ແຂວງຄຳມ່ວນ ເຜີຍແຜ່-ເຊື່ອມຊຶມ ບັນດານິຕິກຳກ່ຽວກັບວຽກງານກວດກາ

ໃນວັນທີ 7 ກັນຍາ 2022 ທີ່ສະໂມສອນຂອງແຂວງຄຳມ່ວນ ໄດ້ຈັດກອງປະຊຸມເຜີຍແຜ່-ເຊື່ອມຊຶມ ບັນດານິຕິກໍາກ່ຽວກັບວຽກງານກວດກາໃຫ້ບັນດາຂະແໜງການ, ອົງການຈັດຕັ້ງລັດໃນທົ່ວແຂວງໂດຍການເປັນກຽດເຂົ້າຮ່ວມຂອງທ່ານ ວັນໄຊ ພອງສະຫວັນ ກໍາມະການສູນກາງພັກ, ເລຂາພັກແຂວງ,ເຈົ້າແຂວງຄຳມ່ວນ,ທ່ານ ປອ. ດາວບົວລະພາ ບາວົງເພັດ ຄະນະປະຈຳພັກ, ຮອງປະທານກວດກາສູນກາງພັກ, ມີບັນດາຄະນະປະຈໍາພັກແຂວງ, ກຳມະການພັກແຂວງ, ພະແນກການ, ບັນດາທ່ານເຈົ້າເມືອງ, ຄະນະກວດກາພັກແຂວງ, ອົງການກວດກາລັດ ແລະຕ້ານການສໍ້ລາດບັງຫລວງແຂວງ, ເມືອງ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ຄຳສອນ ອ້ວນທະວີ ປະທານອົງການກວດກາພັກ - ລັດ ແຂວງຄຳມ່ວນ ໄດ້ເປັນກຽດຜ່ານແຈ້ງການຂອງຄະນະກວດກາສູນກາງພັກກ່ຽວກັບການປັບປຸງກົງຈັກການຈັດຕັ້ງ ແລະ ພາລະບົດບາດຂອງຄະນະກວດກາພັກ, ອົງການກວດກາລັດ ແລະ ການຕ້ານການສໍ້ລາດບັງຫລວງ ເລກທີ 227/ ຄກສພ, ນອກນັ້ນກອງປະຊຸມຍັງໄດ້ຮັບຟັງມະຕິຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະກວດກາພັກແຂວງຄໍາມ່ວນ ແລະ ຂໍ້ຕົກລົງເລກທີ 29 ຂອງອົງການກວດກາແຫ່ງລັດ ວ່າດ້ວຍການຈັດຕັ້ງ ການເຄື່ອນໄຫວຂອງອົງການກວດກາລັດ ແລະຕ້ານການສໍ້ລາດບັງຫລວງ, ບົດແນະນໍາຂອງຄະນະກວດກາສູນກາງພັກ ເລກທີ 194/ຄກສພ, ວ່າດ້ວຍການຈັດຕັ້ງປະຕິບັດລະບຽບພັກສະໄໝທີ XI ກ່ຽວກັບວຽກງານຕິດຕາມ, ກວດກາຂອງພັກ, ຄະນະກວດກາພັກ ແລະ ຄະນະວິໄນຂອງພັກແຕ່ລະຂັ້ນ, ບົດສະຫລຸບຕີລາຄາການເຄື່ອນໄຫວວຽກງານກວດກາ ຂອງຄະນະກວດກາສູນກາງພັກແຕ່ປີ 2016 ເຖິງປະຈຸບັນ ແລະ ບາງເນື້ອໃນຕົ້ນຕໍ ສຳລັບການເຄື່ອນໄຫວແຕ່ນີ້ເຖິງປີ 2026, ພ້ອມທັງຄໍາສັ່ງແນະນໍາ ເລກທີ 169, ຂອງຄະນະເລຂາທິການສູນກາງພັກ ວ່າດ້ວຍການເພີ່ມທະວີການນຳພາ - ຊີ້ນຳ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ.

ທັງນີ້ກໍ່ເພື່ອເປັນບ່ອນອີງທາງດ້ານນິຕິກໍາໃຫ້ແກ່ການຈັດຕັ້ງ ແລະການເຄື່ອນໄຫວແນໃສ່ຈັດຕັ້ງປະຕິບັດວຽກງານກວດກາພັກໃຫ້ມີປະສິດທິຜົນສູງ, ເຮັດໃຫ້ຄະນະກວດກາພັກ, ອົງການກວດກາລັດ ແລະ ຕ້ານການສໍ້ລາດບັງຫລວງ ແຕ່ລະຂັ້ນສາມາດເຄື່ອນໄຫວວຽກງານໄດ້ຢ່າງມີປະສິດທິພາບ, ປະສິດທິຜົນ ແລະ ມີຄວາມຄ່ອງຕົວ, ພ້ອມທັງເປັນການຜັນຂະຫຍາຍນິຕິກຳຕ່າງໆ, ຂອງຂັ້ນເທິງກ່ຽວກັບການແບ່ງຂັ້ນຄຸ້ມຄອງໂດຍສະເພາະແມ່ນກົງຈັກການຈັດຕັ້ງ ແລະພາລະບົດບາດຂອງຄະນະກວດກາແຕ່ລະຂັ້ນ, ຮັບປະກັນໃຫ້ແກ່ການຈັດຕັ້ງປະຕິບັດວຽກງານດັ່ງກ່າວມີຄວາມເຂັ້ມງວດ, ມີປະສິດທິພາບແນໃສ່ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ - ສັງຄົມ ມີຄວາມໂປ່ງໃສ, ເຂັ້ມແຂງ, ໜັກແໜ້ນ, ຍຸຕິທໍາ ແລະຖືກຕ້ອງຕາມກົດໝາຍ.

แชร์