ພົບສານປົນເປື້ອນໃນຳືດຜັກຢູ່ຕະຫຼາດສະຫວັນໄຊ

  ພະແນກກະສິກໍາ ແລະປ່າໄມ້ແຂວງສະຫວັນນະເຂດ, ສາທາລະນະສຸກແຂວງ, ອຸດສາຫະກໍາ ແລະການຄ້າແຂວງໂດຍຮ່ວມກັນລົງກວດກາ ແລະວິໄຈກັບທີ່ຕໍ່ ພືດຜັກ-ໝາກໄມ້ທີ່ນໍາມາຂາຍທີ່ຕະຫຼາດສະຫວັນໄຊອັນເປັນພືດທີ່ປະຊາຊົນປູກພາຍໃນແຕ່ລະທ້ອງຖິ່ນ ແລະນໍາເຂົ້າຈາກປະເທດເພື່ອນບ້ານໃນວັນທີ 22 ມີ ນາ 2019 ປາກົດວ່າພົບສານປົນເປື້ອນໃນລະດັບທີ່ບໍ່ປອດໄພໃນພືດຜັກໝາກໄມ້ທີ່ປະຊາຊົນໃນທ້ອງຖິ່ນປູກ, ສ່ວນອາຫານແຊ່ແຂງທີ່ນຳເຂົ້າແມ່ນສາມາດບໍລິໂພກໄດ້.

 ຈາກການເກັບຕົວຢ່າງ ແລະ ນໍາມາວິໄຈຈໍາພວກພືດຜັກ ແລະ ໝາກໄມ້ຈໍານວນ 20 ກວ່າຕົວຢ່າງຂອງວິຊາການໄດ້ປາກົດວ່າພົບສານປົນເປື້ອນ ແລະຕົກຄ້າງໃນລະດັບທີ່ບໍ່ປອດໄພເປັນຈໍານວນຫຼາຍເປັນຕົ້ນແມ່ນ: ໃນຫົວຂີງໃຫຍ່, ຜັກໜອກ, ຜັກບົ່ວ,ຜັກຕັງໂອ,ຜັກຫອມປ້ອມ,ໝາກແຕງກວາ, ສາລີນ້ອຍ, ໝາກຖົ່ວຍາວ, ໝາກເລັ່ນໝາກນາວ, ໝາກໂມ, ໝາກກ້ຽງ ແລະໝາກມ່ວງນໍ້າດອກໄມ້.

  ສໍາລັບຜົນຂອງການກວດກາ ແລະວິໄຈປະເພດອາຫານແຊ່ແຂງທີ່ເປັນການນໍາເຂົ້າຈາກປະເທດເພື່ອນບ້ານແມ່ນມີຄວາມປອດໄພສາມາດບໍລິໂພກໄດ້ຕາມຄວາມຕ້ອງການ (ບໍ່ພົບສານຟໍມາລິນ) ພາຍຫຼັງມີການວິໄຈດ້ວຍການແຊ່ ນໍ້າຢາໃຊ້ເວລາ 3-5 ນາທີໃນຈໍາ ນວນ16 ຕົວຢ່າງໃນຈໍາພວກ: ປາມຶກສົດ, ປາມຶກ ແຫ້ງ, ປາທູ, ກຸ້ງ, ໄສ້ໝູ, ເຫືອກ, ໄກ່ແຊ່ແຂງ, ກະປິ.

  ວິຊາການຈາກຂະແໜງປູກຝັງພະແນກກະສິກໍາ ແລະ ປ່າໄມ້ແຂວງໃຫ້ສໍາພາດວ່າ: ໃນການລົງມາກວດກາ ແລະ ວິໄຈຕໍ່ກັບພືດຜັກ ແລະໝາກໄມ້ທີ່ຂາຍຢູ່ພາຍໃນຕະຫຼາດສະຫວັນໄຊໃນຄັ້ງນີ້ປາກົດວ່າ: ພົບສານປົນເປື້ອນທີ່ຕົກຄ້າງໃນລະດັບທີ່ບໍ່ປອດໄພເປັນຈໍານວນຫຼາຍຊະນິດຂອງພືດຜັກ ແລະໝາກໄມ້ ແລະກໍ່ເປັນໜ້າຕົກໃຈຫຼາຍຊຶ່ງຕົວສານດັ່ງກ່າວນີ້ຖ້ານໍາໄປບໍລິໂພກສະສົມຫຼາຍປີມັນກໍ່ຈະໃຫ້ເກີດເປັນໂລກມະເຮັງໄດ້ສິ່ງສໍາຄັນຜູ້ທີ່ນໍາໄປບໍລິໂພກກໍ່ຄວນລ້າງ ແລະແຊ່ນໍ້າໃຫ້ດົນ ແລະ ປ່ອຍນໍ້າໃຫ້ໄຫລຜ່ານພືດຜັກຕະຫຼອດຈົນກວ່າຈະພໍໃຈ, ອີກຢ່າງກໍ່ຮຽກຮ້ອງຜູ້ທີ່ຊື້ກໍ່ຊອກຮູ້ແຫຼ່ງທີ່ມາຂອງການປູກພືດເສຍກ່ອນແມ່ນເປັນການດີທາງທີ່ດີກໍ່ໃຫ້ປະຊາຊົນຈົ່ງຊອກຫາພືດຜັກ ແລະໝາກໄມ້ທີ່ເກີດກັບແຫຼ່ງທໍາມະຊາດກໍ່ຍິ່ງເປັນການດີທີ່ສຸດ .

แชร์