ບໍລິສັດ  ຂສລ ເຜີຍແຜ່ດໍາລັດແລະວຽກງານຂໍ້ມູນຂ່າວສານ

ກະຊວງການເງິນ ໄດ້ຮ່ວມກັບບໍລິສັດ ຂໍ້ມູນຂ່າວສານສິນເຊື່ອແຫ່ງ ສປປ ລາວ ຈັດກອງປະຊຸມເຜີຍແຜ່ດໍາລັດ ແລະ ວຽກງານຂໍ້ມູນຂ່າວສານສິນເຊື່ອຂຶ້ນໃນຕອນເຊົ້າຂອງວັນຈັນ,ວັນທີ 5 ກັນຍາ 2022 ທີ່ຫ້ອງປະຊຸມຊັ້ນ 2 ຕຶກອາກອນ,ກະຊວງການເງິນ ໂດຍການໃຫ້ກຽດເປັນປະທານຮ່ວມລະຫວ່າງ ທ່ານ ສົມຈິດ ຄໍາມຸງຄຸນຮອງຫົວໜ້າຫ້ອງການ,ກະຊວງການເງິນ ແລະທ່ານນາງ ວິນຄຳ ລຸນທອນ ຜູ້ອຳນວຍການໃຫຍ່ບໍລິສັດ ຂສລ ແລະ ມີບັນດາກົມພາຍໃນກະຊວງການເງິນ,ຕາງໜ້າຈາກທະນາຄານແຫ່ງ ສປປ ລາວ ແລະ ບໍລິສັດ ຂໍ້ມູນຂ່າວສານສິນເຊື່ອແຫ່ງ ສປປ ລາວ ເຂົ້າຮ່ວມທັງໝົດຈໍານວນ 60 ທ່ານ.

ຈຸດປະສົງຂອງກອງປະຊຸມແມ່ນຈັດຂຶ້ນເພື່ອເຜີຍແຜ່ດໍາລັດ ແລະ ວຽກງານຂໍ້ມູນຂ່າວສານສິນເຊື່ອ ໃຫ້ບັນດາພາກສ່ວນຕ່າງໆທີ່ກ່ຽວຂ້ອງກັບວຽກງານຂໍ້ມູນຂ່າວສານສິນເຊື່ອໄດ້ຮັບຮູ້ເຂົ້າໃຈ ຄວາມສໍາຄັນຈໍາເປັນ ທີ່ຕ້ອງໄດ້ເກັບກໍາຂໍ້ມູນ ແລະ ພັດທະນາວຽກງານຂໍ້ມູນຂ່າວສານສິນເຊື່ອ ຂອງສປປ ລາວ ເພື່ອໃຫ້ສາມາດຕອບສະໜອງຂໍ້ມູນທີ່ຄົບຖ້ວນ,ມີຄຸນນະພາບ ແລະ ຫຼາກຫຼາຍ ໃຫ້ແກ່ບັນດາສະຖາບັນການເງິນ, ພາກລັດ ແລະ ສັງຄົມເພື່ອນໍາໃຊ້ເຂົ້າໃນວຽກງານຕ່າງໆຢ່າງມີປະສິດທິພາບ.

ໃນກອງປະຊຸມດັ່ງກ່າວ ຕາງໜ້າຈາກທະນາຄານແຫ່ງ ສປປ ລາວ ໄດ້ນໍາສະເໜີດໍາລັດວ່າດ້ວຍວຽກງານຂໍ້ມູນຂ່າວສານສິນເຊື່ອ ສະບັບເລກທີ 224/ລບ, ລົງວັນທີ 19 ກໍລະກົດ 2019.

ຈາກນັ້ນ,ທ່ານ ນາງ ເພັດລໍາພອນ ຄ້ານໍເພັດ ຮອງຜູ້ອໍານວຍການ ບໍລິສັດ ຂສລ ກໍໄດ້ນໍາສະເໜີ ຄວາມເປັນມາ, ພາລະບົດບາດ ແລະ ຄວາມສໍາຄັນຂອງວຽກງານຂໍ້ມູນຂ່າວສານສິນເຊື່ອ ໂດຍສະເພາະແມ່ນຄວາມສໍາຄັນໃນການເກັບກໍາຂໍ້ມູນຈາກພາກສ່ວນກ່ຽວຂ້ອງ ເພື່ອເປັນການຈັດຕັ້ງປະຕິບັດຕາມ ດໍາລັດວ່າດ້ວຍວຽກງານຂໍ້ມູນຂ່າວສານສິນເຊື່ອ,ຄໍາສັ່ງຂອງນາຍົກລັດຖະ ມົນຕີສະບັບເລກທີ 02/ນຍ ແລະ ການປະເມີນຂອງທະນາຄານໂລກ ກ່ຽວກັບສະພາບການດໍາເນີນທຸລະກິດຢູ່ ສປປ ລາວ ເຊິ່ງພາລະບົດບາດຂອງບໍລິສັດ ຂໍ້ມູນຂ່າວສານສິນເຊື່ອແຫ່ງ ສປປ ລາວ ແມ່ນເຮັດໜ້າທີ່ໃນການເກັບກໍາຂໍ້ມູນຈາກພາກສ່ວນຕ່າງໆ ທັງອົງການຈັດຕັ້ງລັດ ແລະ ບໍລິສັດ ສາທາລະນຸປະໂພກ.ພ້ອມດຽວກັນນັ້ນ, ກໍຕ້ອງດໍາເນີນການຄົ້ນຄວ້າສ້າງຜະລິດຕະພັນທີ່ຫຼາກຫຼາຍຮັບໃຊ້ສັງຄົມ.

ສະນັ້ນ, ເພື່ອປະຕິບັດຕາມຄໍາສັ່ງ, ລະບຽບການກ່ຽວຂ້ອງ ແລະ ເພື່ອພັດທະນາວຽກງານຂໍ້ມູນຂ່າວສານສິນເຊື່ອ ບໍລິສັດ ຂໍ້ມູນຂ່າວສານສິນເຊື່ອແຫ່ງ ສປປ ລາວ ຈຶ່ງມີຄວາມຈໍາເປັນຕ້ອງໄດ້ເກັບກໍາຂໍ້ມູນຈາກຊວງການເງິນ ເປັນຕົ້ນແມ່ນຂໍ້ມູນເລກປະຈຳຕົວຜູ້ເສຍພາສີອາກອນ ຂອງບັນດາບໍລິສັດທີ່ຕັ້ງຢູ່ ສປປ ລາວ ແລະ ຂໍ້ມູນຖານະການເງິນ ເຊິ່ງຂໍ້ມູນຕ່າງໆ ແມ່ນຈະຖືກນໍາໃຊ້ ເພື່ອສ້າງຜະລິດຕະພັນການຈັດອັນດັບຄວາມໜ້າເຊື່ອຖືຂອງວິສາຫະກິດ ແລະ ເພື່ອກວດສອບຄວາມຖືກຕ້ອງຂອງຂໍ້ມູນທີ່ໄດ້ຈາກສະມາຊິກເຮັດໃຫ້ຂໍ້ມູນມີຄຸນນະພາບ ທັງນີ້ກໍເພື່ອໃຫ້ຂໍ້ມູນຂ່າວສານສິນເຊື່ອ ກາຍເປັນສູນກາງໃນການແລກ ປ່ຽນຂໍ້ມູນທີ່ຕິດພັນກັບວຽກງານຂໍ້ມູນຂ່າວສານສິນເຊື່ອເພື່ອນໍາມາສ້າງຜະລິດຕະພັນໃຫ້ໄດ້ຕາມມາດຕະຖານສາກົນ ທີ່ມີຄວາມຄົບຖ້ວນ,ມີຄຸນນະພາບ,ມີຄວາມທັນສະໄໝ, ຮັບປະກັນຄວາມປອດໄພດ້ານຂໍ້ມູນຂ່າວສານສິນເຊື່ອ ກ້າວໄປສູ່ການເຊື່ອມໂຍງກັບພາກພື້ນ ແລະ ສາກົນ ໃນອະ ນາຄົດ ໃຫ້ສາມາດປະກອບສ່ວນເຂົ້າໃນການກໍານົດນະໂຍບາຍເງິນຕາຂອງພາກລັດ ແນ່ໃສ່ເພື່ອຮັກສາຄວາມມີສະຖຽນລະພາບທາງດ້ານການເງິນ-ເງິນຕາ, ຄຸ້ມຄອງບັນດາສະຖາບັນການເງິນ, ສົ່ງເສີມການເຂົ້າເຖິງແຫຼ່ງທຶນຂອງວິສາຫະກິດຂະໜາດນ້ອຍ ແລະ ຂະໜາດກາງ,  ສັງຄົມສາມາດເຂົ້າເຖິງສິນເຊື່ອໄດ້ງ່າຍຂື້ນ ແລະ ສົ່ງເສີມໃຫ້ສັງຄົມມີວິໄນທາງດ້ານການເງິນ ເຊິ່ງຂໍ້ມູນຂ່າວສານສິນເຊື່ອຖືໄດ້ວ່າເປັນຂໍ້ມູນພື້ນຖານໃນການພິຈາລະນາ ເປັນຕົ້ນແມ່ນ:   ນໍາໃຊ້ເຂົ້າໃນການວິເຄາະຄວາມສ່ຽງທາງດ້ານສິນເຊື່ອກ່ອນການອະນຸມັດເງິນກູ້,ທົບທວນ,ປັບໂຄງສ້າງໜີ້, ແຈ້ງເຕືອນເງິນກູ້ທີ່ມີຄວາມສ່ຽງ,ກໍານົດຜະລິດຕະພັນ,ການຕະຫຼາດຂອງຕົນ ແລະ ນໍາໃຊ້ຂໍ້ມູນຂ່າວສານສິນເຊື່ອເຂົ້າໃນວຽກງານອື່ນ ແລະ ໃນຕອນທ້າຍຂອງກອງປະຊຸມ ທ່ານ ສົມຈິດ ຄໍາມຸງຄຸນ ຮອງຫົວໜ້າຫ້ອງການ,ກະຊວງການເງິນ ກໍໄດ້ມີຄໍາເຫັນຕໍ່ກອງປະຊຸມ ເຊິ່ງເຫັນໄດ້ຄວາມສໍາຄັນຂອງວຽກງານຂໍ້ມູນຂ່າວສານສິນເຊື່ອ ແລະ ໃຫ້ບັນກົມທີ່ກ່ຽວຂ້ອງຂອງກະຊວງການເງິນ ສືບຕໍ່ໃຫ້ການຮ່ວມມື ແລະ ເຮັດວຽກຮ່ວມກັບ ບໍລິສັດ ຂໍ້ມູນຂ່າວສານສິນເຊື່ອແຫ່ງ ສປປ ລາວ ໃນການສະໜອງຂໍ້ມູນທີ່ຕິດພັນ ເປັນຕົ້ນແມ່ນຂໍ້ມູນເລກປະຈຳຕົວຜູ້ເສຍພາສີອາກອນ ຂອງບັນດາບໍລິສັດທີ່ຕັ້ງຢູ່ ສປປ ລາວ ແລະ ຂໍ້ມູນຖານະການເງິນ ເພື່ອນໍາໃຊ້ເຂົ້າໃນການສ້າງຜະລິດຕະພັນການຈັດອັນດັບຄວາມ  ໜ້າເຊື່ອຖືຂອງວິສາຫະກິດ ແລະ ເພື່ອກວດສອບຄວາມຖືກຕ້ອງຂອງຂໍ້ມູນໃນຖານຂໍ້ມູນຂ່າວສານສິນເຊື່ອ ໃຫ້ມີຄຸນນະພາບ.

แชร์