ສາ​ລະ​ວັນ ​ເລັ່ງ​ໂຄ​ສະ​ນາໃຫ້ປະ​ຊາ​ຊົນສັກວັກຊີນ

ທ່ານ ດ​ຣ ດາວ​ວົງ ສຸ​ລິນ​ທາ ຄ​ະ​ນະ​ພະ​ແນກ​ສາ​ທາ​ລະ​ນະ​ສຸກ​ແຂ​ວງ​ສາ​ລະ​ວັນ ໃຫ້​ສຳ​ພາດ​​ໃນ​ໂອ​ກາດ​ສື່​ມວນ​ຊົນ​ຈາກ​ສູນ​ກາງເຄື່ອນ​ໄຫວ​ເກັບ​ກຳ​​ຂໍ້​ມູນ​ກ່ຽວ​ກັບການ​ນຳ​ໃຊ້​ໂທ​ລະ​ໂຄ່ງ LCD ລຳ​ໂພງ ແລະວຽກ​ງານ​ສັກ​ວັກ​ຊີນ​​ປ້ອງ​ກັນ​ໂຄວິດ-19 ​ຊຶ່ງນຳ​ພາ​ໂດຍສູນສື່ສານເພື່ອສຸຂະພາບ ແລະສຸຂະສຶກສາກະຊວງສາທາລະນະສຸກໂດຍການສະໜັບສະໜູນຂອງອົງການຢູນີເ​ຊັບ ໃຫ້​ຮູ້​ວ່າ​: ແຂວງ​​ສາ​ລະ​ວັນໄດ້​ເລີ່ມຈັດຕັ້ງປະຕິບັດການ​ສັກ​ວັກ​ຊີນ​ປ້ອງ​ກັນ​ໂຄວິດ-19 ນັບ​ແຕ່ວັນທີ 9 ມີນາ 2021 ມາຮອດປະຈຸບັນເຫັນວ່າ ປະຊາຊົນເປົ້າໝາຍນັບແຕ່ອາຍຸ 6 ປີຂຶ້ນໄປໄດ້ເຂົ້າມາຮັບວັກຊີນຢ່າງຕໍ່ເນື່ອງໂດຍເລີ່ມຕົ້ນແມ່ນນຳໃຊ້ວັກຊີນ Sinopharm, Sinovac, Johnson&Johnson, AstraZenica  ແລະ Pfizer ຊຶ່ງໄດ້ເປີດຈຸດບໍລິການຢູ່ໂຮງໝໍແຂວງ, ໂຮງໝໍເມືອງ, ໂຮງໝໍນ້ອຍ ແລະເຄື່ອນທີ່ລົງໄປສັກແຕ່ລະບ້ານ ນອກນັ້ນຍັງໄດ້ເຄື່ອນໄຫວບໍລິການຕາມສະຖານທີ່ຊຸມຊົນເປັນຕົ້ນຕະຫຼາດ, ບັນດາໂຮງຮຽນປະຖົມ ມັດທະຍົມ ແລະຈຸດ​ຊຸມ​ຊົນ​ຕ່າງໆ ຫຼ້າສຸດນີ້ ແມ່ນໄດ້ບໍລິການກວດລ້າງສັກຕາມຫ້ອງການ, ສຳນັກງານ ພະແນກການຕ່າງໆ ອ້ອມຂ້າງແຂວງ ແລະເມືອງ ໂດຍເລັ່ງໃສ່ສັກວັກຊີນ Pfizer ເປັນເຂັມກະຕຸ້ນ ເຮັດ​ໃຫ້ອັດຕາການສັກວັກຊີນທົ່ວ​ແຂວງສາລະວັນ ເຂັມ 1 ກວມເອົາ  80%, ເຂັມ 2 ໄດ້ 66,6%, ສຳລັບເຂັມກະຕຸ້ນທີ1 ຍັງຢູ່ 26 % ແລະເຂັມກະຕຸ້ນ ​ທີ 2 ​ໄດ້ 4%.

ເພື່ອ​ບັນ​ລຸ​ຕາມ​ຕົວ​ເລກ​ຄາດ​ໝາຍໃນ​ການ​ສັກ​ວັກ​ຊີນ​ປ້ອງ​ກັນ​ໂຄວິດ-19 ທາງ​ແຂວງ​ຈະ​ໄດ້​ສືບ​ຕໍ່​ເອົາ​ໃຈໃສ່ປຸກລະດົມ​ປະ​ຊ​າ​ຊົນ​ກຸ່ມເປົ້າໝາຍໃຫ້ໄດ້ສັກວັກຊີນເຂັມກະຕຸ້ນ ໂດຍສະເພາະກະຕຸ້ນເຂັມ 1 ແລະກະຕຸ້ນເຂັມ 2 ໃຫ້ໄດ້ຫຼາຍຂຶ້ນເອົາວັກຊີນກັນພະຍາດໂຄວິດລົງໄປບໍລິການພ້ອມກັບການປະຕິບັດກິດຈະກຳເຊື່ອມສານວຽກງານສັກຢາປົກກະຕິເຮັດການເດີນສຳຫຼວດບັດສັກຢາວັກຊີນໂຄວິດແຕ່ລະຫຼັງຄາເຮືອນໂດຍສະເພາະຜູ້ສູງອາຍຸຢູ່ໃນບ້ານລົງເຄື່ອນທີ່ບໍລິການຢູ່ຈຸດຊຸມຊົນ, ຕະຫຼາດ, ຫ້າງຮ້ານ, ໂຮງຈັກ, ໂຮງງານ, ຫ້ອງການ, ສຳນັກງານ, ອົງການເພື່ອໃຫ້ເປົ້າໝາຍໄດ້ຮັບວັກຊີນເຂັມກະຕຸ້ນໃຫ້ຄົບສົມທັບກັບພາກສ່ວນສຶກສາເພື່ອສັກວັກຊີນໂຄວິດໃຫ້ນັກຮຽນ ຕາມໂຮງຮຽນປະຖົມມັດທະຍົມ.

​ທ່ານ ດ​ຣ ດາວ​ວົງ ສຸ​ລິນ​ທາ ກ່າວ​ຕື່ມ​ວ່າ: ສຳ​ລັບອຸ​ປະ​ກອນທີ່​ປະ​ກອບ​ສ່ວ​ນ​ເຂົ້າ​ໃນ​ການ​ໂຄ​ສະ​ນາແມ່ນ​ໄດ້​ຮັບ​ການ​ຊ່ວ​ຍ​ເຫຼືອ​ຈາກ​ອົງ​ການ ຢູ​ນີ​ເຊັບ ມີ: ໂທລະໂຄ່ງ  10 ຊຸດ  ແຈກຢາຍໃຫ້ 4 ເມືອງຄື: ​ເມືອງຄົງເຊໂດນ, ລະຄອນເພັງ, ຕຸ້ມລານ ແລະ​ເມືອງສະໝ້ວຍ, ສ່ວນຕູ້ລຳໂພງ 10 ໜ່ວຍ ແຈກຢາຍໃຫ້ 7 ເມືອງ ແລະແອວຊີດີ 10 ຊຸດ  ແຈກຢາຍໃຫ້ 8 ເມືອງໆ (ລະ 1 ຊຸດ ຢູ່ພະແນກ 2 ຊຸດ) ຊຶ່ງ​ທາງ​ແຂວງ​ພວກ​ເຮົາ​ຕ້ອງ​ຂໍ​ຂອບ​ໃຈ​ຕໍ່​ການ​ຊ່ວຍ​ເຫຼືອ​ຈາກ​ອົງ​ການ​ຢູ​ນີ​ເຊັບໂດຍຈະ​ໄດ້​ໃຫ​ເກີດ​ປະ​ສິດ​ທິ​ຜົນ​ສູງ​ສຸດ ແລະຫ​ວັງ​ວ່າ​ທາງ​ອົງ​ການ​ຢູ​ນີ​ເຊັບ​ຈະ​ສືບ​ຕໍ່​ໃຫ້​ການ​ຊ່ວຍ​ເຫຼືອອີກ​ໃນ​ຕໍ່​ໜ້າ.

แชร์