ກອງປະຊຸມເຄືອຂ່າຍຄັງປັນຍາ ອາຊີຕາເວັນອອກ ຄັ້ງທີ 36

ໃນວັນທີ 6 ກັນຍາ 2022 ທີ່ສະຖາບັນການຕ່າງປະເທດໃນນາມປະທານໝູນວຽນຂອງເຄືອຂ່າຍຄັງປັນຍາອາຊີຕາເວັນອອກ (NEAT) ໄດ້ຈັດກອງປະຊຸມຜູ້ປະສານງານລະຫວ່າງບັນດາປະເທດເຄືອຂ່າຍຄັງປັນຍາ ຄັ້ງທີ 36 ໂດຍການເປັນປະທານກ່າວເປີດຂອງ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ, ມີຄະນະສະຖາບັນ, ຄະນະພະແນກ ແລະ ວິຊາການ ຈຳນວນ 12 ທ່ານເຂົ້າຮ່ວມໃນຮູບແບບກອງປະຊູມທາງໄກ.

ກອງປະຊຸມຄັ້ງນີ້ ມີຈຸດປະສົງເພື່ອຮັບຟັງ ແລະ ທົບທວນຄືນ ບັນດາກິດຈະກໍາຕ່າງໆ ຂອງເຄື່ອຂ່າຍຄັງປັນຍາ ອາຊີຕາເວັນອອກ (NEAT) ເປັນຕົ້ນ ຜົນຂອງກອງປະຊຸມໜ່ວຍງານວິຊາການ 06 ໜ່ວຍຈາກ 06 ປະເທດສະມາຊິກຈັດຂຶ້ນ, ພ້ອມທັງປຶກສາຫາລື ແລະ ຮັບຮອງເອົາບົດລາຍງານ ຜົນກອງປະ ຊຸມວິຊາການ ດັ່ງກ່າວ. ສຳຄັນແມ່ນກອງປະຊຸມຄັ້ງນີ້ ໄດ້ຮັບຮອງເອົາບົດລາຍງານ ສະບັບທີ 19 ຂອງກອງປະຊຸມເຄືອຂ່າຍຄັງປັນຍາ ອາຊີຕາເວັນອອກ ຫລື NEAT 19 ປະຈຳປີ 2022 ເພື່ອນຳສົ່ງໃຫ້ປະທານອາຊຽນ ພິຈາລະນາເອົາເຂົ້າໃນບົດຖະແຫລງ ພາກລັດຖະບານໃນກອງປະ ຊຸມສຸດຍອດອາຊຽນ+3 ເຊິ່ງຄາດວ່າຈະຈັດຂຶ້ນໃນທ້າຍປີ 2022.

ທ່ານ ທອງຜ່ານ ສະຫວັນເພັດ ໄດ້ຊີ້ໃຫ້ເຫັນເຖິງສະພາບຄວາມຫຍຸ້ງຍາກຈາກການແຜ່ລະບາດຂອງເຊື້ອພະຍາດ ໂຄວິດ-19 ໃນການຈັດກອງປະຊຸມວິຊາການ ຈໍານວນ 06 ຄັ້ງ ທີ່ຜ່ານມາ. ເຖິງວ່າຈະປະເຊີນກັບບັນຫາ ແລະຂໍ້ຫຍຸ້ງຍາກແຕ່ກອງປະຊຸມແຕ່ລະຄັ້ງ ກໍໄດ້ສໍາເລັດລຸລ່ວງຕາມແຜນທີ່ໄດ້ກໍານົດໄວ້. ພ້ອມດຽວກັນນັ້ນ, ທ່ານຍັງໄດ້ສະແດງຄວາມຊົມເຊີຍຕໍ່ຜົນງານ ແລະ ການປະກອບສ່ວນທີ່ສໍາຄັນຂອງສະມາຊິກ NEAT ໃນການແກ້ໄຂບັນຫາຕ່າງໆ ເຊິ່ງບັນດາຂໍ້ສະເໜີແນະຈາກການຄົ້ນຄວ້າ, ວິໄຈຂອງຜູ້ຊ່ຽວຊານສະເພາະທາງ, ຜູ້ຊົງຄຸນວຸດທິຈາກປະເທດຕ່າງໆນັ້ນລ້ວນແຕ່ມີປະໂຫຍດ ແລະ ເປັນບ່ອນອີງສໍາຄັນໃຫ້ແກ່ການຟື້ນຟູເສດຖະກິດ-ສັງຄົມ ໃນການດໍາລົງຊີວິດຮູບແບບໃໝ່. ນອກຈາກນີ້,ທ່ານ ສອນໄຊ ວັນນະໄຊ, ຮອງຫົວໜ້າສະຖາບັນການຕ່າງປະເທດ, ຜູ້ຕາງໜ້າຈາກ NEAT ສປປ ລາວກໍໄດ້ລາຍງານຜົນກອງປະຊຸມໜ່ວຍງານວິຊາການທີ່ສະຖາບັນການຕ່າງປະເທດເປັນເຈົ້າພາບຈັດຂຶ້ນໃນຄັ້ງວັນທີ 09 ມິຖຸນາ 2022, ພາຍໃຕ້ຫົວຂໍ້:“ການຟື້ນຟູການພັດທະນາເສດຖະກິດ-ສັງຄົມ ໃຫ້ມີຄວາມເຂັ້ມແຂງ, ຍືນຍົງ ແລະກວມລວມ ໃນທ່າມກາງການແຜ່ລະບາດຂອງພະຍາດໂຄວິດ-19” ເຊິ່ງໄດ້ຮວບຮວມເອົາບັນດາຄຳຄິດຄຳເຫັນ ແລະ ຂໍ້ສະເໜີຕ່າງໆ ຈາກປະເທດສະມາຊິກເພື່ອປະກອບເນື້ອໃນເຂົ້າເປັນຮ່າງບົດບັນທຶກ ສະບັບທີ 19.

ໃນຕອນທ້າຍຂອງກອງປະຊຸມ, ທ່ານ ໄມ ໄຊຍະວົງສ໌ ຫົວໜ້າສະຖາບັນການຕ່າງປະເທດ, ຜູ້ນໍາພາກອງປະຊຸມໄດ້ກ່າວສະແດງຄວາມຂອບໃຈຕໍ່ບັນດາປະເທດສະມາຊິກອາຊຽນ 06 ປະເທດຂອງເຄືອຂ່າຍ NEAT ທີ່ໄດ້ໃຫ້ການສະໜັບສະໜູນ ແລະເອົາໃຈໃສ່ປະກອບສ່ວນຮ່ວມກັນເປັນເຈົ້າພາບຈັດກອງປະຊຸມວິຊາການ 06 ຄັ້ງ ແລະ ໄດ້ຈັດຕັ້ງປະຕິບັດແຜນວຽກຕ່າງໆ ຕະຫລອດໄລຍະການເປັນປະທານຂອງ ສປປ ລາວ ທ່າມກາງສະພາບຄວາມຫຍຸ້ງຍາກຕ່າງໆ ທີ່ເກີດຂຶ້ນໄລຍະການຟື້ນຟູເສດຖະກິດພາຍຫລັງການລະບາດຢ່າງໜັກຂອງໂຄວິດ-19. ພ້ອມດຽວກັນນີ້, ບັນດາກິດຈະກໍາຕ່າງໆ ທີ່ໄດ້ຕົກລົງກັນຈັດຕັ້ງປະຕິບັດ ແລະສຳເລັດໄປກ່ອນໜ້າແລ້ວນັ້ນເພື່ອຈະໄດ້ສົ່ງມອບຄວາມຮັບຜິດຊອບຕໍ່ໄປໃຫ້ປະເທດເຈົ້າພາບໃນຮອບວຽນ ປີ 2023. 

แชร์