືອນຜ່ານໄປ, ພວກເຂົາກໍສາມາດເຮັດໄດ້ຕາມເປົ້າໝາຍ.

 ນັກຮຽນມັດທະຍົມກຸ່ມນີ້ໄດ້ລາຍງານຕໍ່ທ່ານ ນາງ ແສງເດືອນກ່ຽວກັບປະຫວັດຄວາມເປັນມາ ແລະແນວຄິດທີ່ຜ່ານການທົບທວນມາແລ້ວອັນນຳໄປສູ່ກິດຈະກຳລະດົມທຶນໃນຄັ້ງນີ້ ແລະພວກເຂົາກໍອວຍພອນໃຫ້ຄວາມສຳພັນລະຫວ່າງປະເທດຍີ່ປຸ່ນ ແລະປະເທດລາວຈະສືບຕໍ່ເຂັ້ມແຂງຍິ່ງໆຂຶ້ນຈາກຄວາມພາຍະຍາມຂອງພວກເຂົາ.

 ທ່ານ ນາງ ແສງເດືອນກໍໄດ້ສະແດງຂອບໃຈຕໍ່ບັນດານັກຮຽນຈາກມັດທະຍົມກຸ່ມນີ້ຕໍ່ຄວາມສຳເລັດຂອງເຂົາເຈົ້າເອງ ແລະຮັບປະ ກັນວ່າທາງກະຊວງຈະຊ່ວຍສົ່ງຕໍ່ຂໍ້ຄວາມຂອງນັກຮຽນຍີ່ປຸ່ນກຸ່ມນີ້ຫາປະຊາຊົນລາວໃຫ້ຫຼາຍເທົ່າທີ່ ຈະເປັນໄປໄດ້, ຂໍພວກເຂົາຈົ່ງສືບຕໍ່ແລກປ່ຽນນຳປະເທດລາວຕໍ່ໄປ ແລະເລິກເຊິ່ງຍິ່ງຂຶ້ນອີກໃນອະນາຄົດ.ຈາກນີ້ເປັນຕົ້ນໄປ, ການຮ່ວມມືໂອກິນະວະ ແລະບັນດາອົງການທີ່ກ່ຽວຂ້ອງລວມໄປເຖິງພະແນກສຶກສາທິການປະຈຳແຂວງອັດຕະປືຈະສືບຕໍ່ປະສານງານແຜນການກໍ່ສ້າງໂຮງຮຽນປະຖົມ.

ນສພ ເສດຖະກິດ-ສັງຄົມ

แชร์