ອັດຕະປື ເປີດງານວາງສະແດງສິນຄ້າສະຫຼອງປີສາມັກຄີ ລາວ-ຫວຽດນາມ

ວັນທີ 9 ກັນຍາ ທີ່ຜ່ານມາ ແຂວງອັດຕະປື ໄດ້ເປີດງານວາງສະແດງ ແລະຈໍາໜ່າຍສິນຄ້າ ເພື່ອສະເຫລີມສະຫຼອງປີສາມັກຄີມິດຕະພາບລາວ-ຫວຽດນາມ, ສິນຄ້າທີ່ນໍາມາວາງສະແດງໃນຄັ້ງນີ້ສ່ວນໃຫຍ່ກໍລ້ວນແຕ່ເປັນສິນຄ້າທີ່ເປັນທ່າແຮງຂອງ ສປປ ລາວ ໂດຍສະເພາະແມ່ນສິນຄ້າ ODOP ໜຶ່ງເມືອງໜຶ່ງຜະລິດຕະພັນຂອງບັນດາແຂວງ ແລະຜະລິດຕະພັນຂອງແຂວງອັດຕະປືມີເຄື່ອງອຸປະໂພກ-ບໍລິໂພກ, ເສື້ອຜ້າ, ສິນຄ້າຫັດຖະກຳ, ເຄື່ອງແກະ ສະຫຼັກ, ເຄື່ອງເຟີນີເຈີໄມ້, ສິນຄ້າກະສິກໍາ ແລະອື່ນໆ. ພິເສດໃນແຕ່ລະຄືນຈະມີການສະແດງສິລະປະວັນນະຄະດີຈາກກອງສິນລະປະແຂວງອັດຕະປື ແລະສິນລະປະຈາກແຂວງກອນຕູມ ສສ ຫວຽດນາມ.
ເປັນກຽດເຂົ້າຮ່ວມໂດຍ ທ່ານ ເລັດ ໄຊຍະພອນ ກໍາມະການສູນກາງພັກ ເລຂາພັກແຂວງເຈົ້າແຂວງແຂວງອັດຕະປື, ພ້ອມນີ້ຍັງມີການນຳຈາກບັນດາແຂວງອ້ອມຂ້າງ ຄື້: ແຂວງເຊກອງ, ສາລະວັນ, ແຂວງຈໍາປາສັກ, ມີຕາງໜ້າຄະນະສະມາຄົມຫວຽດນາມ, ສະມາຄົມພາກທຸລະກິດຫວຽດນາມທີ່ເຄື່ອນໄຫວຢູ່ແຂວງອັດຕະປື ແລະ ຂະແໜງການກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື, ຫົວໜ້າຄະນະຈັດງານວາງສະແດງສິນຄ້າໄດ້ລາຍງານວ່າ: ການຈັດງານຄັ້ງນີ້ແມ່ນມີຄວາມໝາຍຄວາມສຳຄັນ ໃນການສົ່ງເສີມຜູ້ປະກອບການ ເພື່ອເພີ່ມສ່ອງທາງການຕະຫລາດ ໃຫ້ຜະລິດຕະພັນກະສິກໍາ ແລະ ຫັດຖະກຳໃນດ້ານເສດຖະກິດ, ການຄ້າ ແລະການທ່ອງທ່ຽວ ມີໂອກາດເຈລະຈາການຄ້າກັບນັກທຸລະກິດ ລວມເຖິງຮຽນຮູ້ການພັດທະນາຄຸນນະພາບມາດຕະຖານຂອງສິນຄ້າ ໃຫ້ເປັນທີ່ຍອມຮັບ ໂດຍສະເພາະແຂວງອັດຕະປື ກັບ ແຂວງອ້ອມຂ້າງ ແລະ ບັນດາແຂວງຂອງ ສສ ຫວຽດນາມ, ແນ່ໃສ່ສ້າງເງື່ອນໄຂໃຫ້ຜູ້ຜະລິດ, ຜູ້ຈຳໜ່າຍໄດ້ນຳເອົາສິນຄ້າຂອງຕົນມາຈຳໜ່າຍ ແລະ ນຳມາໂຄສະນາ ເຊິ່ງສະແດງເຖິງການຍົກລະດັບສີມືພູມປັນຍາ ແລະເປັນສັນຍາລັກຂອງກຸ່ມຊາວບ້ານ; ພ້ອມດຽວກັນນີ້ ກໍເປັນການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ IX (2021-2025) ຂອງແຂວງອັດຕະປືໃຫ້ບັນລຸຕາມແຜນງານ-ແຜນການ ແລະເລັງໃສ່ຍົກສູງກໍາລັງແຮງພັດທະນາແຂວງອັດຕະປື ໃຫ້ຫລຸດພົ້ນອອກຈາກຄວາມທຸກຍາກ, ຮັບປະ ກັນການຜະລິດກະສິກຳສະອາດປອດສານພິດຕາມທິດສີຂຽວ ແລະຍືນຍົງ.

ງານວາງສະແດງສິນຄ້າທີ່ຄັ້ງນີ້ມີທັງໝົດ 92 ຫ້ອງ; ໃນນີ້, ສິນຄ້າຈາກ ສສ ຫວຽດນາມ 5 ຫ້ອງ (ແຂວງກອນຕູມ 4 ຫ້ອງ, ນະຄອນດານັງ 1 ຫ້ອງ), ຕ່າງແຂວງ ມີ 13 ຫ້ອງ ຈາກ 7 ແຂວງ (ນະຄອນຫລວງວຽງຈັນ, ແຂວງສະຫວັນນະເຂດ, ແຂວງວຽງຈັນ, ແຂວງຫລວງພະບາງ, ແຂວງຈໍາປາສັກ, ແຂວງສາລະວັນ ແລະແຂວງເຊກອງ); ພາຍໃນແຂວງອັດປືຈາກ 5 ເມືອງ 12 ຫ້ອງ, ບັນດາພະແນກການ-ຫົວໜ່ວຍທຸລະກິດ 62 ຫ້ອງ; ຈຸດປະສົງຂອງການຈັດງານກໍເພື່ອສະເຫລີມສະ ຫລອງ “ປີສາມັກຄີມິດຕະພາບ ລາວ-ຫວຽດນາມ 2022 ຄື: ວັນເຊັນສັນຍາມິດຕະພາບ-ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ເພື່ອເປັນການເສີມຂະຫຍາຍນະໂຍບາຍການເຊື່ອມໂຍງດ້ານການຄ້າ, ການລົງທຶນ ແລະການທ່ອງທ່ຽວ, ທັງເປັນການສົ່ງເສີມສີມື-ພູມປັນຍາຂອງຊາວບ້ານ, ກຸ່ມຜູ້ຜະລິດ ແລະປຸງແຕ່ງສິນຄ້າໃຫ້ກ້າວເຂົ້າສູ່ປະຊາຄົມເສດຖະກິດອາຊຽນ ແລະກ້າວສູ່ມາດຕະຖານສາກົນເທື່ອລະກ້າວ.
ຂ່າວ: ສອນ ໂຄສະນາອົບຮົມແຂວງ

แชร์