ສໍາຜັດກັບຄວາມສວຍງາມ ແລະມະຫັດສະຈັນ ຂອງນໍ້າຕົກຕາດໂກນ

  ນໍ້າຕົກຕາດໂກນເປັນອີກໜຶ່ງສະຖານທີ່ທ່ອງທ່ຽວຂອງເມືອງ ຊ່ອນທີ່ຕັ້ງຢູ່ທິດເໜືອຂອງແຂວງ ຫົວພັນຫ່າງຈາກເທສະບານແຂວງ 220 ກິໂລແມັດ, ມີຊາຍແດນຕິດ ກັບ 4 ເມືອງຂອງແຂວງຫົວພັນຄື: ເມືອງຮ້ຽມ, ເມືອງຊໍາເໜືອ, ເມືອງ ຫົວເມືອງ ແລະເມືອງແອກ ຕິດກັບ 2 ເມືອງຂອງແຂວງຫຼວງພະບາງ ເມືອງໂພນທອງ ແລະເມືອງວຽງຄໍາ ແລະຕິດກັບເມືອງສົບກົບແຂວງເຊີນລາ ສສ ຫວຽດນາມ ແລະເປັນເມືອງທີ່ມີສະຖານທີ່ທ່ອງທ່ຽວທີ່ເຕັມໄປ ດ້ວຍຫຼາຍຮູບແບບຫຼາຍສີສັນເປັນຕົ້ນແມ່ນພູຜາປ່າໄມ້, ຖໍ້າ, ນໍ້າຕົກຕາດຕ່າງໆ, ວັດຖຸບູຮານ ແລະສິ່ງລຶກລັບມະຫັດສະຈັນທີ່ເປັນການເລົ່າຂານຕິດຕໍ່ກັນມາບໍ່ວ່າຈະເປັນແຫ່ງທ່ອງທ່ຽວທາງປະຫວັດສາດ, ທໍາ ມະຊາດ ແລະວັດທະນາທໍາອັນເກົ່າແກ່ແຕ່ລະຍຸກແຕ່ລະສະໄໝ.

 ນໍ້າຕົກຕາດໂກນເປັນອີກສະຖານທີ່ແຫຼ່ງໜຶ່ງທີ່ສວຍສົດງົດງາມ ແລະມະຫັດສະຈັນອີກແຫ່ງໜຶ່ງຂອງ ເມືອງກໍຄືແຂວງຫົວພັນເພື່ອດຶງດູດນັກທ່ອງທ່ຽວທັງພາຍໃນ ແລະຕ່າງປະເທດໃຫ້ເຂົ້າມາທ່ຽວຊົມນັບມື້ ເພີ່ມຂຶ້ນເພາະນໍ້າຕົກຕາດແຫ່ງນີ້ມີ ຄວາມສູງ ແລະມີສາຍນໍ້າທີ່ຕົກລົງມາຈາກໜ້າຜາກາຍເປັນແຫຼ່ງນໍ້າທີ່ ຕົກລົງມາຫຼາຍຂັ້ນຄືກັບຂັ້ນໃດເບິ່ງ ແລ້ວສວຍງາມຊຸ່ມເຢັນເຫັນແລ້ວຮູ້ ສຶກອອນຊອນເນື່ອງຈາກມີປ່າໄມ້ ປົກຄຸມທີ່ຂຽວສະອຸມ ແລະຫຼາກຫຼາຍ ພັນ  ຊຶ່ງບົ່ງບອກເຖິງຄວາມອຸດົມສົມບູນຂອງລະບົບນິເວດວິທະຍາດັ່ງນັ້ນຈຶ່ງເຮັດໃຫ້ອາກາດໃນບໍລິເວນນີ້ບໍລິສຸດແລະເໝາະແກ່ການຜັກຜ່ອນ.

 ສໍາລັບນັກທ່ອງທ່ຽວທີ່ຈະເດີນທາງໄປທ່ຽວຊົມສະຖານທີ່ແຫ່ງນີ້ບໍ່ຕ້ອງເປັນຫ່ວງວ່າການເດີນທາງເຂົ້າໄປຈະມີຄວາມຫຍຸ້ງຍາກເພາະປະຈຸບັນທາງເມືອງໄດ້ພັດທະນາພື້ນຖານໂຄງລ່າງໃຫ້ສາມາດເຂົ້າໄປ ເຖິງສະຖານທີ່ທ່ອງທ່ຽວໄດ້ແລ້ວ, ທັງນີ້ກໍເພື່ອອໍານວຍຄວາມສະດວກໃຫ້ກັບຜູ້ມາຊົມ, ສ່ວນນໍ້າຕົກຕາດ ໂກນຕັ້ງຢູ່ບໍລິເວນບ້ານເມືອງເກົ່າ ເມືອງຊອນໄປທາງທິດໃຕ້ຂອງ ເມືອງປະມານ 28 ກິໂລແມັດ ແລະຫ່າງຈາກສາຍແດນລາວ-ຫວຽດນາມເມືອງສົບກົບ ແຂວງເຊີນລາ ສສ ຫວຽດນາມປະມານ 50 ກິ ໂລແມັດ.

ໂດຍ: ວົງມະນີ

แชร์