ອົງການເກັບກູ້ລະເບີດ (ແມັກ) ປະຈຳແຂວງຄຳມ່ວນ ເກັບກູ້ລະເບີດບໍ່ທັນແຕກໄດ້ເກືອບ 300 ລູກ

ໃນວັນທີ 13 ກັນຍາ 2022 ທີ່ພະແນກພະລັງງານ ແລະບໍແຮ່ ແຂວງຄໍາມ່ວນ ອົງການເກັບກູ້ລະເບີດ (ແມັກ) ໄດ້ຈັດກອງປະຊຸມສະຫລຸບໂຄງການເກັບກູ້ລະເບີດ ໄລຍະທີ່ VII ຢູ່ ແຂວງຄຳມ່ວນໂດຍການເປັນປະທານຂອງທ່ານ ນ. ແກ້ວໃສສີ ປາດຖະໜາ ຮອງຫົວຫນ້າພະແນກການຕ່າງປະເທດ ແຂວງຄຳມ່ວນ, ທ່ານ ນ. Rebecca Leven (ຮີເບັກກ້າ ເລດເວັນ) ຫົວຫນ້າອົງການເກັບກູ້ລະເບີດ (ແມັກ) ປະຈໍາ ສປປ ລາວ, ມີບັນດາທ່ານໃນຄະນະຄຸມຄອງແຫ່ງຊາດເພື່ອແກ້ໄຂໍບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ, ອຳນາດການປົກຄອງເມືອງ ແລະ ນາຍບ້ານ 9 ບ້ານຂອງເມືອງບົວລະພາໃນເຂດເປົ້າໝາຍຂອງໂຄງການເຂົ້າຮ່ວມ.

ທ່ານ ສີວອນ ວັນວິໄລ ຫົວຫນ້າອົງການຫົວຫນ້າອົງການເກັບກູ້ລະເບີດປະຈຳແຂວງຄຳມ່ວນຂຶ້ນຜ່ານສະຫລຸບການຈັດຕັ້ງປະຕິບັດໃນໄລຍະ 12 ເດືອນຜ່ານມາ. ເຊິ່ງໂຄງການເກັບກູ້ລະເບີດ ເພື່ອສະໜັບສະໜູນການພັດທະນາຊຸມຊົນຢູ່ເມືອງບົວລະພາ ແຂວງຄຳມ່ວນ ໂດຍໄດ້ຮັບການສະໜັບສະໜູນຈາກກະຊວງການຕ່າງປະເທດນອກແວ(NMFA) ດ້ວຍງົບປະມານ 667.000 ໂດລາສະຫະລັດ ເຊິ່ງມີໄລຍະການຈັດຕັ້ງປະຕິບັດ 12 ເດືອນ ເລີ່ມແຕ່ເດືອນສິງຫາ 2021 ຫາ ເດືອນ ກໍລະກົດ 2022 ໃນເຂດ 9 ບ້ານ ທີ່ນອນຢູ່ໃນເປົ້າ ໝາຍ. ຢູ່ເມືອງບົວລະພາຄື: ບ້ານຫລັງຄັງ, ບ້ານນາຫອມ, ບ້ານສະອາງ, ບ້ານຫຍ້າຫວານ, ບ້ານຜານົບ, ບ້ານຫນອງບົວ, ບ້ານແກ້ງວັກ, ບ້ານແສນພັນ ແລະ ບ້ານວັງຄົນ ຜ່ານການຈັດຕັ້ງປະຕິບັດຕົວຈິງ ໃນ 2 ກິດຈະກຳຫລັກຄື: ການສຳຫລວດ ແລະ ການເກັບກູ້ລະເບີດອອກຈາກເນື້ອທີ່. ໃນນັ້ນກິດຈະກຳການສຳຫລວດເນື້ອທີ່ດິນປະຕິບັດໄດ້ທັງໝົດ 10.238.379 ຕາແມັດພົບເຫັນລູກລະເບີດທັງໝົດ 400 ໜ່ວຍ ສ່ວນກິດຈະກຳການເກັບກູ້ລະເບີດອອກຈາກເນື້ອທີ່ດິນແມ່ນຈັດຕັ້ງປະຕິບັດໄດ້ພຽງແຕ່ 7 ບ້ານຄື: ບ້ານຂະຍຸ, ບ້ານສະອາງ, ບ້ານນາຫອມ, ບ້ານຫລັງຄັງ, ບ້ານຫນອງບົວບ້ານແສນພັນ ແລະບ້ານໂພນ ໃນເນື້ອທີ່ດິນ 428,908 ຕາແມັດ ສາມາດເກັບກູ້ ແລະທຳລາຍລະເບີດໄດ້ ທັງໝົດ 293 ລູກ ໃນນັ້ນ ເປັນປະເພດບົມບີ່ 218 ລູກ ແລະລະເບີດຊະນິດອື່ນໆ 75 ລູກ. ເມື່ອທຽບໃສ່ຄາດໝາຍແລ້ວການຈັດຕັ້ງປະຕິບັດເກັບກູ້ລະເບີດອອກຈາກເນື້ອທີ່ແມ່ນປະຕິບັດໄດ້ພຽງແຕ່ 70% ເນື່ອງຈາກການແຜ່ລະບາດຂອງພະຍາດໂຄວິດ-19 ທິດທາງແຜນການໃນຕໍ່ໜ້າພາຍຫຼັງສິ້ນສຸດໂຄງການໄລຍະທີ VII ຜູ້ໃຫ້ທຶນສະໜັບສະໜູນງົບປະມານໂຄງການ ໄລຍະທີ VIII ເລີ່ມແຕ່ເດືອນ ສິງຫາ 2022 - ເດືອນທັນວາ 2025 ໃນຈຳນວນ ເງິນ 1,593,000 ໂດລສະຫະລັດ ຈາກນັ້ນກອງປະຊຸມກໍ່ໄດ້ຜັດປ່ຽນກັນປະກອບຄຳຄິດເຫັນເພືອ່ພ້ອມກັນຄົ້ນຄວ້າປຶກສາຫາລືເພື່ອນຳໄປຈັດຕັ້ປະຕິບັດໃນຕໍ່ໜ້າໃຫ້ມີຜົນສຳເລັດ.

แชร์