ສະພາປະຊາຊົນແຂວງ ແລະພະແນກການເງິນ ເຊັນບົດບັນທຶກການປະສານງານຮ່ວມກັນ

ໃນວັນທີ 5 ກັນຍາ 2022 ໄດ້ມີພິທີລົງນາມເຊັນບົດບັນທຶກວຽກງານການປະສານງານຮ່ວມກັນລະຫວ່າງຄະນະກຳມະການເສດຖະກິດແຜນການ ແລະການເງິນສະພາປະຊາຊົນແຂວງບໍລິຄຳໄຊ ແລະພະແນກການເງິນແຂວງບໍລິຄຳໄຊ ໂດຍການຮ່ວມລົງນາມລະຫວ່າງທ່ານ ສີສະຫວາດ ທັນທະບູນ ປະທານຄະນະກຳມະການເສດຖະກິດແຜນການ ແລະການເງິນ ສະພາປະຊາຊົນແຂວງບໍລິຄຳໄຊ ແລະທ່ານ ບຸນລ້ຽງ ດວງສະເພົາທອງ ຫົວໜ້າພະແນກກການເງິນແຂວງບໍລິຄຳໄຊໂດຍມີທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ແລະພາກສ່ວນກ່ຽວ ຂ້ອງສອງຝ່າຍເຂົ້າຮ່ວມ ເປັນສັກຂີພິຍານ.

ບົດບັນທຶກການປະສານງານສະບັບນີ້, ປະກອບດ້ວຍ 3 ໝວດ 6 ມາດຕາ ຊຶ່ງໄດ້ກຳນົດຫລັກການ, ເນື້ອໃນ, ວິທີການປະສານງານ ແລະມາດຕະການຈັດຕັ້ງປະຕິບັດ ລະຫວ່າງ ຄະນະກຳມະການເສດຖະກິດແຜນການ ແລະການເງິນສະພາປະຊາຊົນແຂວງ ກັບ ພະແນກການເງິນແຂວງກ່ຽວກັບການເຄື່ອນໄຫວວຽກງານແນໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ແລະລັດຖະບານໃນການຄຸ້ມຄອງການເງິນ, ກວດກາ, ທຸກຍູ້ສົ່ງເສີມ ແລະພັດພະນາຂະແໜງການເງິນໃຫ້ເຂັ້ມແຂງ, ມີປະສິດທິຜົນ, ໂປ່ງໃສ, ປະຢັດ ແລະສອດຄ່ອງກັບກົດໝາຍເພື່ອຮັບໃຊ້ໃຫ້ແຜນພັດທະນາເສດຖະກິດ-ສັງຄົມ ເພື່ອຈັດຕັ້ງຜັນຂະຫຍາຍເນື້ອໃນຈິດໃຈຂອງກົດໝາຍວ່າດ້ວຍ ສະພາປະຊາຊົນແຂວງ, ກົດໝາຍວ່າດ້ວຍງົບປະມານແຫ່ງລັດ ແລະ ມະຕິຂອງສະພາປະຊາຊົນແຂວງຮັບປະກັນໃຫ້ແກ່ການພົວພັນປະສານງານສອງຝ່າຍຫັນເຂົ້າສູ່ຫລັກການ, ສອດຄ່ອງກັບລະບຽບກົດໝາຍ ແລະທັງຮັບປະກັນຄຸນນະພາບ ໃນການປະຕິບັດພາລະບົດບາດ, ສິດ ແລະໜ້າທີ່ຂອງຕົນ.
ຂ່າວ-ພາບ: ສາຍສະໝອນ

แชร์