ຮອງເຈົ້າແຂວງຈຳປາສັກ ຕ້ອນຮັບອະທິບໍດີກົມປະຊາສຳພັນ ແຫ່ງປະເທດໄທ ພ້ອມຄະນະ

ທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກ ໄດ້ເປັນກຽດຕ້ອນຮັບ ພົນໂທ ສັນເສີນ ແກ້ວກຳເນີດ ອະທິບໍດີກົມປະຊາສຳພັນ ແຫ່ງປະເທດໄທ ພ້ອມຄະນະສື່ມວນຊົນວິທະຍຸ - ໂທລະພາບ ແລະສື່ອອນລາຍພາກກາງ ແລະພາກອີສານຕອນໃຕ້. ໃນວັນທີ 17 ກັນຍາ 2022 ທີ່ຫ້ອງວ່າການແຂວງຈໍາປາສັກ.

ໃນໂອກາດນີ້ທ່ານຮອງເຈົ້າແຂວງຈຳປາສັກໄດ້ກ່າວສະແດງການຕ້ອນຮັບຢ່າງອົບອຸ່ນ ແລະລາຍງານໂດຍຫຍໍ້ໃຫ້ຊາບກ່ຽວກັບສະພາບຈຸດພິເສດ, ທີ່ຕັ້ງ, ເສດຖະກິດ - ສັງຄົມຂອງແຂວງຈຳປາສັກໂດຍສະເພາະດ້ານວັດທະນະທຳ, ການທ່ອງທ່ຽວ ແລະການຮ່ວມມືວຽກງານສື່ມວນຊົນໃນໄລຍະຜ່ານມາ.

ຊຶ່ງຜ່ານມາປະຊາຊົນສອງຊາດລາວ - ໄທ (ຈຳປາສັກ-ອະບົນຣາຊະທານີ) ໄດ້ມີການໄປມາຫາສູ່ຢ້ຽມຢາມ ທ່ອງທ່ຽວ ແລະແລກປ່ຽນຊື້ -ຂາຍສິນຄ້າຮ່ວມກັນຕະຫຼອດມາ.ສ່ວນດ້ານສື່ມວນຊົນ ພົ້ນເດັ່ນແມ່ນການຮ່ວມມືລະຫວ່າງສະມາຄົມນັກຂ່າວແຂວງຈຳປາສັກກັບສະມາຄົມສື່ມວນຊົນຈັງຫວັດອຸບົນຣາຊະທານີກໍໄດ້ມີການເຊັນເຊັນບົດບັນທຶກຄວາມເຂົ້າໃຈ ( MOU ) ຮ່ວມກັນມາເປັນເວລາຫຼາຍປີແລ້ວ. ແຕ່ໄລຍະຫຼັງຍ້ອນສະພາບໂຄວິດ-19 ລະບາດ, ມີການປິດດ່ານ 2 ປະເທດເຮັດໃຫ້ການຮ່ວມມືການເຄື່ອນ ໄຫວກິດຈະກຳຕ່າງໆບໍ່ລາບລື້ນ.ແຕ່ພໍ 2 ປະເທດໄດ້ເປີດດ່ານຄືນໃໝ່ອຳນວຍຄວາມສະດວກແກ່ການເຂົ້າ - ອອກແລ້ວ ເຫັນວ່າການພົວພັນຮ່ວມມືຄວນໄດ້ຮັບການເສີມຂະຫຍາຍ ເຊັ່ນ: ການແລກປ່ຽນຂໍ້ມູນຂ່າວສານ, ດ້ານພື້ນຖານໂຄງລ່າງ, ເຕັກນິກ ແລະວິຊາການອື່ນໆຕື່ມອີກ.

ສ່ວນທ່ານອະທິບໍດີກົມປະຊາສຳພັນແຫ່ງປະເທດໄທກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບພ້ອມທັງສະແດງເຈດຈຳນົງທີ່ດີໃນການເພີ່ມທະວີຮ່ວມມື,ຊ່ວຍເຫຼືອຍົກລະດັບວຽກງານສື່ມວນຊົນ ລະຫວ່າງແຂວງຈຳປາສັກ ກັບ ສ່ວນກາງ ແລະ ຈັງຫວັດອຸບົນຣາຊະທານີ ຂອງໄທໃຫ້ສູງຂຶ້ນ. ໂດຍກົມປະຊາສຳພັນມີເຈດຈຳນົງຍິນດີຮັບເອົາສື່ມວນຊົນລາວ ( ແຂວງຈຳປາສັກ ) ໄປຝຶກອົບຮົມຍົກລະດັບ ແລະທັດຊະນະສຶກສາທີ່ປະເທດໄທ.ໃນຂະແໜງການຕ່າງໆ ໃນຕໍ່ໜ້າບົນພື້ນຫຼັກການຕົກລົງເຫັນດີຮ່ວມກັນຂອງຄະນະນໍາ ທັງ 2 ປະເທດ.

ພາຍຫຼັງເຂົ້າພົບປະທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກແລ້ວ, ພົນໂທ ສັນເສີນ ແກ້ວກຳເນີດ ອະທິບໍດີກົມປະຊາສຳພັນ ແຫ່ງປະເທດໄທ ພ້ອມຄະນະ ແລະທ່ານ ຊົນລະທິດ ຈັນສິງ ນາຍົກສະມາຄົມສື່ມວນຊົນຈັງຫວັດອຸບົນຣາຊະທານີຍັງໄດ້ພົບປະເຮັດວຽກຮ່ວມກັບສະມາຄົມນັກຂ່າວແຂວງຈຳປາສັກທີ່ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງ ໂດຍເຂົ້າຮ່ວມມີທ່ານ ຄຳເພັດ ເທບໄກສອນ ທ່ານ ທອງຖິ່ນ ພົມພັກດີ ຮອງຫົວໜ້າພະແນກ ຖວທ, ທ່ານ ຄຳໃບ ແກ້ວສຸພັນປະທານສະມາຄົມນັກຂ່າວແຂວງ ພ້ອມຄະນະນຳ ແລະ ສື່ມວນຊົນເຂົ້າຮ່ວມ.

ການຕ້ອນຮັບ ແລະ ຮ່ວມເຮັດວຽກກັບຄະນະກົມປະຊາສຳພັນ ແລະ ສະມາຄົມສື່ມວນຊົນຈັງຫວັດອຸບົນຣາຊະທານີ ແຫ່ງຣາຊາອານາຈັກໄທໃນຄັ້ງນີ້ໄດ້ທົບທວນສະພາບການຮ່ວມມືໃນໄລຍະຜ່ານມາ ແລະປຶກສາຫາລືແນວທາງການຮ່ວມມືກັນໃນຕໍ່ໜ້າ.ໃນໂອກາດນີ້ ຄະນະບໍດີກົມປະຊາສຳພັນ ແລະ ສະມາຄົມສື່ມວນຊົນຈັງຫວັດອຸບົນຣາຊະທານີ ແຫ່ງ ຣາຊາອານາຈັກໄທ ຍັງໄດ້ມາຢ້ຽມຢາມສະຖານີວິທະຍຸ - ໂທລະພາບແຂວງຈຳປາສັກອີກດ້ວຍ.

ຂ່າວ;ພາບ: ເກດສະໜາ

แชร์