ທ່ານ ເກຍ ອູສິດທິເດດ ໄດ້ຮັບຫຼຽນນາມມະຍົດວິລະຊົນແຮງງານແຫ່ງຊາດລາວ

ນັກທຸລະກິດຄົນທຳອິດຂອງ ສປປ ລາວ ທີ່ໄດ້ຮັບຫຼຽນນາມມະຍົດວິລະຊົນແຮງງານແຫ່ງຊາດລາວຊຶ່ງເປັນນາມມະຍົດສູງສຸດທັງເປັນຫຼຽນປະຫວັດສາດທີ່ພັກ-ລັດຖະບານແຫ່ງ ສປປ ລາວ ໄດ້ມອບໃຫ້ ທ່ານ ເກຍ ອູສິດທິເດດ ນັກພັດທະນາດີເດັ່ນແຫ່ງຊາດ, ເຈົ້າຂອງໂຮງງານນໍ້າດື່ມ ແລະນໍ້າກ້ອນໂລມາຄໍາ ແຂວງສະຫວັນນະເຂດ ທີ່ມີຜົນງານດີເດັ່ນໃນການມີສ່ວນຮ່ວມຊ່ວຍເຫຼືອປະຊາຊົນ 2 ໂຄງການຄື “ການແກ້ໄຂລຶບລ້າງຄວາມທຸກຍາກຂອງປະຊາຊົນບ້ານຄໍາປ່າແໜ ເມືອງຊົນນະບູລີ, ບ້ານປ່າກ້ວຍເມືອງຈຳພອນ; ບ້ານຕະຍົງ ແລະບ້ານປະແນະ ຈຸດສຸມຕັງອາໄລ-ລະແບງ ເມືອງນອງ ແຂວງສະຫວັນນະເຂດ” ຕະຫຼອດໄລຍະ 5 ປີຜ່ານມາ (2016-2021).

ທ່ານ ເກຍ ອູສິດທິເດດ ເປັນຄົນເຊື້ອສາຍຈີນ, ເກີດເມື່ອວັນທີ 5 ກໍລະກົດ 1957 ທີ່ບ້ານທ່າໂຂ່ງ, ເມືອງເຊໂປນ, ແຂວງສະຫວັນນະເຂດ ໄດ້ໃຫ້ສໍາພາດຕໍ່ສື່ມວນຊົນວ່າ: ເມື່ອອາຍຸໄດ້ 7 ປີ, ຄອບຄົວໄດ້ຍົກຍ້າຍໜີໄພສົງຄາມເຂົ້າລີ້ຢູ່ດົງຢູ່ປ່າ, ເຮັດໄຮ່ເຮັດສວນລ້ຽງຊີບເປັນເວລາ 10 ປີ, ໃນເວລານັ້ນຕົນກໍໄດ້ຮຽນໜັງສືຈົບພຽງ ປໍ.4, ຄອບຄົວຍາມໃດເພິ່ນກໍໄດ້ເອົາໃຈໃສ່ໃຫ້ຄວາມອົບອຸ່ນ,ບອກສອນລູກໆທຸກຄົນໃຫ້ມີຄວາມກະຕັນຍູ, ໃນເວລາເຂົ້າໂຮງຮຽນຫຼືເຂົ້າຮ່ວມກິດຈະກຳຕ່າງໆຂອງການຈັດຕັ້ງ, ນາຍຄູ ແລະ ການຈັດຕັ້ງກໍໄດ້ອົບຮົມບົ່ມສອນ ໃຫ້ມີຄວາມສາມັກຄີກັນ, ມີນໍ້າໃຈເສຍສະຫຼະ; ໃນໄລຍະນັ້ນການຈັດຕັ້ງຕ້ອງໃຫ້ໄດ້ສະແດງອອກເຖິງພຶດຕິກຳຕົວຈິງ, ແຕ່ລະມື້ໄດ້ເຮັດຫຍັງເພື່ອສ່ວນລວມ. ເມື່ອປະເທດຊາດໄດ້ຮັບການປົດປ່ອຍແລ້ວ, ປີ 1976 ຕົນຈຶ່ງໄດ້ຍົກຍ້າຍເຂົ້າມາຢູ່ສະຫວັນນະເຂດເປັນກຳມະກອນຮັບຈ້າງ 3 ປີ; ສໍາລັບສ່ວນຕົວໃນໄລຍະນັ້ນກໍມີຄວາມມຸ້ງຫວັງ ຢາກມີທຸລະກິດ ເຮັດການຜະລິດແບບຄອບຄົວເປັນຂອງຕົນ, ມາເຖິງປີ1978 ໄດ້ມີໝໍ້ຂົ້ວກາເຟນ້ອຍໆ, ຮັບຈ້າງຂົ້ວໃຫ້ບໍລິສັດສະບຽງອາຫານແຂວງ, ຕໍ່ມາ ມີໝໍ້ຕົ້ມເຫຼົ້າ 90 ຂາຍເຫຼົ້າ 90 ໃຫ້ໂຮງໝໍແຂວງ. ເຮັດຈາກນ້ອຍກໍຄ່ອຍໆຂະຫຍາຍຕົວຂຶ້ນມາ ເຮັດຕາມເງື່ອນໄຂແລະທ່າແຮງທີ່ຕົນມີໃນແຕ່ລະໄລຍະ. ປັດຈຸບັນເປັນເຈົ້າຂອງໂຮງງານຜະລິດນໍ້າດື່ມ ແລະນໍ້າກ້ອນ ໂລມາຄຳ ແລະບໍລິສັດອຸດົມຊັບກໍ່ສ້າງສ້ອມແປງຂົວທາງ. ການຈັດຕັ້ງປະຕິບັດໂຄງການຢູ່ ບ້ານຕະຍົງ ແລະ ບ້ານປະແນະຈຸດສຸມຕັງອາໄລ-ລະແບງ ເມືອງນອງ ແຂວງສະຫວັນນະເຂດ ແມ່ນໄດ້ເລີ່ມຕົ້ນຂຶ້ນໃນວັນທີ 13 ທັນວາ 2019,ທ່ານເຈົ້າແຂວງໄດ້ເປີດກອງປະຊຸມສືບຕໍ່ປຸກລະດົມຂະບວນການແຂ່ງຂັນຮັກຊາດແລະພັດທະນາແກ້ໄຂຄວາມທຸກຍາກຂອງປະຊາຊົນ; ໂດຍຕົນເອງພ້ອມກັບ ທ່ານ ສາຍສະໝອນ ກວານເມືອງຈັນ ຜູ້ອຳນວຍການສະຖາບັນການເງິນຈຸລະພາກ ທີ່ຮັບເງິນຝາກສາຍໃຍສຳພັນ, ໄດ້ມີຄວາມສະໝັກໃຈເຂົ້າຮ່ວມນຳອົງການຈັດຕັ້ງ ແລະໄດ້ເຊັນບົດບັນທຶກໃຫ້ການຊ່ວຍເຫຼືອປະຊາຊົນ 2 ບ້ານຄື: ບ້ານຕະຢົງ ແລະບ້ານປາແໜະ ຢູ່ຈຸດສຸມຕັງອາໄລ-ລະແບງ ເມືອງນອງ ແຂວງສະຫວັນນະເຂດ ໄດ້ໃສ່ຊື່ໂຄງການຮ່ວມໃຈສາຍໄຍໂລມາຄຳ.

ໂຄງການຮ່ວມໃຈສາຍໄຍໂລມາຄໍາເປັນໂຄງການມີສ່ວນຮ່ວມລະຫວ່າງນັກທຸລະກິດ, ພາກລັດແລະພາກປະຊາຊົນເພື່ອໃຫ້ການຊ່ວຍເຫຼືອປະຊາຊົນ 2 ບ້ານ ໂດຍອີງໃສ່ພື້ນຖານທ່າແຮງທີ່ປະຊາຊົນທີ່ມີຢູ່. ເປົ້າໝາຍແນໃສ່ການສ້າງພື້ນຖານໂຄງລ່າງທີ່ຈຳເປັນໃຫ້ກັບປະຊາຊົນເພື່ອຈັດຫາແຫຼ່ງນໍ້າກິນ, ນໍ້າໃຊ້ສຳລັບປະຊາຊົນ,ປະກອບມີ 138 ຄອບຄົວ, ພົນລະເມືອງ 901 ຄົນ ເພື່ອຊຸກຍູ້ສົ່ງເສີມການສ້າງເສດຖະກິດຄອບຄົວໃຫ້ກັບປະຊາຊົນໄດ້ມີແຫຼ່ງອາຫານແຫຼ່ງລາຍຮັບ ເພື່ອກຸ້ມຢູ່ກຸ້ມກິນ ແລະ ສ້າງຄວາມເຂັ້ມແຂງດ້ວຍຕົນເອງແບບຍືນຍົງ(ຫຼີກລ່ຽງການຊ່ວຍເຫຼຶອແບບອຸປະຖໍາ) ໂດຍເນັ້ນໃສ່ ໃຫ້ປະຊາຊົນປູກພືດປະສົມປະສານຫຼາຍຊະນິດ, ພືດໄລຍະສັ້ນ, ໄລຍະກາງຢູ່ໃນໄຮ່ປູກເຂົ້າດິນຕອນດຽວກັນທີ່ປະຊາຊົນມີຢູ່ແລ້ວ. ສຳລັບວຽກທີ່ໄດ້ຈັດຕັ້ງປະຕິບັດປະກອບໃຫ້ກັບປະຊາຊົນມີຄື: ໄດ້ສະໜອງເຄື່ອງມືການຜະລິດກະສິກຳໃຫ້ແກ່ປະຊາຊົນຄອບຄົວໃນ ແລະນອກເປົ້າໝາຍທັງ 2 ບ້ານຈຳນວນ 138 ຄອບຄົວ ໄດ້ເຮັດຝຸ່ນບົ່ມ,ຮ່າຍເບົ້າເຜາະເບ້ຍໄມ້,ເບ້ຍພືດ 12 ຊະນິດ, ພືດໄລຍະສັ້ນ,ໄລຍະກາງ,ພ້ອມທັງໃຫ້ຄວາມຮູ້ ໃຫ້ປະຊາຊົນແລະນ້ອງນັກຮຽນ ໄດ້ຮຽນຮູ້ການປູກ-ການລ້ຽງ ທີ່ຖືກວິທີ,ໃຫ້ແຕ່ລະຄອບຄົວເຮັດສວນປູກຜັກ,ໝາກເຜັດ,ໝາກເຂືອ,ຖົ່ວດິນ,ສາລີ,ໝາກນັດ,ໝາກກ້ວຍ,ມັນຕົ້ນ,ແຂມ,ຫວາຍແລະອື່ນໆ ໃສ່ໃນໄຮ່ປູກເຂົ້າຢູ່ດິນຕອນດຽວ;ສະໜອງສັດລ້ຽງໃຫ້ກັບປະຊາຊົນ ເຊັ່ນ: ໝູ,ໄກ່,ເປັດ,ປາຫຼາຍຊະນິດ, ໄດ້ກໍ່ສ້າງຝາຍນໍ້າລົ້ນເບຕົງເສີມເຫຼັກກັ້ນຫ້ວຍນ້ອຍ 2 ແຫ່ງ ບ້ານປາແນະ 1 ແຫ່ງ ເກັບນໍ້າໄດ້ 22,000ມ3 ແລະບ້ານຕາຢົງ 1 ແຫ່ງ ເກັບນໍ້າໄດ້ 10,000ມ3; ໄດ້ຈົກໜອງສະໃຫຍ່ຂະໜາດ 100 x 100 x 2 ແມັດ ເກັບນໍ້າໄດ້ 20,000ມ3 ໃຫ້ບ້ານຕາຢົງ; ໄດ້ເຈາະສ້າງບາດານຈໍານວນ 10 ບໍ່, ໃຫ້ 5 ບ້ານ, ເຮັດຕາມຮູບແບບຂອງໂຄງການພັດທະນາຊົນນະບົດ,ໄດ້ປັບ 2ຂຸມ ເຮັດເດີ່ນໂຮງຮຽນ, ນອກຈາກນັ້ນໄດ້ສົ່ງເສີມຫັດຖະກຳຕ່ຳຫູກແບບດັ້ງເດີມໂດຍນຳໃຊ້ກີ່ແອວ, ຜ້າແພທີ່ຕໍ່າໄດ້ທາງໂຄງການຮ່ວມໃຈສາຍໄຍໂລມາຄຳຮັບຊື້ໃຫ້ທັງໝົດ.

ໃນ 1 ປີຜ່ານມາ, ທາງໂຄງການຮ່ວມໃຈສາຍໄຍໂລມາຄໍາ ຮ່ວມກັບອົງການຈັດຕັ້ງພັກ-ລັດ ຈັດຕັ້ງປະຕິບັດໂຄງການ ບັນລຸໄດ້ 4 ໜ້າວຽກໃຫຍ່ 56 ໜ້າວຽກຍ່ອຍ, ນໍາໃຊ້ເງິນຂອງໂຄງການ ຈໍານວນ 2 ຕື້ 3 ຮ້ອຍກວ່າລ້ານກີບ. ການຈັດຕັ້ງປະຕິບັດໃນ 1 ປີຜ່ານມາຂອງໂຄງການ ໄດ້ສ້າງພື້ນຖານໂຄງລ່າງຫຼາຍສິ່ງຫຼາຍຢ່າງປະກອບໃຫ້ກັບປະຊາຊົນທັງ 2 ບ້ານໄດ້ມີອາຊີບເພີ່ມຫຼາຍຢ່າງເປັນຂອງຕົນເອງໃນການດຳລົງຊີວິດການເປັນຢູ່ໃຫ້ດີຂຶ້ນ,ໃນຕໍ່ໜ້າຈະເກີດມີພືດຫຼາຍໆຊະນິດເປັນແຫຼ່ງອາຫານ ແລະ ແຫຼ່ງລາຍໄດ້ຂອງປະຊາຊົນທັງສອງບ້ານ, ເປັນທາງເລືອກໃຫ້ ປະຊາຊົນໄດ້ຖອຍຫ່າງອອກຈາກຄວາມຊິນເຄີຍ ຖາງປ່າເຮັດໄຮ່,ປູກເຂົ້າຢ່າງດຽວແບບເລື່ອນລອຍມາແຕ່ດົນ, ບໍ່ເຄີຍກຸ້ມກິນ ພ້ອມກັນຫັນມາເຮັດສວນປູກພືດປະສົມປະສານ ຫຼາຍໆຊະນິດ ໄລຍະສັ້ນ, ໄລຍະກາງ-ໄລຍະຍາວ ເປັນອາຊີບຫຼັກແບບຍືນຍົງ.
ທ່ານ ເກຍ ອູສິດທິເດດ ກ່າວຕື່ມວ່າ: ຜ່ານການຈັດຕັ້ງປະຕິບັດ ນຳພາປະຊາຊົນເຮັດຕົວຈິງມານັ້ນ ເກີດມີສິ່ງສາທາລະນຸປະໂພກ ທີ່ເກີດຂຶ້ນທັງໝົດນັ້ນ ແມ່ນເກີດມາຈາກຄວາມຕ້ອງການຂອງປະຊາຊົນ, ຖືກກັບຈິດໃຈປະຊາຊົນ, ເກີດຜົນປະໂຫຍດກັບປະຊາຊົນຢ່າງແທ້ຈິງ. ພວກຂ້າພະເຈົ້າຢັ້ງຢືນຕໍ່ພັກ-ລັດວ່າ: ການມີສ່ວນຮ່ວມຂອງພວກຂ້າພະເຈົ້າທັງສອງຄົນ ກັບບັນດາອົງການຈັດຕັ້ງພັກ-ລັດຂັ້ນຕ່າງໆ ໃນການໃຫ້ຊ່ວຍເຫຼືອປະຊາຊົນ 2 ໂຄງການທີ່ຜ່ານມານັ້ນ ແມ່ນເຮັດດ້ວຍຄວາມຈິງໃຈ, ບໍລິສຸດໃຈ, ບໍ່ມີສິ່ງອື່ນໃດແອບແຝງທັ້ງສິ້ນ, ສິ່ງທີ່ໄດ້ຈັດຕັ້ງປະຕິບັດທັງໝົດທີ່ກ່າວມານັ້ນມັນໄດ້ເກີດເປັນຮູບປະທຳ, ພຶດຕິກຳດັ່ງກ່າວເປັນການອະທິບາຍເຖິງຕົວຕົນຂອງພວກຂ້າພະເຈົ້າ.

ໃນນາມສ່ວນຕົວ ແລະ ໃນນາມຕາງໜ້າໃຫ້ໜ່ວຍງານໃນການຈັດຕັ້ງປະຕິບັດໂຄງການ, ພວກຂ້າພະເຈົ້າມີຄວາມຮູ້ສຶກພາກພູມໃຈທີ່ໄດ້ມີສ່ວນຮ່ວມນຳອົງການຈັດຕັ້ງຂອງພັກ-ລັດ ໃນການແກ້ໄຂຄວາມທຸກຍາກຂອງປະຊາຊົນເຖິງແມ່ນວ່າຈະເປັນໂຄງການຂະໜາດນ້ອຍ,ມີມູນຄ່າບໍ່ຫຼາຍ, ເວລາກໍສັ້ນ, ແຕ່ກໍແມ່ນນໍ້າໃຈຈາກຄວາມກະຕັນຍູໃນການປະກອບສ່ວນທາງດ້ານເຫື່ອແຮງ, ສະຕິປັນຍາ, ຕາມກຳລັງແຮງທາງດ້ານວັດຖຸແລະຈິດໃຈທີ່ມີຂອງພວກຂ້າພະເຈົ້າຕໍ່ກັບວຽກງານການສ້າງສາພັດທະນາປະເທດຊາດເວົ້າລວມ, ເວົ້າສະເພາະແມ່ນການປະກອບສ່ວນເຂົ້າໃນຂະບວນການແຂ່ງຂັນຮັກຊາດ ແລະ ພັດທະນາປະເທດຊາດໃນໄລຍະໃໝ່ເພື່ອໃຫ້ປະເທດຊາດມີຄວາມຍືນຍົງໝັ້ນຄົງຖາວອນຕະຫຼອດໄປ.
ໂດຍ: ຍຸພິນທອງ
ພາບ: ສຸກສະຫັວນ

แชร์