ເພີ່ມທະວີການຕິດຕາມກວດກາການດຳເນີນຄະດີການຄ້າມະນຸດ

ເມື່ອບໍ່ດົນມານີ້, ຢູ່ຫ້ອງປະຊຸມສຳນັກງານໃຫຍ່ເຂດເສດຖະກິດພິເສດ, ນະຄອນໄກສອນ ພົມວິຫານ, ແຂວງສະຫວັນນະເຂດ, ກົມແຜນການ ແລະຮ່ວມມືກັບຕ່າງປະເທດຮ່ວມກັບສະຖາບັນຄົ້ນຄວ້າ ແລະຝຶກອົບຮົມໄອຍະການໄດ້ຈັດກອງປະຊຸມເຜີຍແຜ່ຄຳແນະນຳຮ່ວມລະຫວ່າງສານປະຊາຊົນສູງສຸດກ່ຽວກັບການດຳເນີນຄະດີ, ການກະກຽມໃຫ້ແກ່ການກະທຳຜິດ ແລະຄວາມພະຍາຍາມກໍ່ການກະທຳຜິດໃນສະຖານການຄ້າມະນຸດ ແລະປື້ມຄູ່ມືການຕິດຕາມກວດກາການດຳເນີນຄະດີການຄ້າມະນຸດ.

ໂອກາດນີ້, ທ່ານ ນາງ ພອນເພັດ ອຸ່ນແກ້ວ ກຳມະການຄະນະບໍລິຫານງານພັກ, ຫົວໜ້າສະຖາບັນຄົ້ນຄວ້າ ແລະຝຶກອົບຮົມໄອຍະການປະທານກອງປະຊຸມ ກ່າວວ່າ: ການເຜີຍແຜ່ປຶ້ມຄູ່ມື ແລະ ຄໍາແນະນຳຮ່ວມ ດັ່ງກ່າວ ເພື່ອສ້າງຄວາມຮັບຮູ້ ແລະ ຄວາມເຂົ້າໃຈ ໃຫ້ພະນັກງານອົງການໄອຍະການປະຊາຊົນ ແລະພາກສ່ວນກ່ຽວຂ້ອງມີຄວາມເປັນເອກະພາບໃນການດໍາເນີນຄະດີ, ການຕິດຕາມກວດກາ ແລະການສັ່ງຟ້ອງຄະດີການຄ້າມະນຸດໃຫ້ຖືກຕ້ອງຕາມກົດໝາຍ ໂດຍເນັ້ນໃຫ້ພະນັກງານຜູ້ເຮັດວຽກຕົວຈິງ ກໍຄືບັນດາທ່ານທີ່ເຂົ້າຮ່ວມກອງປະຊຸມເອົາໃຈໃສ່ຄົ້ນຄວ້າ ແລະແລກປ່ຽນບົດຮຽນບໍ່ວ່າຈະເປັນທິດສະດີທີ່ເປັນຫລັກການຂອງກົດໝາຍ, ຄໍາແນະນໍາ ແລະ ພຶດຕິກໍາຕົວຈິງ. ບັນດາເນື້ອໃນເອກະສານທີ່ນຳມາເຜີຍແຜ່ມີ VI ພາກ ແລະ 1 ຄໍາແນະນໍາ ຄື: ຄວາມຮັບຮູ້ທົ່ວໄປກ່ຽວກັບການຕິດຕາມກວດກາການດໍາເນີນຄະດີຄ້າມະນຸດ; ການດໍາເນີນຄະດີຂອງອົງການສືບສວນ-ສອບສວນ ເຈົ້າໜ້າທີ່ຕໍາຫລວດ; ການຄົ້ນຄວ້າສໍານວນຄະດີ ແລະ ການສັ່ງຟ້ອງຜູ້ຖືກຫາຂຶ້ນສານ; ການດໍາເນີນຄະດີການຄ້າມະນຸດຢູ່ສານ ແລະການຕິດຕາມກວດກາການຈັດຕັ້ງປະຕິບັດຄໍາຕົກລົງຂອງສານ; ລວມທັງການຮ່ວມມືສາກົນ ແລະ ຄໍາແນະນໍາຮ່ວມລະຫວ່າງກະຊວງປ້ອງກັນຄວາມສະຫງົບ, ອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດກ່ຽວກັບການດໍາເນີນຄະດີຂັ້ນກະກຽມໃຫ້ແກ່ການກະທໍາຜິດ ແລະ ຄວາມພະຍາຍາມກໍ່ການກະທໍາຜິດໃນສະຖານການຄ້າມະນຸດ.

ທ່ານປະທານກອງປະຊຸມຍັງໄດ້ຊີ້ນຳຜູ້ທີ່ເຂົ້າຮ່ວມເອົາໃຈໃສ່ຢ່າງຕັ້ງໜ້າໃນການແລກປ່ຽນບົດຮຽນນຳຄູ-ອາຈານ ເພື່ອນໍາເອົາບົດຮຽນດັ່ງກ່າວໄປໝູນໃຊ້ເຂົ້າໃນການປະຕິບັດໜ້າທີ່ວຽກງານທີ່ຕົນຮັບຜິດຊອບທັງຮັບປະກັນການດຳເນີນຄະດີການຄ້າມະນຸດໃຫ້ຄົບຖ້ວນ, ຮອບດ້ານ, ພາວະວິໄສ ແລະຖືກຕ້ອງຕາມກົດໝາຍເພື່ອນໍາເອົາຜູ້ກະທໍາຜິດມາລົງໂທດຕາມກົດໝາຍ ແລະປົກປ້ອງສິດ, ຜົນປະໂຫຍດອັນຊອບທໍາຂອງຜູ້ຖຶກເຄາະຮ້າຍທັງໝົດກໍເພື່ອຮັບປະກັນການປະຕິບັດພາລະບົດບາດ, ສິດ ແລະໜ້າທີ່ຂອງຕົນໃຫ້ຖືກຕ້ອງຕາມກົດໝາຍ ແລະມີຜົນສໍາເລັດປະກອບສ່ວນເຮັດໃຫ້ປະເທດຊາດມີຄວາມສະຫງົບ, ຍຸຕິທໍາ ແລະສີວິໄລ.
ຂ່າວ-ພາບ ອອປສ

• 05/09/2022