ເຈົ້າແຂວງເຊກອງ ຕ້ອນຮັບປະທານກໍາມາທິການວັດທະນະທໍາ-ສັງຄົມ ສະພາແຫ່ງຊາດ

ໃນວັນທີ 19 ກັນຍາ 2022 ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ຕ້ອນຮັບທ່ານ ນາງ ທຸມມາລີ ວົງພະຈັນ ກໍາມະການຄະນະປະຈໍາ, ປະທານກໍາມາທິການວັດທະນະທໍາ-ສັງຄົມ ສະພາແຫ່ງຊາດ ພ້ອມຄະນະໃນໂອກາດມາເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງເຊກອງ.

ໂອກາດນີ້, ທ່ານ ເຫຼັກໄຫຼ ສີວິໄລ ໄດ້ລາຍງານໂດຍຫຍໍ້ກ່ຽວກັບການນໍາພາ-ຊີ້ນໍາ ຂອງຄະນະພັກ-ອົງການປົກຄອງແຂວງຕໍ່ບັນດາຂະແໜງການຕ່າງໆໃນຂົງເຂດວັດທະນະທໍາ-ສັງຄົມ ຢ່າງມີຜົນສໍາເລັດຫລາຍດ້ານ, ອັນພົ້ນເດັ່ນແມ່ນການເຄື່ອນໄຫວຂອງຂະແໜງສາທາລະນະສຸກ ແລະ ຂະແໜງສຶກສາ ແມ່ນສາມາດຮັບປະກັນໄດ້ 3 ລັກ ສະນະ 5 ຫລັກມູນ ແລະ3 ຂໍ້ແຂ່ງຂັນຂອງຂະແໜງການສຶກສາຢ່າງຟົດຟື້ນ,ການປະຕິບັດ 15 ຄາດໝາຍຕົວຊີ້ວັດສາມາດບັນລຸໄດ້ 10 ຄາດໝາຍ. ສ່ວນການປະຕິບັດວາລະແຫ່ງຊາດ ແຂວງໄດ້ສຸມໃສ່ການຈັດເກັບລາຍຮັບ-ຄຸ້ມຄອງລາຍຈ່າຍ, ການປັບປຸງລັດວິສາຫະກິດ, ສ້າງຖານການຜະລິດ, ຊຸກຍູ້ດຶງດູດການລົງທຶນຂອງພາກເອກະຊົນພາຍໃນ ແລະຕ່າງປະເທດ, ການສ້າງສີມືແຮງງານ, ການຈັດຫາງານ ແລະ ສ້າງສູນບໍາບັດຜູ້ຕິດຢາເສບຕິດ.

ທ່ານ ນາງ ທຸມມາລີ ວົງພະຈັນ ກໍໄດ້ແຈ້ງໃຫ້ຮູ້ເຖິງຈຸດປະສົງໃນການມາເຮັດວຽກງານຢູ່ແຂວງເຊກອງຄັ້ງນີ້, ເພື່ອຕິດຕາມ ແລະກວດກາການປະຕິບັດມະຕິສະພາແຫ່ງຊາດ ຕິດພັນກັບການປະຕິບັດວາລະແຫ່ງຊາດຂອງຂະແໜງການໃນຂົງເຂດວັດທະນະທໍາ-ສັງຄົມ ໂດຍສະເພາະແມ່ນການຝຶກອົບຮົມ, ການສ້າງສີມືແຮງງານ, ການຈັດຫາງານ ແລະອື່ນໆໃນໄລຍະຜ່ານມາ, ຊອກໃຫ້ເຫັນຜົນສໍາເລັດພົ້ນເດັ່ນ ທີ່ຄວນເສີມຂະຫຍາຍ ແລະຈຸດອ່ອນ-ຂໍ້ຄົງຄ້າງ ເພື່ອຫາວິທີແກ້ໄຂແນໃສ່ເຮັດໃຫ້ການເຄື່ອນໄຫວວຽກງານຂອງບັນດາຂະແໜງການຕ່າງໆໃນຂົງເຂດວັດທະນະທໍາ-ສັງຄົມຂອງແຂວງເຊກອງເຕີບໃຫຍ່, ເຂັ້ມແຂງ ແລະ ເຮັດໜ້າທີ່ການເມືອງທີ່ພັກ-ລັດມອບໝາຍໃຫ້ສໍາເລັດ.

แชร์