ສະຫາຍ ທອງລຸນ ສີສຸລິດ ຕ້ອນຮັບການເຂົ້າອວຍພອນ ຂອງປະທານສະຫະພັນນັກຮົບເກົ່າ

ເມື່ອວັນທີ 5 ກັນຍາ 2022 ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ໄດ້ຕ້ອນຮັບການເຂົ້າອວຍພອນຂອງ ສະຫາຍ ພົນໂທ ແສງນວນ ໄຊຍະລາດ ປະທານສະຫະພັນນັກຮົບເກົ່າແຫ່ງຊາດລາວພ້ອມດ້ວຍຄະນະທີ່ຫ້ອງວ່າການສູນກາງພັກ ນະຄອນຫຼວງວຽງຈັນ ເນື່ອງໃນໂອກາດວັນສ້າງຕັ້ງສະຫະພັນນັກຮົບເກົ່າ ແຫ່ງຊາດລາວ ຄົບຮອບ 20 ປີ (9 ກັນຍາ 2002-9 ກັນຍາ 2022).

ໂອກາດນີ້, ສະຫາຍປະທານສະຫະພັນນັກຮົບເກົ່າ ແຫ່ງຊາດລາວ ໄດ້ຕາງໜ້າໃຫ້ຄະນະບໍລິຫານງານ, ພະນັກງານ-ນັກຮົບຂອງສະຫະພັນນັກຮົບເກົ່າໃນຂອບເຂດທົ່ວປະເທດສະແດງຄວາມຮູ້ບຸນຄຸນ ແລະອວຍພອນໄຊອັນປະເສີດມາຍັງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ຈົ່ງມີພາລະນາໄມສົມບູນແຂງແຮງ, ສືບຕໍ່ຊີ້ນຳພາ-ຊີ້ນຳ ແລະ ພັດທະນາປະເທດຊາດໂດຍສະເພາະແມ່ນການຊີ້ນຳສະຫະພັນກັກຮົບເກົ່າແຫ່ງຊາດລາວ ໃຫ້ມີການພັດທະນາ ແລະ ເຕີບໃຫຍ່ເຂັ້ມແຂງຂຶ້ນໄປເລື້ອຍໆ.

ໃນໂອກາດດຽວກັນ, ສະຫາຍເລຂາທິການໃຫຍ່ຄະນະບໍລິຫານງານສູນກາງພັກປະທານປະເທດແຫ່ງ ສປປ ລາວ ໄດ້ສະແດງຄວາມຂອບອົກຂອບໃຈ ແລະເຊື່ອໝັ້ນວ່າຄະນະບໍລິຫານງານສະຫະພັນນັກຮົບເກົ່າຈະສືບຕໍ່ຮັກສາມູນເຊື້ອ ແລະເສີມຂະຫຍາຍນໍ້າໃຈ ແລະທາດແທ້ປະຕິວັດ, ເປັນສູນເຕົ້າໂຮມຄວາມສາມັກຄີຂອງບັນດາພະນັກງານ-ນັກຮົບ ໂດຍສະເພາະແມ່ນພະນັກງານຜູ້ອາວຸໂສ-ບຳນານເວລາໃດກໍຕ້ອງເປັນແວ່ນແຍງອັນໃສແຈ້ງ ໃຫ້ແກ່ສັງຄົມ ແລະລູກ-ຫລານ ຜູ້ເກີດໃໝ່ໃຫຍ່ລຸນ, ມີແບບແຜນໃນການດຳລົງຊີວິດທີ່ປອດໃສຂາວສະອາດ ແລະ ເປັນແບບຢ່າງໃຫ້ແກ່ສັງຄົມ.

ນອກນີ້ຍັງໃຫ້ຮູ້ຕື່ມອິກວ່າ: ໃນຕອນເຊົ້າຂອງວັນດຽວກັນຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວຍັງໄດ້ເຂົ້າອວຍພອນທ່ານ ບຸນຍັງ ວໍລະຈິດ ອະດີດເລຂາທິການໃຫ່ຍຄະນະບໍລິຫານງານສູນກາງພັກອະດີດປະທານປະເທດແຫ່ງ ສປປ ລາວ ຢູ່ທີ່ເຮືອນພັກຂອງເພິ່ນ.
ຂ່າວ: ອານຸສອນ

แชร์