ບ້ານດົງຄຳໝື່ນ ໄດ້​ຮັບໂທລະໂຄ່ງ ໂຄສະນາຕ້ານໂຄວິດ

ໃນວັນທີ 14 ກັນຍາ 2022 ນີ້, ພະແນກສາທາລະນະສຸກແຂວງສະຫວັນນະເຂດກໍຄືຫ້ອງການທາລະນະສຸກເມືອງຈຳພອນ ແຂວງສະຫວັນນະເຂດ ໄດ້ນຳເອົາໂທລະໂຄ່ງ ທີ່ໄດ້ຮັບຈາກ​ສູນ​ສື່​ສານ​ເພື່ອ​ສຸ​ຂະ​ພາບ ແລະສຸຂະສຶກສາກະຊວງສາທາລະນະສຸກໂດຍ​ການ​ສະ​ໜັບ​ສະ​ໜູນ​ຈາກອົງ​ການຢູນີ​ເຊັບມາມອບໃຫ້ບ້ານດົງຄຳໝື່ນຢູ່ເມືອງຈຳພອນ ແຂວງສະຫວັນນະເຂດ ເພື່ອນຳໃຊ້ເຂົ້າໃນການໂຄສະນາ, ປະຊາສຳພັນຂໍ້ມູນຂ່າວສານຕ່າງໆ ໃຫ້ປະຊາຊົນພາຍໃນບ້ານໄດ້ຮັບຮູ້ຢ່າງທົ່ວເຖິງໂດຍສະເພາະການລະບາດຂອງພະຍາດໂຄວິດ-19 ຕາງໜ້າຮັບໂດຍ ທ່ານ ພູມະລາ ອິນສີຊຽງໃໝ່ ຮອງນາຍບ້ານດົງຄຳໝື່ນ.

ໂອກາດດັ່ງກ່າວ, ທ່ານ ພູມະລາ ອິນສີຊຽງໃໝ່ ໄດ້ສະແດງຄວາມຂອບໃຈຕໍ່ສູນ​ສື່​ສານ​ເພື່ອ​ສຸ​ຂະ​ພາບ ແລະສຸຂະສຶກສາກໍຄືອົງການ​ຢູນີເ​ຊັບທີ່ໄດ້ໃຫ້ການສະໜັບສະໜູນຊ່ວຍເຫລືອໃນຄັ້ງນີ້, ພ້ອມທັງຢືນຢັນວ່າຈະນຳເອົາໂທລະໂຄ່ງທີ່ໄດ້ຮັບໃນຄັ້ງນີ້, ໄປຕິດຕັ້ງ ແລະນຳໃຊ້ໃຫ້ເກີດຜົນປະໂຫຍດສູງສຸດກໍຄືໂຄສະນາ, ເຜີຍແຜ່ຂໍ້ມູນຂ່າວສານຕ່າງໆ ໂດຍສະເພາະຂໍ້ມູນຂ່າວສານກ່ຽວກັບການລະບາດຂອງພະຍາດໂຄວິດ-19 ເປັນຕົ້ນໂຄສະນາຜົນຮ້າຍຂອງພະຍາດດັ່ງກ່າວ ແລະຜົນດີຂອງການມາຮັບວັກຊີນກັນໂຄວິດ-19 ໃຫ້ປະຊາຊົນພາຍໃນບ້ານຮັບຮູ້ຢ່າງທົ່ວເຖິງ ແລະພ້ອມກັນມາຮັບວັກຊີນກັນໂຄວິດ-19 ຢ່າງເປັນຂະບວນການ, ທັງນີ້, ແນໃສ່ເຮັດໃຫ້ ອັດຕາການສັກວັກຊີນຢູ່ພາຍໃນແຂວງສະຫວັນນະເຂດກໍຄືເມືອງຈຳພອນ ບັນລຸຕາມເປົ້າໝາຍ 80% ຂຶ້ນໄປ.

ບ້ານດົງຄຳໝື່ນ ເມືອງຈຳພອນ ມີປະຊາກອນທັງໝົດ 1.900 ກວ່າຄົນ, ມາຮອດປະຈຸບັນສາມາດສັກວັກຊີນກັນໂຄວິດ-19 ເຂັມທີ່ 1 ໄດ້ທັງໝົດ 1.180 ກວ່າຄົນ, ເຂັມ 2 ໄດ້ 1.100 ກວ່າຄົນ ແລະເຂັມ 3 ໄດ້ 250 ກວ່າຄົນ, ໃນຄະນະທີ່ທົ່ວເມືອງຈຳພອນມີປະຊາຊາກອນທັງໝົດ 118.000 ກວ່າຄົນ, ສາມາດສັກວັກຊີນກັນໂຄວິດ-19 ເຂັມ 1 ໄດ້ 64,95%, ເຂັມ 2 ໄດ້ 59,74%, ເຂັມກະຕຸ້ນ 1 ໄດ້ 21,26%, ກະຕຸ້ນ 2 ໄດ້ 0,85%.

ໃນໄລຍະຜ່ານມາສູນ​ສື່​ສານ​ເພື່ອ​ສຸ​ຂະ​ພາບ ແລະສຸຂະສຶກສາກໍຄືອົງການຢູນີເ​ຊັບໄດ້ນຳເອົາໂທລະໂຄ່ງ ຈຳນວນ 12 ຊຸດ ມາມອບໃຫ້ພະແນກສາທາລະນະສຸກແຂວງສະຫວັນນະເຂດເພື່ອແຈກຢາຍໃຫ້ບັນດາເມືອງເປົ້າໝາຍເປັນຕົ້ນ, ເມືອງເຊໂປນ 2 ຊຸດ, ເມືອງນອງ 2 ຊຸດ, ເມືອງຊົນບູລີ 2 ຊຸດ, ເມືອງທ່າປາງທອງ 2 ຊຸດ, ເມືອງອາດສະພອນ 1 ຊຸດ, ເມືອງພະລາດໄຊ 2 ຊຸດ ແລະເມືອງຈຳພອນ 1 ຊຸດ.

 

แชร์