ງານສະບາຍດີ ຫຼງພະບາງເຟສ ສົ່ງເສີມການນັກທ່ອງທ່ຽວເຂົ້າປະເທດ

ງານ “ສະບາຍດີ ຫລວງພະບາງເຟສ (SabaideeLuang Prang Fest) ຈະຈັດຂຶ້ນໃນລະຫວ່າງວັນທີ 6-12 ຕຸລາ 2022 ທີ່ຈະມາເຖິງນີ້, ຢູ່ແຂວງຫຼງພະບາງ ຊຶ່ງເປັນຄັ້ງທຳອິດຈັດຂຶ້ນເພື່ອຊຸກຍູ້,ສົ່ງເສີມບັນດາຫົວໜ່ວຍທຸລະກິດກໍຄືທຸລະກິດຂະໜາດນ້ອຍ ແລະກາງ ໃຫ້ສາມາດເຊື່ອມໂຍງເຂົ້າສູ່ຕະຫຼາດ, ເພື່ອໃຫ້ສາມາດແຂ່ງຂັນໃນຕະຫຼາດພາຍໃນ ແລະ ຕະຫຼາດສາກົນໄດ້ ໂດຍໄດ້ຮັບການສະໜັບສະໜູນຈາກໂຄງການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະກາງຊຶ່ງໂຄງການດັ່ງກ່າວ, ເປັນໂຄງການທີ່ຢູ່ພາຍໃຕ້ກະຊວງອຸດສາຫະກໍາ ແລະການຄ້າ.

ພິທີຖະແຫລງຂ່າວກ່ຽວກັບການຈັດການດັ່ງກ່າວ, ຈັດຂຶ້ນໃນວັນທີ 19 ກັນຍາ 2022 ຢູ່ສະພາການຄ້າ ແລະອຸດສາຫະກຳແຫ່ງຊາດລາວ ນະຄອນຫຼວງວຽງຈັນ ຊຶ່ງ ທ່ານນາງ ຈັນທະຈອນ ວົງໄຊ ຮອງປະທານສະພາການຄ້າ ແລະອຸດສາຫະກຳແຫ່ງຊາດລາວ ໄດ້ໃຫ້ຮູ້ວ່າ: ງານ “ສະບາຍດີ ຫຼວງພະບາງເຟສ” ຈັດຂຶ້ນໃນໄລຍະບຸນອອກພັນສາປະວໍລະນາ, ມີຈຸດປະສົງເພື່ອຊຸກຍູ້, ສົ່ງເສີມ ແລະ ສະໜັບສະໜູນໃຫ້ບັນດາຫົວໜ່ວຍທຸລະກິດ ໃນ ສປປ ລາວ ໄດ້ຮັບການຫັນໄປສູ່ການດໍາເນີນທຸລະກິດແບບຍືນຍົງ ຊຶ່ງເຮັດໃຫ້ກຸ່ມຜູ້ບໍລິໂພກ, ຜູ້ໃຊ້ບໍລິການ ໂດຍສະເພາະແມ່ນກຸ່ມນັກທ່ອງທ່ຽວທົ່ວໄປ ແລະ ບັນດາທຸລະກິດການທ່ອງທ່ຽວທັງພາຍໃນ ແລະສາກົນ ໃຫ້ສາມາດຈັດຕັ້ງປະຕິບັດ ເພື່ອເຫັນໄດ້ເຖິງຜົນປະໂຫຍດ, ຄວາມສຳຄັນ ແລະໃຫ້ການສະໜັບສະໜູນການທ່ອງທ່ຽວແບບຍືນຍົງທີ່ຈະກາຍເປັນຈຸດເດັ່ນ ແລະ ຂໍ້ໄດ້ປຽບທາງທຸລະກິດຂອງບັນດາຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໃນການດຳເນີນທຸລະກິດແບບຍືນຍົງ. ພ້ອມກັນນັ້ນ, ກໍເພື່ອເປັນການກະຕຸ້ນການທ່ອງທ່ຽວພາຍໃນ ໃຫ້ຄົນພາຍໃນຊາດຫັນມາທ່ອງທ່ຽວພາຍໃນປະເທດໃຫ້ຫຼາຍຂຶ້ນ, ທັງເປັນການສົ່ງເສີມການຫັນມາໃຊ້ຜະລິດຕະພັນພາຍໃນໃຫ້ນັບມື້ນັບຫຼາຍຂຶ້ນຄຽງຄູ່ກັບການຟື້ນຟູເສດຖະກິດຫຼັງຈາກໄດ້ຮັບຜົນກະທົບຈາກການລະບາດຂອງພະຍາດໂຄວິດ-19, ທີ່ສຳຄັນແມ່ນເພື່ອສົ່ງເສີມບັນດາຫົວໜ່ວຍທຸລະກິດ, ຜູ້ປະກອບການທີ່ຕິດພັນກັບການທ່ອງທ່ຽວເຊັ່ນ: ບັນດາທຸລະກິດທີ່ພັກ-ໂຮງແຮມ,ບໍລິສັດທ່ອງທ່ຽວ, ບໍລິສັດຂົນສົ່ງ,ບັນດາຜູ້ສະໜອງອາຫານ ແລະເຄື່ອງດື່ມ,ບັນດາຫົວໜ່ວຍທຸລະກິດຫັດຖະກໍາ, ກະສິກຳ ທີ່ເປັນສີໄມ້ລາຍມືຂອງຄົນລາວ.

ໃນໂອກາດດຽວກັນ, ທ່ານ ນາງ ແວວມະນີ ດວງດາລາ ຄະນະປະຈຳສະພາການຄ້າ ແລະອຸດສາຫະກຳ ແຂວງຫຼວງພະບາງ ຍັງໃຫ້ຮູ້ວ່າ: ປັດຈຸບັນນັກທ່ອງທ່ຽວທັງພາຍໃນ, ພາກພື້ນ ແລະ ທົ່ວໂລກ ແມ່ນໃຫ້ຄວາມສໍາຄັນໃນການເດີນທາງ ຢ່າງມີຄວາມຮັບຜິດຊອບຕໍ່ສິ່ງແວດລ້ອມ ແລະ ຊອກຫາປະສົບການທີ່ເປັນເອກະລັກຂອງທ້ອງຖິ່ນ ເຊິ່ງໃນງານ ສະບາຍດີ ຫຼວງພະບາງເຟສ ບັນດາທ່ານຈະໄດ້ເຫັນຄວາມປະສົມປະສານກັນຢ່າງລົງໂຕລະຫ່ວາງ ການທ່ອງທ່ຽວທີ່ເປັນມິດຕໍ່ສິ່ງແວດລ້ອມ, ມີຄວາມຮັບຜິດຊອບກັບສັງຄົມ ແລະ ສົ່ງເສີມເອກະລັກວັດທະນາທຳ ຮີດຄອງປະເພນີ ທ້ອງຖິ່ນອັນແທ້ຈິງ, ໃນຄັ້ງນີ້, ຜູ້ຈັດງານໄດ້ເນັ້ນສ້າງກິດຈະກຳທີ່ເປັນເອກະລັກຂອງຫລວງພະບາງ, ສິນຄ້າທີ່ນໍາມາວາງໃນຕະຫຼາດແມ່ນຜະລິດຕະພັນມາຈາກທ້ອງຖິ່ນ ແລະຕັ້ງໃຈຈັດງານນີ້ໃຫ້ແກ່ຜູ້ມາຢ້ຽມຢາມ ແຂວງຫຼວງພະບາງ ມີຄວາມຮູ້ສຶກພິເສດ ແລະບໍ່ສາມາດຫາປະສົບການແບບນີ້ໄດ້ຈາກບ່ອນອື່ນ, ພ້ອມທັງຕັ້ງໃຈໃຫ້ງານນີ້ ເປັນງານຮູບແບບຂອງບຸນໄຫລເຮືອໄຟ ແບບເອກະລັກຂອງຊາວເມືອງຫລວງພະບາງ ໃຫ້ຜູ້ມາຢາມບ້ານເຮົາຄິດຮອດຄິດເຖິງ ແລະກັບມາຫຼວງພະບາງອີກ ໃນປີຕໍ່ໆໄປ.

ໃນງານຄັ້ງນີ້,ຈະມີຫຼາຍກິດຈະກຳເປັນຕົ້ນ,ໄຕ້ທຽນມວນຊົນ ຢູ່ 12 ວັດ ພາຍໃນແຂວງ,ປະກວດໂຄມໄຟ,ງານວາງສະແດງຜະລິດຕະພັນຫຼວງພະບາງ, ຂະບວນການຖີບລົດສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022, ໃສ່ຊຸດບູຮານຍ່າງຊົມເມືອງເກົ່າ, ຈັດເວທີສົນທະນາ ໃນຫົວຂໍ້: ນຳພາລາວກ້າວສູ່ການທ່ອງທ່ຽວແບບຍືນຍົງ, ແລນມ່ວນຊື່ນຊົມເມືອງເພື່ອໂຮງໝໍເພື່ອນລາວ, ປະກວດການເຮັດເຂົ້າໜົມພື້ນເມືອງຂອງຊາວຫຼວງພະບາງ, ປະກວດຊຸດລາວຍ້ອນຍຸກ, ບຸນກາເຟບ້ານເຮົາ, ໃສ່ບາດມວນຊົນຕໍ່ໜ້າພະລາດຊະວັງ, ບຸນໄຫລເຮືອໄຟ ແລະ ກິດຈະກຳອື່ນໆ.

แชร์