ສື່ມວນຊົນລາວ ຢ້ຽມຢາມໂຄງການນະວັດຕະກຳລະບຽງເສດຖະກິດພາກຕາເວັນອອກ

ໃນໂອກາດເຄື່ອນໄຫວຢ້ຽມຢາມສະມາຄົມນັກຂ່າວ ແຫ່ງ ປະເທດໄທ ເມື່ອທ້າຍອາທິດຜ່ານມາ, ຄະນະສະມາຄົມນັກຂ່າວແຫ່ງ ສປປ ລາວ ໄດ້ໄປຢ້ຽມຢາມໂຄງການນະວັດຕະກຳລະບຽງເສດຖະກິດພາກຕາເວັນອອກ ຫລືໂຄງການວັງຈັນວັນເລ້ທີ່ຈັງຫວັດ ຣະຍອງ ປະເທດໄທ, ມີເນື້ອທີ່ປະມານ 3.454 ໄລ່ ເປັນໂຄງການຮ່ວມມື ລະຫວ່າງ ບໍລິສັດ ປຕທ ຈຳກັດ (ມະຫາຊົນ) ກັບສໍານັກງານພັດທະນາວິທະຍາຍສາດ ແລະ ເຕັກໂນໂລຊີແຫ່ງຊາດ (ສວທຊ) ກະຊວງ ການອຸດົມສຶກສາວິທະຍາສາດວິໄຈ ແລະນະວັດຕະກໍາ ທີ່ຈະພັດທະນາພື້ນທີ່ໂຄງການໃຫ້ມີລະບົບນິເວດວັດຕະກຳໃນລະດັບຊັ້ນນຳຂອງພູມີພາກອາຊີຕາເອັນອອກສຽງໃຕ້ ໂດຍມີການນຳແນວຄິດເມືອງອັດລິຍະ 7 ດ້ານ, ຊຶ່ງໄດ້ຮັບການຮັບຮອງຈາກສຳນັກງານສົ່ງເສີມເສດຖະກິດດີຈິຕອນເຂົ້າມາໃຊ້ໃນການອອກແບບພັດທະນາໂຄງການ.

ໂຄງການດັ່ງກ່າວ, ມີເປົ້າໝາຍຈະຊຸກຍູ້ຜູ້ປະກອບການໄປສູ່ທຸລະກິດແຫ່ງອະນາຄົດ ແລະອຸດສາຫະກຳເປົ້າໝາຍໃໝ່ເພື່ອເປັນກົນໄກໃນການພັດທະນາເສດຖະກິດ ແລະ ເພີ່ມຄຸນນະພາບຊີວິດການເປັນຢູ່ຂອງປະຊາຊົນໃຫ້ດີຂຶ້ນດ້ວຍນະວັດຕະກຳຄວາມຮູ້ ແລະເຕັກໂນໂລຊີ ຊຶ່ງສອດຄ່ອງກັບວິໄສທັດຂອງ ປຕທ ທີ່ຕ້ອງການຂັບເຄື່ອນທຸກຊີວິດດ້ວຍພະລັງແຫ່ງອະນາຄົດ.

ໂຄງການນະວັດຕະກຳລະບຽງເສດຖະກິດພາກຕາເວັນອອກ ຫຼືໂຄງການວັງຈັນວັນເລໄດ້ແບ່ງອອກເປັນ 3 ເຂດ ຄື: ເຂດ 1 ພື້ນທີ່ການສຶກສາ ແລະການຮຽນຮູ້ເປັນສະຖານທີ່ສຳລັບການພັດທະນາເມັດພັນແຫ່ງນັກວິໄຈໃຫ້ເຂັ້ມແຂງ ໂດຍເປັນທີ່ຕັ້ງຂອງໂຮງຮຽນກໍາເນີດວິທະຍາ ແລະ ສູນການຮຽນຮູ້ ປ່າວັງຈັນ; ເຂດ 2 ພື້ນທີ່ການວິໄຈ ແລະ ການພັດທະນານະວັດຕະກຳ ເປັນພື້ນທີ່ອອກແບບທີ່ມີໂຄງສ້າງພື້ນຖານອັດລິຍະເພື່ອຮອງຮັບການພັດທະນານະວັດຕະກຳທີ່ຈະເກີດຂຶ້ນໃນອະນາຄົດໂດຍມີເປົ້າໝາຍຈະພັດທະນາເມືອງນະວັດຕະກຳສະເພາະ 4 ດ້ານ ໃຫ້ເກີດຂຶ້ນພາຍໃນໂຄງການຄື ເມືອງນະວັດຕະກຳອາຫານ, ເມືອງນະວັດຕະກຳລະບົບອັດຕະໂນມັດຫຸ່ນຍົນ ແລະເອເລັກໂຕນິກອັດລິຍະ, ເມືອງນະວັດຕະກຳຊິວະວິທະຍາສາດ ແລະເຕັກໂນໂລຊີຊິວະພາບ ແລະ ເມືອງນະວັດຕະກຳການບິນ ແລະ ອາວະກາດ; ເຂດ 3 ສະຖານທີ່ເພື່ອການຢູ່ອາໄສພ້ອມສິ່ງອໍານວຍຄວາມສະດວກຄົບວົງຈອນ, ເປັນສະຖານທີ່ສໍາລັບອຳນວຍຄວາມສະດວກເພື່ອການໃຊ້ຊີວິດຂອງຜູ້ຢູ່ອາໄສພາຍໃນໂຄງການ ແລະຊຸມຊົນ ເຊັ່ນ: ອາຄານທີ່ພັກອາໄສ, ຮ້ານຄ້າ, ຫ້ອງປະຊຸມສະຖານທີ່ອາເນກປະສົງ ແລະໂຮງຮຽນນາຊາດ.
ຂ່າວ-ພາບ: ວິໄລ ມະນີລັດ

แชร์