ສຳນັກຂ່າວສານລາວ-ຫວຽດນາມ ວາງສະແດງຮູບສາຍພົວພັນສອງປະເທດ

ເນື່ອງໃນໂອກາດ ວັນສ້າງຕັ້ງສາຍພົວພັນການທູດ ຫວຽດນາມ-ລາວ ຄົບຮອບ 60 ປິ (ວັນທີ 5 ສິງຫາ 1962-5 ສິງຫາ 2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລະຫວ່າງ ຫວຽດນາມ-ລາວ ຄົບຮອບ 45 ປີ (18/7/1977-18/7/2022), ສຳນັກງານຂ່າວສານຫວຽດນາມ ຮ່ວມກັບ ສຳນັກຂ່າວສານປະເທດລາວ ໄດ້ຈັດງານວາງສະແດງຮູບພາບ ສາຍພົວພັນຫວຽດນາມ-ລາວ ໃນວັນທີ 6 ກັນຍາ 2022 ຢູ່ສູນສຳນັກງານແຫ່ງຊາດຫວຽດນາມ, ພາຍໃຕ້ຫົວຂໍ້ ”ການພົວພັນຫວຽດນາມ-ລາວ: ພັດທະນາ ແລະ ຄົງຕົວ ຕະຫລອດໄປ” ໂດຍມີຜູ້ຕາງໜ້າການນຳຄະນະອົບຮົມສູນກາງພັກ, ຄະນະນໍາກະຊວງການຕ່າງປະເທດ, ກະຊວງການຕ່າງປະເທດ, ກະຊວງວັດທະນະທຳ- ກິລາ , ພາກສ່ວນທີ່ກ່ຽວຂ້ອງ ແລະແຂກຖືກເຊິນເຂົ້າຮ່ວມ.

ໃນໂອກາດດັ່ງກ່າວ, ທ່ານນາງ ວູຫວຽດຈາງ ຜູ້ອຳນວຍການໃຫຍ່ສຳນັກຂ່າວສານຫວຽດນາມ ໄດ້ກ່າວໃນພິທີດັ່ງກ່າວວ່າ: ປີ 2022 ແມ່ນປີທີ່ມີຄວາມໝາຍສຳຄັນພິເສດ ສຳລັບການພົວພັນຫວຽດນາມ-ລາວ, ລາວຫວຽດນາມ, ເປັນຂີດໝາຍສຳຄັນແຫ່ງການສ້າງຕັ້ງສາຍພົວພັນການທູດຄົບ ຮອບ 60 ປິ ແລະ 45 ປີ ແຫ່ງການເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ-ລາວ, ສະທ້ອນບັນດາການເຄື່ອນໄຫວສຳຄັນ, ຄວາມຈິງໃຈ, ມິດຕະພາບອັນສະໜິດສະໜົມ ລະຫວ່າງ ປະຊາຊົນສອງຊາດ. ນີ້ຖືເປັນໝາກຜົນອັນໃຫຍ່ຫລວງຂອງສາຍພົວພັນພິເສດ, ທີ່ລ້ຳຄ່າ, ຊື່ສັດບໍລິສຸດ ລະຫວ່າງ ສອງປະເທດ. ໃນຂະນະດຽວກັນ, ຍັງມີຮູບພາບທີ່ສ່ອງແສງເຫດການສຳຄັນຕ່າງໆໃນປີສາມັກຄີ ມິດຕະພາບ ລະຫວ່າງ ຫວຽດນາມ-ລາວ, ລາວ-ຫວຽດນາມ 2022 ທີ່ເຕັມໄປດ້ວຍສີສັນອັນຫລາກຫລາຍ ແຫ່ງຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງປະເທດ.

ຮູບທີ່ນໍາມາວາງສະແດງໃນຄັ້ງນີ້, ປະກອບດ້ວຍຮູບພາບຂະໜາດໃຫຍ່ 63 ຮູບແລະ ຫລາຍກວ່າ 100 ຮູບ ທີ່ມີການຄັດເລືອກ ຈາກບັນດາເອກະສານ ຂອງສຳນັກຂ່າວສານຫວຽດນາມ ແລະ ສຳນັກງານຂ່າວສານປະເທດລາວ ເຊິ່ງເປັນ ການສະແດງໃຫ້ເຫັນເຖິງຄວາມຈິງໃຈ, ການເຄື່ອນໄຫວຕ່າງໆ ທີ່ສ່ອງແສງໃຫ້ເຫັນເຖິງການພົວພັນພິເສດ ທີ່ມີ ໜຶ່ງດຽວຢູ່ໃນໂລກ ລະຫວ່າງ ສອງປະເທດ, ສອງຊາດ ຫວຽດນາມ-ລາວ, ລາວ-ຫວຽດນາມອ້າຍນ້ອງ ນັບແຕ່ພາຍຫລັງຫວຽດນາມ ປະກາດສ້າງຕັ້ງ ສາທາລະນະລັດສັງຄົມນິຍົມ ຫວຽດນາມ ໃນວັນທີ 02/09/1945 ແລະ ລັດຖະບານລາວອິດສະລະ ໄດ້ປະກາດສ້າງຕັ້ງຂຶ້ນ 12/10/1945.

ບັນດາຮູບພາບທີ່ນໍາມາວາງສະແດງ ຍັງໄດ້ສ່ອງແສງໃຫ້ເຫັນເຖິງ ການດຳລົງຊິວິດ, ສາຍພົວພັນ, ມິດຕະພາບອັນສະໜິດສະໜົມຮ່ວມກັນ ຢ່າງແໜ້ນແຟ້ນ ລະຫວ່າງ ພັກ-ປະຊາຊົນ ສອງຊາດ ທີ່ໄດ້ຄຽງບ່າຄຽງໄຫລ່ ໃນໄລຍະຕໍ່ສູ້ກູ້ຊາດ ຍາດເອົາເອກະລາດ ຂອງບັນດາຊົນເຜົ່າ ກໍຄື ໃນໄລຍະການປົກປັກຮັກສາ ແລະ ໄລຍະປົກປັກຮັກສາ-ພັດທະນາຂອງສອງປະເທດເຖິງປັດຈຸບັນ. ຮູບພາບດັ່ງກ່າວ ຍັງເປັນການປະກອບສ່ວນສໍາຄັນ ເຂົ້າໃນການຮັດແໜ້ນສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ໂດຍປະທານ ໂຮ່ຈີ່ມິງ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ໄດ້ລິເລີ່ມ ແລະ ໄດຮັບການເພີ່ມພູນຄູນສ້າງ ຈາກການນຳແຕ່ລະຮຸ່ນ, ນັກປະຕິວັດ, ປະຊາຊົນສອງປະເທດ, ຮ່ວມກັນປົກປັກຮັກສາ ແລະ ເສີມຂະຫຍາຍໃຫ້ເປັນມໍລະດົກອັນລ້ຳຄ່າ, ເປັນປັດໄຈຕັດສິນໄຊຊະນະຂອງການປະຕິວັດແຕ່ລະປະເທດ ແລະ ອື່ນໆ.

 

แชร์