ສະມາຄົມນັກຂ່າວລາວ-ໄທ ສືບຕໍ່ຮ່ວມມືແລກປ່ຽນຂໍ້ມູນຂ່າວສານການລາຍງານຂ່າວ

ໃນວັນທີ 14 ກັນຍາ 2022, ທີ່ສະມາຄົມນັກຂ່າວ ແຫ່ງປະເທດໄທ ໄດ້ຈັດກອງປະຊຸມສຳມະນາແລກປ່ຽນຂໍ້ມູນຂ່າວສານການລາຍງານຂ່າວໂດຍການເປັນປະທານຮ່ວມຂອງ ທ່ານ ສະຫວັນຄອນ ລາຊະມຸນຕີ ປະທານສະມາຄົມນັກຂ່າວແຫ່ງ ສປປ ລາວ ແລະທ່ານ ຊາວະລົງ ລິບປັດທຳມະປານີ ປະທານສະພາການໜັງສືພິມແຫ່ງປະເທດໄທ ພ້ອມຄ້ວຍຄະນະ ແລະ ຜູ້ອາວຸໂສຈາກ ສະມາຄົມນັກຂ່າວ ແຫ່ງປະເທດໄທ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ຊາວະລົງ ລິບປັດທຳມະປານີ ປະທານກອງປະຊຸມ ໄດ້ລາຍງານໃຫ້ຮູ້ວ່າ ການຈັດກອງປະຊຸມໃນຄັ້ງນີ້ ເພື່ອສົ່ງເສີມ ແລະ ຂະຫຍາຍຄວາມສໍາພັນການຮ່ວມມືທີ່ດີຕໍ່ກັນ ແລະ ທັງເປັນການຕີລາ ຄາຄືນໝາກຜົນຂອງການຈັດຕັ້ງປະຕິບັດວຽກງານຜ່ານມາ, ພ້ອມທັງຕິດຕາມຄວາມຄືບໜ້າໃນການຈັດກິດຈະກໍາຕ່າງໆ ໃນການຈັດຊຸດຝືກອົບຮົມໃຫ້ສື່ມວນຊົນລາວ ຢູ່ເມືອງວັງວຽງ ແຂວງວຽງຈັນ ຮ່ວມກັບສະມາ ຄົມນັກຂ່າວແຫ່ງ ສປປ ລາວ ແລະ ສະມາຄົມນັກຂ່າວນັກໜັງສືພິມ ແຫ່ງປະເທດໄທ. ພ້ອມນີ້ຍັງມີຄວາມເຫັນເປັນເອກກະພາບຮ່ວມກັນທີ່ຈະພັດທະນາຮ່ວມມືຮອບດ້ານກ່ຽວກັບການແລກປ່ຽນຂໍ້ມູນຂ່າວສານໃນປັດຈຸບັນ ແລະ ອະນາຄົດ, ພ້ອມກັນພັດທະນານຳເອົາຜົນປະໂຫຍດມາສູ່ປະຊາຊົນຢ່າງແທ້ຈິງ ແລະສອງຝ່າຍເຫັນດີເປັນເອກະພາບໃນການສືບຕໍ່ ເລັ່ງປັບປຸງເນື້ອໃນປຶ້ມຄູ່ມືສື່ມວນຊົນ ລາວ-ໄທ ແລະ ໄທ-ລາວ ໂດຍຜະລິດໃນຮູບແບບ E-book ເຜີຍແຜ່ທາງເວັບໄຊ ຫລື Facebook ຂອງແຕ່ລະສະມາຄົມພ້ອມມີການປັບປຸງໃຫ້ທັນສະໄໝເປັນແຕ່ລະໄລຍະຕາມຄວາມເໝາະສົມ.

ໂອກາດດັ່ງກ່າວຜູ້ເຂົ້າຮ່ວມກອງປະຊຸມໄດ້ມີການສົນທະນາແລກປ່ຽນຄວາມຄິດເຫັນຮ່ວມກັນໂດຍສະເພາະຊຸກຍູ້ໃຫ້ມີການເຄື່ອນໄຫວແລກປ່ຽນຂໍ້ມູນຂ່າວສານໃຫ້ຫລາຍຂຶ້ນ ເພື່ອເຮັດໃຫ້ປະຊາຊົນໄດ້ຮັບຂໍ້ມູນຄວາມຈິງທີ່ຖືກຕ້ອງ ແລະມີຄວາມເຂົ້າໃຈແຈ້ງໃນການລາຍງານຂ່າວ.

ພ້ອມດຽວກັນນີ້ ທ່ານ ນາງ ຈິຣັດ ຊາຍາ ອັກຄະຣາຊະທູດໄທ ປະຈຳສປປ ລາວ ກ່າວວ່າ: ເປັນສິ່ງທີ່ພາກພູມໃຈທີ່ສຸດຄືໄດ້ເຫັນການພົວພັນ ແລະສາຍສຳພັນທີ່ແໜ້ນແຟ້ນລະຫວ່າງສອງສະມາ ຄົມນັກຂ່າວລາວ-ໄທ, ໄທ-ລາວ ຊຶ່ງບໍ່ພຽງແຕ່ເປັນລັກຊະນະວິຊາການເທົ່ານັ້ນ ແຕ່ຍັງເປັນເພື່ອນມິດເປັນພີ່ເປັນນ້ອງທີ່ເປັນພື້ນຖານທີ່ດີທີ່ສຸດ ແລະມີຄວາມເຊື່ອໝັ້ນກັນສາມາດເສີມຂະຫຍາຍການຮ່ວມມືໃຫ້ດີຍິ່ງຂຶ້ນ ແລະເປັນໜ້າທີ່ຂອງພວກເຮົາຕ້ອງໄດ້ໃຫ້ຄວາມຮູ້ໃຫ້ຂໍ້ມູນທີ່ຖືກຕ້ອງແກ່ສັງຄົມສິ່ງດັ່ງກ່າວເປັນເປົ້າໝາຍດຽວກັນຂອງສະຖານທູດຂອງສະມາຄົມນັກຂ່າວ ແລະ ຂອງສື່ມວນຊົນພວກເຮົາ, ຖ້າມີການຮ່ວມມືກັນທີ່ດີຍິ່ງເກີດປະໂຫຍດສູງ ແລະ ທາງສະຖານທູດຍິນດີໃຫ້ການຊ່ວຍເຫລືອສະໜັບສະໜູນແບບນໍ້າເພິ່ງເຮືອ ເສືອເພິ່ງປ່າ ແລະຖືວ່າສະມາຄົມນັກຂ່າວ ລາວ-ໄທຫົວໃຈດຽວກັນ.

แชร์