ສຳມະນາວິທະຍາສາດ ກ່ຽວກັບການຮຽບຮຽງປະຫວັດສາດຊາດລາວ ເຫຼັ້ມ 1 (ສະໄໝບູຮານ)

ສະພາທິດສະດີສູນກາງພັກ (ສທພ) ໄດ້ຈັດກອງປະຊຸມສຳມະນາວິທະຍາສາດ ກ່ຽວກັບ ການຮຽບຮຽງປະຫວັດສາດລາວ ເຫຼັ້ມ 1 (ສະໄໝບູຮານ) ຂຶ້ນໃນວັນທີ 2 ກັນຍາ 2022 ທີ່ຫ້ອງປະຊຸມຂອງ ສທພ ພາຍໃຕ້ການເປັນປະທານຂອງ ທ່ານ ຄໍາພັນ ເຜີຍຍະວົງ ເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານ ສທພ; ມີ ທ່ານ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງສູນກາງພັກອະດີດຮອງນາຍົກລັດຖະມົນຕີທີ່ປຶກສາ ສທພ, ມີບັນດາສະມາຊິກ ສທພ, ບັນດາທ່ານຜູ້ອາວຸໂສກ່ຽວຂ້ອງ ແລະຄະນະຮຽບຮຽງປຶ້ມປະຫວັດສາດເຂົ້າຮ່ວມ.

ໂອກາດນີ້, ທ່ານ ຄໍາພັນ ເຜີຍຍະວົງ ໄດ້ກ່າວເປີດກອງປະຊຸມວ່າ: ໂຄງການຮຽບຮຽງປຶ້ມປະຫວັດສາດຊາດລາວໄລຍະແຕ່ສະໄໝບູຮານຮອດສະໄໝເຈົ້າອານຸວົງນຳພາກອບກູ້ເອກະລາດ, ເປັນໜຶ່ງໃນ 9 ໂຄງການຄົ້ນຄວ້າທິດສະດີ ແລະ ພຶດຕິກໍາຂອງພັກເຮົາ ທີ່ສະພາວິທະຍາສາດສັງຄົມແຫ່ງຊາດເມື່ອກ່ອນນີ້ວາງອອກ ແລະ ໄດ້ແຕ່ງຄະນະຮັບຜິດຊອບດຳເນີນໂຄງການ ອັນປະກອບດ້ວຍນັກຄົ້ນຄວ້າດ້ານປະຫວັດສາດທັງຜູ້ອາວຸໂສບຳນານ ແລະນັກຄົ້ນຄວ້າທີ່ຍັງປະຈໍາການຕາມກະຊວງ/ອົງການກ່ຽວຂ້ອງຈຳນວນ 12 ທ່ານ. ໂຄງການນີ້ ບໍ່ແມ່ນໂຄງການທີ່ຕ້ອງຂຽນປະຫວັດສາດຊາດລາວຂຶ້ນມາໃໝ່ຕັ້ງແຕ່ຕົ້ນ, ຫາກເປັນການຮຽບຮຽງ, ປັບປຸງ, ດັດແກ້ ແລະ ບັນນາທິການຄືນເອກະສານປະຫວັດສາດ ອັນເປັນຕົ້ນສະບັບທີ່ຄະນະຂອງ ທ່ານ ມະຫາສີລາ ວິຣະວົງ ແລະທ່ານ ມະຫາຄຳຈຳປາ ແກ້ວມະນີ, ໂດຍພາຍໃຕ້ການຊີ້ນຳຂອງ ທ່ານ ພູມີ ວົງວິຈິດ ໄດ້ຂຽນອອກຕັ້ງແຕ່ຊຸມປີ 1980 ຂອງສັດຕະວັດກ່ອນ.

ໂຄງການນີ້ ະນະຮຽບຮຽງໄດ້ຈັດເປັນ 3 ແຜນງານ ໂດຍຈະເຮັດເປັນປຶ້ມປະຫວັດສາດ III ເຫຼັ້ມຄື: ປະຫວັດສາດຊາດລາວ ເຫຼັ້ມ I (ສະໄໝບູຮານ); ປະຫວັດສາດຊາດລາວ ເຫຼັ້ມ II (ສະໄໝອານາຈັກລາວລ້ານຊ້າງ); ປະຫວັດສາດຊາດລາວ ເຫຼັ້ມ III (ສະໄໝອານາຈັກລາວລ້ານຊ້າງເສື່ອມຖອຍ ແລະ ຂະບວນການກອບກູ້ເອກະລາດ ພາຍໃຕ້ການນຳພາຂອງເຈົ້າອານຸວົງ). ຜ່ານການດຳເນີນງານຢ່າງຕັ້ງໜ້າ ແລະດ້ວຍຄວາມຮັບຜິດຊອບຂອງຄະນະໂຄງການ, ການຮຽບຮຽງປະຫວັດສາດຊາດລາວ ເຫຼັ້ມ I (ສະໄໝບູຮານ) ໄດ້ສໍາເລັດຂັ້ນພື້ນຖານ. ເນື່ອງຈາກວ່າ ລະດັບຄາດໝາຍຂອງການສ້າງປຶ້ມເຫຼັ້ມນີ້ແມ່ນສູງ ໂດຍສ້າງເປັນປຶ້ມປະຫວັດສາດສະບັບທີ່ເປັນທາງການຂອງລາວເຮົາ ແລະ ສະພາທິດສະດີສູນກາງພັກເປັນຜູ້ຮັບຮອງ. ກອງປະຊຸມຄັ້ງນີ້, ແມ່ນໄດ້ເຊີນບັນດາທ່ານທີ່ເປັນຜູ້ຮູ້ຜູ້ເຂົ້າໃຈເລິກເຊິ່ງກ່ຽວກັບປະຫວັດສາດຂອງຊາດເຮົາເພື່ອພ້ອມກັນປະກອບຄວາມຄິດຄວາມເຫັນຕໍ່ກັບເນື້ອໃນຂອງປຶ້ມເຫຼັ້ມນີ້ ແນໃສ່ເຮັດໃຫ້ປຶ້ມເຫຼັ້ມນີ້ມີເນື້ອໃນຄົບຖ້ວນສົມບູນຂຶ້ນຕື່ມ, ໃຫ້ສົມກັບວ່າເປັນປຶ້ມປະຫວັດສາດສະບັບທີ່ເປັນທາງການຂອງລາວເຮົາ.

ທ່ານ ຄໍາພັນ ເຜີຍຍະວົງ ຍັງໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມ ງເຊີດຊູຄວາມຮັບຜິດຊອບການເມືອງຂອງຕົນພ້ອມກັນສຶກສາຄົ້ນຄວ້າປະກອບຄວາມເຫັນຢ່າງຕັ້ງໜ້າ, ສ້າງສັນ ແລະເປັນປະໂຫຍດເພື່ອຄະນະຮຽບຮຽງນຳໄປປັບປຸງໃຫ້ເໝາະສົມ ແລະບັນລຸຕາມຈຸດປະສົງລະດັບຄາດໝາຍວາງໄວ້.

แชร์