ຮອງນາຍົກລັດຖະມົນຕີ ຕ້ອນຮັບຜູ້ຊ່ວຍເລຂາທິການໃຫ່ຍ ສປຊ

ໃນວັນທີ 5 ກັນຍາ 2022 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ຄານນີ ວິກນາຣາຈາ (Kanni WIGNARAJA) ຜູ້ຊ່ວຍເລຂາທິການໃຫຍ່ອົງການສະຫະປະຊາຊາດ (ສປຊ), ທັງເປັນຜູ້ອໍານວຍການຫ້ອງການພາກພື້ນອາຊີ-ປາຊີຟິກ ຂອງອົງການສະຫະປະຊາຊາດເພື່ອການພັດທະນາ (UNDP) ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະເຮັດວຽກ ຢູ່ ສປປ ລາວ ໃນລະຫວ່າງວັນທີ 4-8 ກັນຍາ 2022.

ການພົບປະໃນຄັ້ງນີ້, ສອງຝ່າຍໄດ້ປຶກສາຫາລືກັນກ່ຽວກັບຂອບການຮ່ວມມື ລະຫວ່າງ ສປປ ລາວ ແລະ ອົງການ ສປຊ ເວົ້າລວມ, ເວົ້າສະເພາະລະຫວ່າງ ສປປ ລາວ ແລະ UNDP ໂດຍສະ ເພາະ ການສະໜັບສະໜູນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ, ວາລະ 2030 ເພື່ອການພັດທະນາ ແລະ ເປົ້າໝາຍການພັດທະນາແບບຍືນຍົງ (ປພຍ ຫລືSDGs) ໂດຍຜ່ານການຈັດຕັ້ງປະຕິບັດແຜນງານ, ໂຄງການ ແລະກິດຈະກຳຕ່າງໆ ຕະຫລອດໄລຍະຜ່ານມາ.

ໂອກາດດັ່ງກ່າວ,ທ່ານ ສອນໄຊ ສີພັນດອນ ໄດ້ຕີລາຄາສູງຕໍ່ການມາຢ້ຽມຢາມຂອງທ່ານ ນາງ ຄານນີ ວິກນາຣາຈາ ຊຶ່ງເປັນການມາຢ້ຽມຢາມ ສປປ ລາວ ຄັ້ງທໍາອິດ ທີ່ຢັ້ງຢືນເຖິງຄວາມເອົາ ໃຈໃສ່ ແລະການໃຫ້ຄວາມສຳຄັນຕໍ່ກັບການຮ່ວມມືລະຫວ່າງອົງການ ສປຊ ເພື່ອການພັດທະນາ ແລະ ສປປ ລາວ ຕະຫລອດໄລຍະທີ່ຜ່ານມາ. ພ້ອມກັນນັ້ນ,ທ່ານຍັງໄດ້ສະແດງຄວາມຂອບໃຈຢ່າງຈິງໃຈຕໍ່ອົງການ UNDP ທີ່ໄດ້ໃຫ້ການສະໜັບສະໜູນ ແລະຊ່ວຍເຫຼືອ ສປປ ລາວ ໃນໄລຍະຜ່ານມາໂດຍສະເພາະ ແຜນການຮ່ວມມືລະຫວ່າງ ລັດຖະບານ ສປປ ລາວ ແລະ ອົງການ UNDP ໃນດ້ານການພັດທະນາໃນໄລຍະ ປີ 2017-2021 ໂດຍມີມູນຄ່າປະມານ 103.309.000 ໂດລາສະຫະລັດ ແລະ ສໍາລັບສົກປີ 2022-2026 ງົບປະມານທີ່ຄາດຄະເນໄວ້ ມີປະມານ 87.695.000 ໂດລາສະຫະລັດ, ອັນຈະເປັນການປະກອບສ່ວນທີ່ສໍາຄັນ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຂອງ ສປປ ລາວ, ລວມທັງການປະກອບສ່ວນອັນສຳຄັນໃນການແກ້ໄຂຄວາມທຸກຍາກ, ຂະບວນການຈັດກອງປະຊຸມໂຕະມົນ, ວຽກງານເກັບກູ້ລະເບີດບໍ່ທັນແຕກທີ່ຕົກຄ້າງ, ວຽກງານປັບປຸງບູລະນະການປົກຄອງ, ການສ້າງຄວາມເຂັ້ມແຂງໃຫ້ແກ່ອົງການນິຕິບັນຍັດ ແລະອື່ນໆ.

ທ່ານນາງ ຄານນີ ວິກນາຣາຈາ ກໍໄດ້ສະແດງຄວາມຂອບໃຈຕໍ່ທ່ານ ສອນໄຊ ສີພັນດອນ ທີ່ໄດ້ຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ແລະຄວາມຄືບໜ້າໃນຫລາຍດ້ານຂອງລັດຖະບານລາວໃນການພັດທະນາປະເທດກໍຄືການຈັດຕັ້ງປະຕິບັດວາລະ 2030 ແລະເປົ້າໝາຍການພັດທະນາຂອງສາກົນໂດຍສະເພາະການເຊື່ອມສານ ປພຍ ເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ການກະກຽມນຳພາປະເທດຫລຸດພົ້ນອອກຈາກສະຖານນະພາບປະເທດດ້ອຍພັດທະນາ ລວມທັງວຽກງານອື່ນໆ ເຊິ່ງເປັນແບບຢ່າງອັນດີໃຫ້ແກ່ຫລາຍປະເທດ. ອີງໃສ່ຜົນສຳເລັດທີ່ຍາດມາໄດ້ນັ້ນ, ທ່ານ ນາງ ຄານນີ ວິກນາຣາຈາ ໄດ້ສະແດງຄວາມເຊື່ອໝັ້ນວ່າ ສປປ ລາວ ຈະສາມາດນຳພາປະເທດຊາດບັນລຸເປົ້າໝາຍຕ່າງທີ່ກ່າວມານັ້ນໄດ້ຢ່າງສຳເລັດຜົນ.

ໃນໂອກາດມາຢ້ຽມຢາມ ສປປ ລາວ ໃນຄັ້ງນີ້, ທ່ານນາງ ຄານນີ ວິກນາຣາຈາ ພ້ອມດ້ວຍຄະນະຍັງຈະໄດ້ເຂົ້າຢ້ຽມຂໍ່ານັບການນຳຂອງສະພາແຫ່ງຊາດ, ບັນດາກະຊວງຕ່າງໆທີ່ກ່ຽວຂ້ອງພ້ອມທັງຈະໄດ້ເດີນທາງໄປຢ້ຽມຢາມ ແລະເຮັດວຽກຢູ່ແຂວງຫລວງພະບາງ ແລະແຂວງວຽງຈັນກ່ອນຈະເດີນທາງກັບ.
ພາບ: ຂັນໄຊ

แชร์