ສົ່ງເສີມພອນສະຫວັນຊາວໜຸ່ມ ແລະຊ່ວຍເຫລືອສັງຄົມ

ໃນວັນທີ 4 ກັນຍາ 2022 ມີພິທີເຊັນບົດບັນທຶກຮ່ວມມືຈັດກິດຈະກໍາສົ່ງເສີມພອນສະຫວັນຊາວໜຸ່ມ ແລະກິດຈະກໍາຊ່ວຍເຫຼືອສັງຄົມ ປີ 2022-2024 ລະຫວ່າງ ທ່ານນາງ ມີນາ ສີວິໄລ ຫົວໜ້າກົມຂະບວນການຊາວໜຸ່ມສູນກາງຊາວໜຸ່ມ ປະຊາຊົນ ປະຕິວັດລາວ ແລະ ທ່ານ ນາງ ອານິດ ສີວິໄຊ ຮອງປະທານບໍລິສັດ ມິສທີນກ້າວໜ້າລາວ, ທັງເປັນປະທານສູນຝາກຂາຍໂອດ໋ອບລາວ ໂດຍມີພາກສ່ວນກ່ຽວຂ້ອງຂອງທັງສອງຝ່າຍເຂົ້າຮ່ວມເປັນສັກຂີພິຍານ.

ໃນການຮ່ວມມືໃນກິດຈະກໍາໃນຄັ້ງນີ້, ມີທັງໝົດ 6 ກິດຈະກໍາຫລັກ ທີ່ຈະໄດ້ເຮັດຮ່ວມກັນເປັນຕົ້ນ, ຈັດຊຸດຝຶກອົບຮົມ ແລະການແຂ່ງຂັນຟ້ອນລຳວົງ 5 ຈັ່ງຫວະ ໃຫ້ແກ່ຊາວໜຸ່ມບັນດາກະຊວງ,ອົງການ ແລະນະຄອນຫລວງວຽງຈັນ; ຈັດງານສັບປະດາຫັດຖະກຳຊົນເຜົ່າ; ຈັດການແຂ່ງຂັນແຕ່ງໜ້າຊີງຂັນທ່ານເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ; ໂຄງການແລກປ່ຽນວັດທະນະທໍາກັບຕ່າງປະເທດ (ສສ ຫວຽດນາມ); ແຂ່ງຂັນພອນສະຫວັນຂອງຊາວໜຸ່ມທາງດ້ານບົດຟ້ອນ, ຮ້ອງເພັງ ຫລືດ້ານອື່ນໆ ແລະກິດຈະກໍາຊ່ວຍເຫລືອສັງຄົມ.

ໃນບົດບັນທຶກດັ່ງກ່າວລະບຸໄວ້ວ່າ: ກົມຂະບວນການຊາວໜຸ່ມຈະເປັນຜູ້ຊີ້ນຳ-ນຳພາທາງດ້ານເນື້ອໃນ, ຮູບການ, ເປັນຜູ້ຂຶ້ນແຜນລະອຽດກິດຈະກໍາ, ວິທີຈັດການແຂ່ງຂັນ ແລະ ກິດຈະກຳຕ່າງໆ, ການຂໍອະນຸມັດ ແລະ ຂໍທິດຊີ້ນຳຈາກພາສ່ວນທີ່ກ່ຽວຂ້ອງ, ອໍານວຍຄວາມສະດວກທາງດ້ານ ເອກະສານຕ່າງໆ, ປະສານງານກັບພາກສ່ວນທີ່ກ່ຽວຂ້ອງ ຢູ່ຂັ້ນສູນກາງຮອດທ້ອງຖິ່ນ ແລະ ຮັບຜິດຊອບຄຸ້ມຄອງບໍລິຫານຈັດການແຂ່ງຂັນ, ທັງເປັນຜູ້ຂຶ້ນລະອຽດແຜນກິດຈະກຳ, ນໍາພາຈັດກອງປະຊຸມປຶກສາຫາລື ແຕ່ລະໄລຍະໃນການກະກຽມໂຄງການທັງໝົດ ແລະ ຊ່ວຍເປັນເຈົ້າການເຜີຍແຜ່ການແຂ່ງຂັນທຸກຮອບລົງໃນຊ່ອງທາງສື່ໂຄສະນາຂອງພາກສ່ວນຕົນເອງ.

ສຳລັບບໍລິສັດມິສທີນກ້າວໜ້າລາວ,ສູນຝາກຂາຍໂອດ໋ອບລາວຈະເປັນຜູ້ອອກແບບຮູບແບບວິທີຈັດການຕະຫລາດປະຊາສໍາພັນຜ່ານສື່,ກຽມອຸປະກອນຮັບໃຊ້ການແຂ່ງຂັນ ແລະປ້າຍໂຄສະນາຕ່າງໆຕາມລະບຽບຫລັກການໂດຍການເຫັນດີຂອງທັງສອງຝ່າຍ,ເປັນເຈົ້າການລະດົມທຶນ, ຊອກຫາຜູ້ອຸປະຖໍາ ແລະ ງົບປະມານບໍລິຫານທັງໝົດຂອງທຸກກິດຈະກໍາເປັນຕົ້ນເງິນລາງວັນ, ຂັນລາງວັນ ແລະການບໍລິຫານທັງໝົດ ໂດຍການປະສານສົມທົບກັບກົມຂະບວນການຊາວໜຸ່ມ, ສ້າງປຶ້ມປະມວນພາບນັບແຕ່ຂັ້ນຕອນປະກອບເອກະສານເຂົ້າຮ່ວມຄັດເລືອກ ແລະຮອບຊະນະເລີດ, ທັງມີເນື້ອໃນ, ຮູບພາບ,ເອກະສານປະກອບທຸກໆຢ່າງພ້ອມທັງຜະລິດປຶ້ມປະມວນພາບ ຈຳນວນ 5 ຫົວ, ກຳນົດເວລາ 30 ວັນໃຫ້ສໍາເລັດ.
ຂ່າວ: ກິດຕາ ພາບ: ຂັນໄຊ

แชร์