ຮອງນາຍົກລັດຖະມົນຕີ ຕ້ອນຮັບທູດມາເລເຊຍ ເຂົ້າຢ້ຽມອຳລາ

ໃນວັນທີ 12 ກັນຍາ 2022, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອຳລາ ຂອງທ່ານ ໂມດ ໄອນີ ບິນ ອາຕັນ, (Mr. Mohd Aini Bin Atan) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ມາເລເຊຍ ປະຈຳ ສປປ ລາວ ໃນໂອກາດທີ່ສຳເລັດການປະຕິບັດໜ້າທີ່ການທູດຢູ່ ສປປ ລາວ ເປັນເວລາ 5 ປີກວ່າ.

ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດໄດ້ສະແດງຄວາມຊົມເຊີຍຕໍ່ຜົນສຳເລັດໃນການປະຕິບັດໜ້າທີ່ການທູດຂອງ ທ່ານ ໂມດ ໄອນີ ບິນ ອາຕັນ ຊຶ່ງຕະຫຼອດໄລຍະ 5 ປີກວ່າຜ່ານມາທີ່ໄດ້ເຄື່ອນໄຫວຢ່າງຫ້າວຫັນໃນການສະໜັບສະໜູນ ແລະ ປະກອບສ່ວນອັນສຳຄັນໃຫ້ແກ່ການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ສປປ ລາວ ແລະມາເລເຊຍ. ພ້ອມນັ້ນ, ທ່ານຮອງນາຍົກລັດຖະມົນຕີ ຍັງໄດ້ສະແດງຄວາມຂອບໃຈຜ່ານທ່ານທູດໄປຍັງລັດຖະບານ ແລະປະຊາຊົນມາເລເຊຍທີ່ໄດ້ປະກອບສ່ວນສະໜັບສະໜູນວັກຊີນປ້ອງກັນພະຍາດໂຄວິດ-19 ໃຫ້ແກ່ ສປປ ລາວ ຈໍານວນ 2 ຄັ້ງ ລວມເປັນຈໍານວນ 783.400 ໂດສ໌ ເຂົ້າໃນການປ້ອງກັນ ແລະຄວບຄຸມການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ກໍຄືປະກອບສ່ວນໃນການຟື້ນຟູເສດຖະກິດ-ສັງຄົມ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດດັ່ງກ່າວ. ນອກນີ້, ທ່ານທູດ ຍັງໄດ້ຊ່ວຍຊຸກຍູ້ໃຫ້ມີແລກປ່ຽນການຢ້ຽມຢາມຂອງບັນດາການນຳຂັ້ນສູງຫລາຍຄະນະລວມເຖິງຊຸກຍູ້ໃຫ້ມີການຮ່ວມມືການເຊື່ອມຈອດ ຕາຂ່າຍໄຟຟ້າລະຫວ່າງ ລາວ-ມາເລເຊ ແລະສິງກະໂປ, ຊຸກຍູ້ການຮ່ວມມືດ້ານເສດຖະກິດ, ການຄ້າ ແລະການລົງທຶນ, ການພັດທະນາຊັບພະຍາກອນມະນຸດ, ການທ່ອງທ່ຽວ, ວັດທະນະທຳ ແລະອື່ນໆ ເຊິ່ງເປັນການປະກອບສ່ວນອັນສຳຄັນເຂົ້າໃນການປະຕິບັດແຜນພັດທະນາເສດຖະກິດ-ສັງຄົມ ຂອງ ສປປ ລາວ. ພ້ອມນັ້ນ, ທ່ານຮອງນາຍົກລັດຖະມົນຕີຍັງໄດ້ອວຍພອນໃຫ້ແກ່ທ່ານທູດຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະປະສົບຜົນສຳເລັດໃນໜ້າທີ່ວຽກງານໃໝ່.

ທ່ານ ໂມດ ໄອນີ ບິນ ອາຕັນ ໄດ້ສະແດງຄວາມຂອບໃຈຕໍ່ລັດຖະບານລາວໂດຍສະເພາະກະຊວງການຕ່າງປະເທດທີ່ໄດ້ເອົາໃຈໃສ່ ແລະໃຫ້ການຮ່ວມມືຊ່ວຍເຫລືອໃນການປະຕິບັດໜ້າທີ່ການທູດຂອງຕົນຕະຫລອດໄລຍະເວລາ 5 ປີກວ່າຜ່ານມາ ແລະ ຫວັງວ່າລັດຖະບານລາວຈະສືບຕໍ່ໃຫ້ການຮ່ວມມືຕໍ່ທ່ານທູດຜູ້ທີ່ຈະມາຮັບໜ້າທີ່ຕໍ່ໄປ ເພື່ອພ້ອມກັນສືບຕໍ່ພັດທະນາສາຍພົວພັນມິດຕະພາບ ແລະການຮ່ວມມືອັນດີງາມລະຫວ່າງສອງປະເທດທີ່ມີມາແລ້ວນັ້ນໃຫ້ສືບຕໍ່ຂະຫຍາຍຕົວຍິ່ງໆຂຶ້ນ.
ຂ່າວ: ສຸກສະຫວັດ

แชร์