ກຕສ ສ້າງຄວາມເຂົ້າໃຈ ກ່ຽວກັບວຽກງານຂໍ້ມູນສິນເຊື່ອ

ໃນວັນທີ 12 ກັນຍາ 2022 ທີ່ກະຊວງເຕັກໂນໂລຊີ ແລະການສື່ສານ (ກຕສ) ຮ່ວມກັບບໍລິສັດ ຂໍ້ມູນຂ່າວສານສິນເຊື່ອ ແຫ່ງ ສປປ ລາວ ໄດ້ຈັດກອງປະຊຸມເຜີຍແຜ່ດໍາລັດ ສະບັບເລກທີ 224/ລບ, ລົງວັນທີ 19 ກໍລະກົດ 2019; ລະບຽບ ກ່ຽວກັບວຽກງານຂໍ້ມູນສິນເຊື່ອ ແລະ ນິຕິກຳອື່ນທີ່ກ່ຽວຂ້ອງ, ໄດ້ເຂົ້າໃຈ ແລະໃຫ້ການຮ່ວມມື ເພື່ອປະຕິບັດຕາມຄໍາສັ່ງຂອງລັດຖະບານກໍຄືພັດທະນາວຽກງານຂໍ້ມູນຂ່າວສານສິນເຊື່ອໃຫ້ສາມາດປະກອບສ່ວນເຂົ້າໃນວຽກງານການສົ່ງເສີມການເຂົ້າເຖິງແຫຼ່ງທຶນ ຢ່າງມີຄຸນນະພາບ ແລະສາມາດປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໃຫ້ປາກົດຜົນເປັນຈິງ.

ໂອກາດນີ້, ທ່ານ ວະລະໄຊ ດາລາລອຍ ຮອງຫົວໜ້າຫ້ອງການ ກຕສ ໄດ້ກ່າວວ່າ: ວຽກງານຂໍ້ມູນຂ່າວສານສິນເຊື່ອອາດຈະເປັນວຽກງານທີ່ໃໝ່ສໍາລັບບາງທ່ານແຕ່ຄວາມຈິງວຽກງານດັ່ງກ່າວ ແມ່ນໄດ້ຮັບການສ້າງຕັ້ງຂຶ້ນມາເປັນເວລາຫລາຍປີເລີ່ມຈາກຮູບແບບປະຖົມປະຖານ ຈົນມາເຖິງປັດຈຸບັນແມ່ນໄດ້ມີການນໍາໃຊ້ເຕັກນິກທີ່ທັນສະໄໝ ກໍຄືລະບົບຂໍ້ມູນຂ່າວສານສິນເຊື່ອ ທີ່ໄດ້ນໍາໃຊ້ເກັບກໍາ ແລະໃຫ້ບໍລິການຂໍ້ມູນຂ່າວສານສິນເຊື່ອແບບທັນທີ (ອອນລາຍ) ຊຶ່ງຂໍ້ມູນຂ່າວສານສິນເຊື່ອຕົ້ນຕໍ ແມ່ນຮັບໃຊ້ໃຫ້ແກ່ບັນດາສະຖາບັນການເງິນ ໃນເວລາກ່ອນອະນຸມັດເງິນກູ້ຕ້ອງໄດ້ເຂົ້າຄົ້ນຫາຂໍ້ມູນຜູ້ໃຊ້ໃນລະບົບ ເພື່ອເບິ່ງວ່າລູກຄ້າຜູ້ນັ້ນມີປະຫວັດການເຄື່ອນໄຫວເງິນກູ້ກໍຄືການກູ້ຢືມ ແລະ ການຊໍາລະແນວໃດ, ປັດຈຸບັນເຄື່ອນໄຫວເງິນກູ້ ກັບສະຖາບັນການເງິນໃດແນ່ ເພື່ອເປັນບ່ອນອີງໃນການພິຈາລະນາປ່ອຍເງິນກູ້ຂອງຕົນ ແລະກໍຍັງສາມາດນໍາໃຊ້ເຂົ້າໃນການທົບທວນ, ປັບໂຄງສ້າງໜີ້, ແຈ້ງເຕືອນເງິນກູ້ທີ່ມີຄວາມສ່ຽງ, ກໍານົດຜະລິດຕະພັນ, ການຕະຫລາດຂອງຕົນ ແລະ ນໍາໃຊ້ຂໍ້ມູນຂ່າວສານສິນເຊື່ອເຂົ້າໃນວຽກງານອື່ນໆ ເປັນ ຕົ້ນ ແມ່ນການສະໜອງຂໍ້ມູນໃຫ້ແກ່ພາກລັດ ແລະ ສົ່ງເສີມ ໃຫ້ສັງຄົມມີວິໄນທາງດ້ານການເງິນ.

ນອກຈາກວຽກງານຂໍ້ມູນຂ່າວສານສິນເຊື່ອຈະໄດ້ເກັບກໍາຂໍ້ມູນກັບບັນດາສະມາຊິກກໍຄືສະຖາບັນການເງິນແລ້ວວຽກງານດັ່ງກ່າວກໍຍັງຕິດພັນກັບຫລາຍພາກສ່ວນທັງພາກລັດ ແລະ ເອກະຊົນ ກໍຄືບັນດາກະຊວງ ແລະ ບໍລິສັດ ສາທາລະນຸປະໂພກ ໃນການເກັບກໍາຂໍ້ມູນທີ່ກ່ຽວຂ້ອງເພື່ອນໍາມາພັດທະນາວຽກງານຂໍ້ມູນຂ່າວສານສິນເຊື່ອ ໃຫ້ມີຄວາມຄົບຖ້ວນສົມບູນ ແລະມີຄຸນະພາບໂດຍອີງຕາມການປັບປຸງກົນໄກການອໍານວຍຄວາມສະດວກໃນການດໍາເນີນທຸລະກິດໃນ ສປປປ ລາວ ຕາມຄໍາສັ່ງ ເລກທີ 02/ນຍ ແລະ ການປະເມີນຂອງທະນາຄານໂລກ ຊຶ່ງຕິດພັນກັບການເກັບກຳຂໍ້ມູນ ແລະ ສ້າງຜະລິດຕະພັນໃໝ່ໆ. ເນື່ອງຈາກປັດຈຸບັນບໍລິສັດຂໍ້ມູນຂ່າວສານສິນເຊື່ອ ແຫ່ງ ສປປ ລາວ ໄດ້ຮັບຂໍ້ມູນຂາເຂົ້າພຽງແຕ່ຈາກສະມາຊິກກໍຄືທະນາຄານ ແລະສະຖາບັນການເງິນຈຸລະພາກເທົ່ານັ້ນຈຶ່ງເຮັດໃຫ້ຂໍ້ມູນບໍ່ມີຄຸນນະພາບເທົ່າທີ່ຄວນ. ສະນັ້ນ, ຈຶ່ງຕ້ອງການຂໍ້ມູນຈາກພາກສ່ວນອື່ນເພື່ອນໍາໃຊ້ເຂົ້າໃນການກວດສອບຄວາມຖືກຕ້ອງຂອງຂໍ້ມູນທີ່ໄດ້ຈາກສະມາຊິກ, ລະບຸຕົວຕົນຂອງລູກຄ້າບຸກຄົນ, ນິຕິບຸກຄົນທີ່ມີການເຄື່ອນໄຫວສິນເຊື່ອນຳທະນາຄານທຸລະກິດ, ສະຖາບັນການເງິນຈຸລະພາກ ແລະໃຊ້ເຂົ້າໃນການພັດທະນາຜະລິດຕະພັນໃໝ່.

ກຕສ ທີ່ເປັນຜູ້ຄຸ້ມຄອງບັນດາບໍລິສັດໂທລະຄົມມະນາຄົມ ຢູ່ ສປປ ລາວ ທີ່ ບໍລິສັດຂໍ້ມູນຂ່າວສານສິນເຊື່ອ ແຫ່ງ ສປປ ລາວ ຕ້ອງການຂໍ້ມູນການຊໍາລະຄ່າສາທາລະນຸປະໂພກ ກໍຄື ຄ່າໂທລະສັບເພື່ອເຮັດໃຫ້ເຫັນພຶດຕິກໍາການຊໍາລະຂອງບຸກຄົນ ແລະ ນິຕິບຸກຄົນ ໃນການກະຕຸກຊຸກຍູ້ໃຫ້ແກ່ບັນດາບຸກຄົນ ແລະວິສາຫະກິດຢູ່ ສປປ ລາວ ມີຄວາມຕື່ນຕົວໃນການຊຳລະໜີ້ສິນຄ່າໃຊ້ຈ່າຍໂທລະສັບຕົວຈິງຂອງຕົນເອງຕໍ່ພັນທະທີ່ຕົນເອງນຳໃຊ້ແທ້, ສ້າງວິໄນໃຫ້ແກ່ປະຊາຊົນລາວມີຄວາມຮັບຜິດຊອບສູງຕໍ່ໜີ້ສິນຕ່າງໆ.

แชร์