ສຶກສາສໍາຫລວດຄວາມເປັນໄປໄດ້ການພັດທະນາໂຄງການໄຟຟ້າພະລັງງານລົມ

ໃນວັນທີ 9 ກັນຍາ 2022 ທີ່ກະຊວງແຜນການ ແລະການລົງທຶນ, ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາ, ສໍາຫຼວດຄວາມເປັນໄປໄດ້ໃນການພັດທະນາໂຄງການໄຟຟ້າພະລັງງານລົມ ຢູ່ເຂດຈຸດສຸມລາໂກ ເມືອງເຊໂປນ ແຂວງສະຫວັນນະເຂດ ລະຫວ່າງລັດຖະບານແຫ່ງ ສປປ ລາວ ແລະບໍລິສັດສະຫວັນວາຍຸ ພະລັງງານສະອາດ ຈໍາກັດ ຮ່ວມກັບ ບໍລິສັດ ເອວເອັມທີລາວ ຈໍາກັດ ໂດຍການຮ່ວມລົງນາມລະຫວ່າງທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນການ ແລະການລົງທຶນກັບຜູ້ຕາງໜ້າຈາກບໍລິສັດ ສະຫວັນວາຍຸພະລັງງານສະອາດ ຈໍາກັດ ແລະຜູ້ຕາງໜ້າຈາກບໍລິສັດ ເອວເອັມທີລາວ ຈໍາກັດ ໂດຍມີພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.

ການພັດທະນາ ໂຄງການໄຟຟ້າພະລັງງານລົມຢູ່ເຂດຈຸດສຸມລາໂກເມືອງເຊໂປນ ແຂວງສະຫວັນນະເຂດ ມີເນື້ອທີ່ທັງໝົດ 28.513 ເຮັກຕາ, ມີກໍາລັງຕິດຕັ້ງການຜະລິດ 1.200 ເມກາວັດ ແລະຄາດຄະເນມູນຄ່າການກໍ່ສ້າງປະມານ 2.159 ລ້ານໂດລາສະຫະລັດ, ຄາດວ່າຈະກໍ່ສ້າງສໍາເລັດ ແລະເລີ່ມດໍາເນີນການຜະລິດໃນທ້າຍປີ 2025 ເພື່ອໃຫ້ໄດ້ນໍາໃຊ້ທັງພາຍໃນ ແລະສົ່ງອອກຕ່າງປະເທດ ໂດຍສະເພາະແມ່ນ ສສ ຫວຽດນາມ.

ການຈັດຕັ້ງປະຕິບັດບົດບັນທຶກຄວາມເຂົ້າໃຈໃນຄັ້ງນີ້, ແມ່ນການຮ່ວມມືໃນຂະແໜງການພະລັງງານກັບ ສສ ຫວຽດນາມ ທີ່ເຊັນຮ່ວມກັນ ໃນປີ 2016 ວ່າດ້ວຍການຮ່ວມມືເພື່ອພັດທະນາໂຄງການໄຟຟ້າຢູ່ ສປປ ລາວ, ເປັນການເຊື່ອມຕໍ່ລະບົບສາຍສົ່ງ ແລະການຊື້-ຂາຍ ພະລັງງານລະຫວ່າງສອງປະເທດ ນັບແຕ່ປີ 2020-2030 ຊຶ່ງຜູ້ພັດທະນາໂຄງການໄດ້ເລີ່ມສຶກສາຂໍ້ມູນເບື້ອງຕົ້ນກ່ຽວກັບໂຄງການໄຟຟ້າພະລັງງານລົມນັບແຕ່ກາງປີ 2021 ເປັນຕົ້ນມາເຫັນວ່າມີທ່າແຮງສູງໃນການພັດທະນາທຸລະກິດດ້ານພະລັງງານ.
ຂ່າວ-ພາບ: ກິດຕາ

แชร์