ຄຳມ່ວນ ເລັງສັກວັກຊີນກັນໂຄວິດ-19 ໃຫ້ບັນລຸ 80% ໃນທ້າຍປີ 2022

ໃນວັນທີ 15 ກັນຍາຜ່ານ​ມາ ທ່ານ ແສງທອງ ເສີມລຳວັນ ຮອງຫົວໜ້າພະແນກສາທາລະນະສຸກ ແຂວງຄຳມ່ວນ ໄດ້ລາຍ​ງານໃຫ້ຮູ້ວ່າ: ປະຈຸບັນ, ແຂວງຄຳມ່ວນ ພວມເລັ່ງຈັດຕັ້ງປະຕິບັດວຽກງານສັກວັກຊີນກັນໂຄວິດ-19 ໃຫ້ບັນລຸຕາມເປົ້າໝາຍທີ່ວາງໄວ້ 80% ຂຶ້ນໄປໃນທ້າຍປີ 2022 ນີ້, ຂະນະທີ່ພະແນກສາທາລະນະສຸກແຂວງ ແລະຫ້ອງການສາທາລະນະສຸກຢູ່ບັນດາເມືອງອ້ອມຂ້າງແຂວງກໍໄດ້ສຸມໃສ່ປຸກລະດົມປະຊາຊົນຢູ່ພາຍໃນແຂວງ, ເມືອງໃຫ້ມາຮັບວັກຊີນກັນໂຄວິດ-19 ຢ່າງເປັນຂະບວນ ເພື່ອເຮັດໃຫ້ປະຊາຊົນພາຍໃນແຂວງຢູ່ກັບໂຄວິດ-19 ໄດ້ຢ່າງປອດໄພ.

ທ່ານ ແສງທອງ ເສີມລຳວັນ ຮອງຫົວໜ້າພະແນກສາທາລະນະສຸກ ແຂວງຄຳມ່ວນລາຍງານໃຫ້ຮູ້ ເມື່ອບໍ່ດົນມານີ້ວ່າ: ຄໍາມ່ວນເປັນແຂວງໜຶ່ງທີ່ໄດ້ຮັບການສະໜັບສະໜູນຊ່ວຍເຫຼືອໃນດ້ານຕ່າງໆ ຈາກອົງການຈັດຕັ້ງສາກົນ ເປັນຕົ້ນ ໄດ້ຮັບອຸປະກອນກະຈາຍສຽງເຊັ່ນ: ໂທລະໂຄ່ງ ລຳໂພງ LCD ແລະອື່ນໆ ທິ່ໄດ້ຮັບການຊ່ວຍເຫຼືອຈາກອົງການຢູນີເຊບ ໃນນັ້ນມີໂທລະໂຄ່ງ, ແອວຊີດີ, ຕູ້ລຳໂພງເຄື່ອນທີໂດຍການສະໜັບສະໜູນຈາກອົງການອຸຍນີເຊບ ມອບໃຫ້ພະແນກສາທາລະນະສຸກ ແຂວງຄຳມ່ວນ ເພື່ອແຈກຢາຍໃຫ້ຫ້ອງການສາທາລະນະສຸກ, ໂຮງໝໍຊຸມຊົນ, ໂຮງໝໍນ້ອຍ ຢູ່ບັນດາເມືອງອ້ອມຂ້າງແຂວງ ເພື່ອໂຄສະນາເຜີຍແຜ່, ປຸກລະດົມປະຊາຊົນ ໃຫ້ພ້ອມໃຈກັນເຂົ້າມາຮັບວັກຊີນກັນໂຄວິດ-19. ຜ່ານການຈັດຕັ້ງປະຕິບັດຕົວຈິງ ເຫັນໄດ້ວ່າປະຊາຊົນມີຄວາມຮັບຮູ້, ເຂົ້າໃຈ ແລະພ້ອມພຽງກັນ ເຂົ້າມາຮັບວັກຊີນກັນໂຄວິດ-19 ເປັນຈຳນວນຫຼາຍ. ມາຮອດປະຈຸບັນ ແຂວງຄຳມ່ວນ ສາມາດຈັດຕັ້ງປະຕິບັດວຽກງານສັກວັກຊີນກັນໂຄວິດ-19 ເຂັມທີ 1 ໄດ້ທັງໝົດ 340.900 ກວ່າໂດສ ເທົ່າກັບ 77%, ເຂັມ 2 ໄດ້ 312.600 ກວ່າໂດສ, ເທົ່າກັບ 71% ແລະເຂັມກະຕຸ້ນ ໄດ້ 16%.

ທ່ານ ແສງທອງ ເສີມລຳວັນ ໃຫ້ຮູ້ອີກວ່າ: ໃນໄລຍະຜ່ານມາພະແນກສາທາລະນະສຸກ ແຂວງຄຳມ່ວນ ໄດ້ປະສານສົມທົບກັບຂະແໜງການຕ່າໆ ທີ່ກ່ຽວຂ້ອງເປັນຕົ້ນ ພະແນກ ຖວທ ແຂວງ, ແນວລາວສ້າງຊາດແຂວງນຳໃຊ້ລົດເຄື່ອນທີ່ເພື່ອໂຄສະນາມາດຕະການປ້ອງກັນພະຍາດໂຄວິດ-19 ແລະປຸກລະດົມໃຫ້ປະຊາຊົນມາຮັບວັກຊີນກັນໂຄວິດ-19 ຢູ່ໃນຊຸມຊົນໃນ 10 ຕົວເມືອງ, ພ້ອມທັງໂຄສະນາຜ່ານສື່ທາງວິທະຍຸຂອງແຂວງ, ເມືອງ, ຜ່ານໂທລະໂຄ່ງຂອງບ້ານ, ຜະລິດແຜ່ນປ້າຍໂຄສະນາ (ການໃສ່ຜ້າອັດປາກ-ດັງ, ການເວັ້ນໄລຍະຫ່າງ, ການລ້າງມື) ແລະຜະລິດສະປອດໂຄສະນາກ່ຽວກັບການປ້ອງກັນ ແລະການປຸກລະດົມປະຊາຊົນມາຮັບການສັກວັກຊີນປ້ອງກັນໂຄວິດ-19, ພ້ອມທັງຈັດສົ່ງສື່ໂຄສະນາຕ່າງໆ ທີ່ໄດ້ຮັບຈາກສູນສື່ສານໃຫ້ແຕ່ລະເມືອງ ແລະເມືອງສົ່ງຕໍ່ໃຫ້ໂຮງໝໍນ້ອຍ ແລະບ້ານ.

แชร์