ຄູນຊັບ ຕັ້ງເປົ້າສົ່ງອອກມັນຕົ້ນ 3 ແສນໂຕນ

ບໍລິສັດ ຄູນຊັບ ຂາອອກ-ຂາເຂົ້າ ຈໍາກັດ ເປັນບໍລິສັດເກັບ ຊື້ມັນຕົ້ນລາຍໃຫຍ່ໃນແຂວງຈໍາປາສັກທີ່ໄດ້ດໍາເນີນທຸລະກິດມາຫລາຍປີໄດ້ໃຫ້ຮູ້ວ່າປີນີ້ຈະສົ່ງມັນຕົ້ນອອກຫລາຍຂື້ນແຕ່ລາຄາຈະຕໍ່າກວ່າປີກາຍຜົນຈາກບັນຫາເສດຖະກິດໂລກໄຟເງິນເຟີ້ ແລະບັນຫາອື່ນໆ ຊື່ງຈະເຮັດໃຫ້ປະຊາຊົນທີ່ປູກມັນຕົ້ນຈະໄດ້ຮັບຜົນກະທົບ.

ທ່ານ ສັນໄຊ ກິດລັກສາ ຜູ້ອໍານວຍການບໍລິສັດ ຄູນຊັບ ຂາອອກ- ຂາເຂົ້າ ຈໍາກັດ, ໄດ້ເປີດເຜີຍຕໍ່ນັກ ຂ່າວໜັງສືພິມເສດຖະກິດ-ສັງຄົມປະຈໍາແຂວງ ເມື່ອບໍ່ດົນມານີ້ຮູ້ວ່າ: ບໍລິສັດໄດ້ ເຄື່ອນໄຫວດໍາເນີນທຸລະກິດໃນ ການສົ່ງເສີມປະຊາຊົນປູກມັນຕົ້ນ ແລະຮັບເກັບຊື້ມັນຕົ້ນຢູ່ແຂວງຈໍາປາສັກມາເປັນເວລາຫລາຍປີທີ່ເມືອງບາຈຽງຈະເລີນສຸກ ແຂວງຈໍາປາສັກ, ເມືອງເລົ່າງາມ ແຂວງສາລະວັນ ແລະເມືອງອື່ນໆຢູ່ບັນດາແຂວງໆພາກໃຕ້, ຈາກເມື່ອກ່ອນເນື້ອທີ່ປູກບໍ່ຫລາຍຫລັງທີ່ປະຊາຊົນເຫັນວ່າການປູກມັນຕົ້ນ ສາມາດສ້າງລາຍຮັບທີ່ດີໃຫ້ກັບຄອບຄົວຈີ່ງໄດ້ເລີ່ມກັບມາປູກຫລາຍຂຶ້ນ ເຮັດໃຫ້ມັນຕົ້ນກາຍເປັນສິນຄ້າປາຍແຫລມທີ່ສໍາຄັນຂອງປະເທດ ແລະເປັນສິນຄ້າຫລັກທີ່ປະຊາຊົນສ່ວນ ໃຫຍ່ສຸມໃສ່ໃນການປູກມັນຕົ້ນ.

ໃນປີ 2021 ຜ່ານມາລາຄາມັນຕົ້ນໄດ້ສູງຂື້ນເປັນປະຫວັດສາດເຮັດໃຫ້ບໍລິສັດສາມາດສົ່ງອອກມັນຕົ້ນແຫ້ງໄດ້ເຖີງ 2 ແສນກວ່າໂຕນ ສໍາລັບປີນີ້ຕັ້ງ ເປົ້າຈະສົ່ງອອກ 3 ແສນໂຕນ.

ຢ່າງໃດກໍ່ຕາມສະພາບລວມເນື້ອທີ່ໃນການປູກມັນຕົ້ນປີນີ້ໄດ້ເພີ່ມຂື້ນໜ້າຢ່າງກ້າວກະໂດດຊຶ່ງສະແດງໃຫ້ເຫັນພາບລວມໃນທົ່ວປະເທດແມ່ນມີການປູກມັນຕົ້ນຢ່າງເປັນຂະບວນການສະນັ້ນປະລິມານມັນຕົ້ນອາດສູງຂື້ນຫລາຍເທົ່າຕົວເຮັດໃຫ້ຕະຫລາດທີ່ສົ່ງອອກມີອີ່ມຕົວ, ຜູ້ປະກອບການພາຍໃນ ແລະບໍລິສັດເກັບຊື້ຈະໄດ້ກົດລາຄາມັນຕົ້ນຕາມກົນໄກຕະຫລາດລົງເຮັດໃຫ້ລາຄາມັນຕົ້ນປີນີ້ຈະຕໍ່າກວ່າປີກ່ອນກໍ່ຄືບໍ່ເຖີງ 3.000 ກີບຕໍ່ໂລ ແລະທີ່ໜ້າເປັນຫວ່ງທີ່ສຸດຄືປະຊາຊົນຊາວກະສີກອນຈະພົບບັນ ຫາດ້ານການຂົນສົ່ງມັນຕົ້ນຈາກສວນຫາລາງເກັບຊື້, ເນື່ອງຈາກສະພາບໃນປະຈຸບັນການສະໜອງນໍ້າມັນຍັງມີບາງໄລຍະພົບບັນຫາການຂາດແຄນນໍ້າ, ສະນັ້ນຜູ້ທີ່ໄດ້ ຮັບຜົນກະທົບໂດຍກົງແມ່ນຊາວສວນ.

ທ່ານຜູ້ອໍານວຍການກ່າວຕື່ມວ່າ: ແຕ່ນີ້ຫາລະດູເກັບກ່ຽວຜົນຜະລິດຊາວສວນຜູ້ປູກມັນຕົ້ນຕ້ອງໄດ້ຈັບຕາມອງບັນຫານໍ້າມັນຂາດແຄນ, ບັນຫາເງິນກີບອ່ອນຄ່າ ແລະບັນຫາສະພາບເສດຖະກິດຂອງໂລກທີ່ຍັງສຶບຕໍ່ຢ່າງໜັກໜ່ວງໃນປະຈຸບັນ, ສະນັ້ນ, ເພື່ອເປັນທາງອອກບໍລິສັດຈີ່ງມີແຜນຈະປ່ອຍເງິນໃຫ້ຊາວກະສີກອນເພື່ອມີເງິນທຶນໃນການນໍາໃຊ້ເຂົ້າໃນການເກັບຜົນຜະລິດ ແລະການຂົນສົ່ງມັນຕົ້ນອອກມາຂາຍໃຫ້ທາງບໍລິສັດ.

ຂ່າວ: ໂພທິລາດ

แชร์