ບໍລິຄຳໄຊ ສະຫລອງສອງວັນປະຫວັດສາດ ລາວ-ຫວຽດນາມ

ແຂວງບໍລິຄຳໄຊ ຈັດພິທີສະເຫລີມສະຫຼອງວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະວັນເຊັນສົນທິສັນຍາມິດຕະພາບ ແລະການຮ່ວມມືລາວ-ຫວຽດນາມ ຄົບຮອບ 45 ປີ ໃນວັນທີ 8 ກັນຍາ 2022 ໂດຍມີ ທ່ານ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງ, ເຈົ້າແຂວງບໍລິຄຳໄຊ, ທ່ານ ຮວ່າງຈຸງ ຢູງ ກໍາມະການຄະນະບໍລິຫານງານສູນກາງພັກກອມມູນິດຫວຽດນາມ, ເລຂາພັກແຂວງ, ປະທານສະພາປະຊາຊົນແຂວງ, ຫົວໜ້າຄະນະຜູ້ແທນສະພາແຫ່ງຊາດ ປະຈໍາແຂວງຮ່າຕິງ, ທ່ານ ຮວ່າງເຫງຍຫຽວ ຮອງເລຂາພັກແຂວງ, ຮອງປະທານຄະນະກໍາມະການປະຊາຊົນແຂວງເຫງະອານ,ມີທ່ານ ບົວເງິນ ຊາພູວົງ ຮອງປະທານສະມາຄົມມິດຕະພາບລາວ-ຫວຽດນາມ ຂັ້ນສູນກາງ, ການນຳແຂວງບໍລິຄໍາໄຊ ແລະພາກສ່ວນກ່ຽວຂ້ອງເຂົ້າຮ່ວມ.

ໃນພິທີ, ທ່ານ ກອງແກ້ວ ໄຊສົງຄາມ ໄດ້ຍົກໃຫ້ເຫັນເຖິງສາຍພົວພັນອັນດູດດື່ມຫວ່າງສອງຊາດ, ປະຊາຊົນສອງປະເທດ ລາວ-ຫວຽດນາມ ອ້າຍນ້ອງ, ຄວາມສາມັກຄີແບບພິເສດ ແລະພົວພັນຮ່ວມມືຮອບດ້ານທີ່ຍາມໄດ້ກໍມີການພົວພັນຮ່ວມມື, ຊ່ວຍເຫລືອກັນ ຢ່າງສະໜິດແໜ້ນຍາກທີ່ຈະຕັດຂາດອອກຈາກກັນໄດ້, ເຂົ້າເມັດຫັກ, ຜັກເສັ່ນໜຶ່ງກໍບິແບ່ງກັນກິນ, ຕໍ່ສູ້ໃນຂຸມຄອງອັນດຽວກັນຕ້ານສັດຕູໂຕດຽວກັນ, ຜ່ານໄລຍະເວລາກວ່າເຄິ່ງສັດຕະວັດແຫ່ງການຮ່ວມສໍາພັນສູ້ຮົບມີໄຊນັ້ນຄວາມຜູກພັນດ້ວຍໄມຕີຈິດອັນດູດດື່ມ ແລະ ຄວາມຮັກແພງເຊື່ອໝັ້ນຖານອ້າຍນ້ອງທີ່ແທ້ຈິງ, ຄວາມສາມັກຄີແບບພິເສດຫາຍາກ ແບບໜຶ່ງບໍ່ມີສອງນັ້ນໄດ້ຜ່ານການທົດສອບນາໆປະການດ້ວຍເລືອດເນື້ອນັກຮົບ 2 ປະເທດຈົນນັບບໍ່ຖ້ວນຈົນກາຍເປັນມໍລະດົກລວມອັນລໍ້າຄ່າ, ເປັນກົດເກນແຫ່ງການຄົງຕົວ ແລະຂະຫຍາຍຕົວຂອງສອງປະເທດ ແລະອື່ນໆ.

ໂອກາດນີ້, ທ່ານເຈົ້າແຂວງບໍລິຄຳໄຊ ຍັງໃຫ້ຮູ້ອີກວ່າ: ໃນຂະບວນການສະເຫລີມສະຫລອງສອງວັນປະຫວັດສາດນີ້ ຫລືປີມິດຕະພາບ ລາວ-ຫວຽດນາມ ແລະ ຫວຽດນາມ-ລາວ ປີ 2022, ພວກເຮົາໄດ້ເຫັນເຖິງຄວາມກະຕືລືລົ້ນຂອງປະຊາຊົນຂອງສອງຊາດ ລາວ-ຫວຽດນາມ, ພວກເຮົາໄດ້ເຫັນເຖິງຫລາຍບົດເພງ, ບົດກາບກອນ, ບົດປະພັນ, ບົດສົນທະນາ, ບົດປາຖະກະຖາທີ່ເຕັມໄປດ້ວຍເນື້ອໃນອັນເລິກເຊິ່ງ, ເຕັມໄປດ້ວຍໄມຕີຈິດມິດຕະພາບທີ່ໄດ້ສະແດງອອກມາເຕີມເຕັມໃຫ້ແກ່ບັນດາບົດເພງ, ບົດປະພັນທີ່ເຄີຍມີມາເປັນເວລາຫລາຍສີບປີ, ໄດ້ມະໂນພາບເຖິງມິດຕະພາບອັນຍິ່ງໃຫຍ່, ຄວາມສາມັກຄີພິເສດທີ່ຫາຍາກຂອງສອງພັກ-ສອງລັດ ແລະ ປະຊາຊົນສອງຊາດເຮົາທີ່ມີຕໍ່ກັນນັ້ນ, ສິ່ງນີ້ມັນສະແດງອອກຢ່າງມີຊີວິດຊີວາຈາກສ່ວນເລິກຂອງວິນຍານ ຂອງປະຊາຊົນເຮົາຢ່າງແທ້ຈິງ.

ໂອກາດດຽວກັນ, ທ່ານ ຮວ່າງຈຸງຢູ່ງ ກໍໄດ້ຍົກໃຫ້ເຫັນສາຍພົວພັນຮ່ວມມື ແລະຄວາມສາມັກຄີແບບພິເສດທີ່ມີມາແຕ່ດົນນານ, ການກໍາເນີດ ແລະກາຍຂະຫຍາຍຕົວຂອງພັກກອມມິດອິນດູຈີນເຊິ່ງເປັນຕົ້ນກໍາເນີດຂອງພັກກອມມູນິດຫວຽດນາມ ແລະພັກປະຊາຊົນປະຕິວັດລາວ, ພາຍໃຕ້ການນໍາພາຂອງພັກກອມມູນິດອິນດູຈີນ, ຂະບວນການຕໍ່ສູ້ຂອງປະຊາຊົນສອງປະເທດໄດ້ແຜ່ຂະຍາຍອອກເປັນວົງກວ້າງ, ນໍ້າໃຈມິດສະຫາຍອ້າຍນ້ອງ ແລະຈິດໃຈແຫ່ງການປະຕິວັດອັນແຮງກ້າຂອງປະຊາຊົນສອງປະເທດ ໄດ້ຊ່ວຍໃຫ້ສອງຊາດພວກເຮົາຍາດໄດ້ອໍານາດມາສູ່ມືຂອງປະຊາຊົນສອງຊາດຫວຽດນາມ-ລາວອ້າຍນ້ອງ, ເມື່ອສອງປະເທດຍາດໄດ້ໄຊຊະນະຢ່າງສົມບູນ, ສາຍພົວພັນລະຫວ່າງສອງປະເທດໄດ້ກ່າວເຂົ້າສູ່ໜ້າປະຫວັດສາດອັນໃໝ່, ການຮ່ວມສໍາພັນສູ້ຮົບຕ້ານສັດຕູໂຕດຽວກັນ ໄດ້ກາຍມາເປັນການຮ່ວມມືຮອບດ້ານໃນທຸກຂົງເຂດ, ພາຍໃຕ້ການນໍາຂອງສອງພັກ, ປະຊາຊົນສອງປະເທດ ໄດ້ຂ້າມຜ່ານອຸປະສັກຄວາມຫຍຸ້ງຍາກ, ສິ່ງທ້າທາຍນາໆປະການ ແລະ ໄດ້ໃຫ້ການຊ່ວຍເຫລືອເຊິ່ງກັນ ແລະກັນໃນການປັບປຸງບູລະນະຜົນກະທົບຈາກສົງຄາມ, ພ້ອມກັນປົກປັກຮັກສາ ແລະສ້າງສາພັດທະນາປະເທດຊາດສັງຄົມນິຍົມ.

ພິທີ, ທ່ານເຈົ້າແຂວງບໍລິຄຳໄຊ ຍັງໄດ້ມອບໃບຍ້ອງຍໍຂອງແຂວງໃກ້ແກ່ກົມກອງ ແລະບຸກຄົນ ຂອງ ສສ ຫວຽດນາມ ທີ່ມີຜົນງານດີເດັນເຄື່ອນໄຫວວຽກງານການຕ່າງປະເທດ ໃນໄລຍະ 5 ປີ ຜ່ານມາ (2017-2022), ປະກອບມີ: ແຂວງຮ່າຕິງ ມີ 16 ກົມກອງ ແລະ 30 ທ່ານ; ແຂວງເຫງະອານ 9 ກົມກອງ ແລະ 6 ທ່ານ; ສະຖານກົງສຸນໃຫຍ່ຫວຽດນາມ ປະຈໍາແຂວງສະຫວັນນະເຂດ 1 ກົມກອງ ແລະ 4 ທ່ານ; ກອງບັນຊາການທະຫານເຂດ 4 ປະກອບມີ 2 ກົມກອງ ແລະ 2 ທ່ານ.
ຂ່າວ: ວຽງສະຫວັນ

แชร์