ສະຫວັນນະເຂດ ເລັ່ງສັກວັກຊິນໃຫ້ບັນລຸ 80%

ໃນວັນທີ 13 ກັນຍາຜ່ານ​ມາ ທ່ານ ດ​ຣ ນາງ ເກດສະພອນ ຍາດຕິວົງ ຮອງຫົວໜ້າພະແນກສາທາລະນະສຸກແຂວງສະຫວັນນະເຂດ ໄດ້ລາຍ​ງານໃຫ້ຮູ້ວ່າ: ມາຮອດປະຈຸບັນ ທົ່ວແຂວງ​ໄດ້​ມີ​ປະ​ຊາ​ຊົນສັກ​ຢາວັກຊິນ​ປ້ອງ​ກັນ​ໂຄວິດ-19 ເຂັມທີ1 ໄດ້ 67,94%, ເຂັມ 2 ໄດ້ 59,05%, ເຂັມ 3 ໄດ້ 21,21%, ໃນນັ້ນ ກຸ່ມອາຍຸ 6-11ປີ ສັກເຂັມ 1 ໄດ້ 72,4%, ເຂັມ 2 ໄດ້ 53,8%, ອາຍຸ 12-17 ປີ ສັກເຂັມ 1 ໄດ້ 76,8%, ເຂັມ 2 ໄດ້ 56,1%, ຜູ້ອາຍຸສູງກວ່າ 12ປີຂຶ້ນໄປ ສັກເຂັມ 1 ໄດ້77,7%, ເຂັມ 2 ໄດ້ 69,1%%, ແນວ​ໃດກໍ່​ດີ ຕາມ​ຄາດ​ໝາຍ​ຂອງ​ແຂວງ​ແມ່ນ​ໃຫ້​ບັນ​ລຸ 80% ຂຶ້ນ​ໄປ​ໃນ​ທ້າຍ​ປີ​ນີ້.

ເພື່ອເຮັດໃຫ້ອັດຕາການສັກວັກຊິນບັນລຸຕາມເປົ້າໝາຍ 80% ຂຶ້ນໄປໃນທ້າຍປີນີ້, ພະແນກສາທາລະນະສຸກແຂວງສະຫວັນນະເຂດ ຈະສືບ​ຕໍ່ຊຸກຍູ້ໃຫ້ທີມງານແພດ ໃນ 15 ເມືອງ ແລະໂຮງໝໍນ້ອຍແຕ່ລະແຫ່ງລົງບໍລິການສັກວັກຊິນ ໃນແຕ່ລະໂຮງຮຽນ, ແຕ່​ລະ​ຈຸດໃຫ້ສຳເລັດໂດຍໄວ, ພ້ອມທັງສືບຕໍ່ລົງເຄື່ອນທີ່ໄປຕາມຈຸດບໍລິການຕາມບ້ານ, ໂຮງຮຽນ, ຄິວລົດ, ສວນມັນ, ໄຮ່, ນາ, ແຕ່ລະຄອບຄົວ ແລະອື່ນໆ, ທັງ​ນີ້ ຮຽກຮ້ອງໃຫ້ປະຊາຊົນພາຍໃນແຂວງສະຫວັນນະເຂດ ຮ່ວມແຮງຮ່ວມໃຈກັນ, ຕື່ນຕົວ ເຂົ້າມາຮັບວັກຊິນ ໃຫ້ໄດ້ຄົບຕາມຈຳນວນທີ່ໄດ້ກຳນົດໄວ ແນໃສ່ເຮັດໃຫ້ອັດຕາການສັກວັກຊິນບັນລຸຕາມເປົ້າໝາຍທີ່ວາງໄວ້.

ທ່ານດ​ຣ ນາງ ເກດສະພອນ ຍາດຕິວົງ ກ່າວ​ຕື່ມ​ວ່າ: ແຂວງສະຫວັນນະເຂດ ເປັນແຂວງໜຶ່ງທີ່ໄດ້ຮັບການສະໜັບສະໜູນ, ຊ່ວຍເຫລືອໃນດ້ານຕ່າງໆ ເປັນຕົ້ນ ໄດ້ຮັບອຸປະກອນກະຈາຍສຽງເຊັ່ນ: ໂທລະໂຄ່ງ, ລຳໂພງ, ແອວຊີດີ ແລະອື່ນໆ ຈາກສູນສື່ສານເພື່ອສຸຂະພາບ ແລະສຸຂະສຶກສາ ກະຊວງສາ ທາລະນະສຸກ ໂດຍການສະໜັບສະໜູນຈາກອົງການຢູນີເຊັບ ​ໂດຍ​ທາງພະແນກສາທາແຂວງ ກໍໄດ້ນຳເອົາອຸປະກອນດັ່ງກ່າວ ໄປມອບໃຫ້ບັນດາເມືອງເປົ້າໝາຍ ເພື່ອນຳໃຊ້ເຂົ້າໃນການໂຄສະນາເຜີຍແຜ່ຂໍ້ມູນຂ່າວສານຕ່າງໆກ່ຽວກັບພະຍາດໂຄວິດ-19 ແລະພະຍາດລະບາດຕ່າງໆ ລວມເຖິງເຫດການອື່ນໆທີ່ເກີດຂຶ້ນ ຢູ່ພາຍໃນແຂວງ, ເມືອງ, ບ້ານໃຫ້ປະຊາຊົນໄດ້ຮັບຮູ້ຢ່າງທົ່ວເຖິງ, ອັນສຳຄັນການນຳໃຊ້ອຸປະກອນດັ່ງກ່າວ, ໃນໄລຍະທີ່ມີການລະບາດຂອງພະຍາດໂຄວິດ-19 ຈົນມາຮອດປະຈຸບັນເຮັດໃຫ້ປະຊາຊົນໄດ້ຮັບຮູ້ ແລະຕື່ນຕົວ ເຂົ້າມາຮັບວັກຊີນກັນໂຄວິດ-19 ນັບ​ມື້ຫຼາຍຂຶ້ນເລື້ອຍໆ.

 

แชร์