ສນຊ ສະຫລຸບວຽກງານຂົນຂວາຍປະຊາຊົນ ແລະການໂຄສະນາ

ສູນກາງແນວລາວສ້າງຊາດ (ສນຊ) ໄດ້ຈັດກອງປະຊຸມສະຫລຸບການເຄື່ອນໄຫວວຽກງານ 6 ເດືອນຕົ້ນປີ ແລະແຜນການເຄື່ອນໄຫວ 6 ເດືອນທ້າຍປີ 2022 ຂອງຄະນະທີ່ປຶກສາວຽກງານຂົນຂວາຍປະຊາຊົນ; ສະຫລຸບການເຄື່ອນໄຫວວຽກງານໂຄສະນາປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2022, ລວມທັງແຜນດຳເນີນງານຂອງຄະນະ ທີ່ປຶກສາວຽກງານຂົນຂວາຍປະຊາຊົນ ສະໄໝທີ XI ຂຶ້ນໃນທ້າຍອາທິດຜ່ານມາ ໂດຍການເປັນປະທານຂອງທ່ານ ບົວເງິນ ຊາພູວົງ ກຳມະການ ສນຊ, ຫົວໜ້າຄະນະທີ່ປຶກສາວຽກງານຂົນຂວາຍປະຊາຊົນ, ໃຫ້ກຽດເຂົ້າຮ່ວມຂອງທ່ານ ຈັນ ທະວົງ ແສນອາມາດມົນຕີ ຮອງປະທານ ສນຊ ຜູ້ຊີ້ນຳວຽກງານໂຄສະນາ, ມີທ່ານ ນາງ ແພງພັນ ບຸບ ຜາພອນ ຫົວໜ້າກົມໂຄສະນາ ຜູ້ປະຈຳການກອງເລຂາຂອງຄະນະທີ່ປຶກສາວຽກງານຂົນຂວາຍປະຊາຊົນພ້ອມດ້ວຍແຂກຖືກເຊີນເຂົ້າຮ່ວມ.

ກອງປະຊຸມ ໄດ້ຮັບຟັງຂໍ້ຕົກລົງວ່າດ້ວຍການແບ່ງຄວາມຮັບຜິດຊອບໃຫ້ຄະນະທີ່ປຶກສາ ແລະຄູ່ຮ່ວມງານວຽກງານຂົນຂວາຍປະຊາຊົນ ແລະຂໍ້ຕົກລົງວ່າດ້ວຍສິດ ແລະ ໜ້າທີ່ຂອງຄະນະທີ່ປຶກສາວຽກງານຂົນຂວາຍປະຊາຊົນ. ຈາກນັ້ນຜູ້ເຂົ້າຮ່ວມກໍ່ໄດ້ຜັດປ່ຽນກັນ ປະກອບຄຳເຫັນໃສ່ບັນດາເອກະສານຕ່າງໆ ແລະ ທິດທາງແຜນການໃນຕໍ່ໜ້າຢ່າງກົງໄປກົງມາດ້ວຍເນື້ອໃນ ແລະບັນຍາກາດທີ່ສ້າງສັນເພື່ອແນໃສ່ປັບປຸງເນື້ອໃນຮ່າງບົດສະຫລຸບ ແລະທິດທາງໃນຕໍ່ໜ້າໃຫ້ມີຄວາມສອດຄ່ອງ ແລະ ຄົບຖ້ວນສົມບູນຂຶ້ນ.

ໂອກາດນີ້, ທ່ານຮອງປະທານ ສນຊ ກໍໄດ້ມີຄຳເຫັນໂອ້ລົມ ຕີລາຄາຕໍ່ຜົນງານຕ່າງໆ ໃນການເຄື່ອນໄຫວຂອງຄະນະທີ່ປຶກສາໃນໄລຍະ 6 ເດືອນຜ່ານມາ ເຊັ່ນວ່າ: ການລົງຊຸກຍູ້ວຽກງານຂົນຂວາຍປະຊາຊົນຢູ່ແຂວງທີ່ມີຊາຍແດນຕິດຈອດກັບປະເທດໃກ້ຄຽງໂດຍສະເພາະແຂວງໄຊຍະບູລີ, ການສົມທົບກັບກະຊວງສາທາລະນະສຸກ ລົງຊຸກຍູ້ວຽກງານຮັກສາສຸຂະພາບ ເປັນຕົ້ນ: ການສັກຢາປ້ອງກັນໂຄວິດ-19 ທີ່ແຂວງໄຊສົມບູນ, ການພົບປະກັບຄົນເຊື້ອຊາດລາວທີ່ມາຢ້ຽມຢາມ ແລະເຮັດວຽກຢູ່ ສປປ ລາວ ໃນໄລຍະຜ່ານມາ, ການປະກອບສ່ວນໃນການຂຽນບົດຕ່າງໆ ລົງວາລະສານ-ໜັງສືພິມ ຂອງແນວລາວສ້າງຊາດ, ການປະກອບສ່ວນໃນການວາງສະແດງສິນຄ້າ ແລະອາຫານໃນງານສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ 2022, ການສ້າງຕັ້ງກອງທຶນເພື່ອຊ່ວຍເຫລືອເຊິ່ງກັນ ແລະກັນ ໃນຍາມຈຳເປັນ.

ພ້ອມກັນນີ້ທ່ານຮອງປະທານ ສນຊ ຍັງໄດ້ເນັ້ນໃຫ້ຄະນະຂົນຂວາຍ ແລະກົມໂຄສະນາເອົາໃຈໃສ່ຕື່ມເປັນຕົ້ນ: ການຍົກລະດັບທາງດ້ານວຽກງານໂຄສະນາໂດຍສະເພາະສື່ອອນລາຍ, ຍົກລະດັບຄຸນນະພາບຂອງອຸປະກອນຮັບໃຊ້ສື່, ການຄຸ້ມຄອງສື່ອອນລາຍໂດຍສົມທົບກັບອົງການພາຄີ ແລະກະຊວງທີ່ກ່ຽວຂ້ອງ. ຄະນະທີ່ປຶກສາແຕ່ລະທ່ານໃຫ້ມີການບັນທຶກການເຄື່ອນໄຫວວຽກງານຂອງຕົນເພື່ອລາຍງານຕໍ່ຄະນະປະຈຳ ສນຊ ໂດຍຜ່ານກອງເລຂາໃນແຕ່ລະເດືອນ ແລະພ້ອມກັນເສີມຂະຫຍາຍຄຸນລັກສະນະຂອງກຳມະການ ສນຊ ໃຫ້ດີກວ່າເກົ່າ.

แชร์