ເຈົ້າແຂວງເຊກອງ ເຂົ້າອວຍພອນວັນຊາດຫວຽດນາມ ຄົບຮອບ 77 ປີ

ໃນວັນທີ 1 ກັນຍາ 2022, ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ພ້ອມຄະນະໄດ້ເຂົ້າອວຍພອນທ່ານ ຫງວຽນ ວັນ ຈຸງ ສະຖານກົງສູນແຫ່ງ ສສ ຫວຽດນາມ ປະຈຳນະຄອນປາກເຊ ແຂວງຈໍາປາສັກ ເນື່ອງໃນໂອກາດ ວັນສະຖາປະນາ ສາທາລະນະລັດ ສັງຄົມນິຍົມ ຫວຽດນາມ ຄົບຮອບ 77 ປີ (2 ກັນຍາ 1945-2 ກັນຍາ 2022).

ໂອກາດນີ້, ທ່ານ ເຫຼັກໄຫຼ ສີວິໄລ ໄດ້ສະແດງຄວາມຊົມເຊີຍ ແລະຕີລາຄາສູງຕໍ່ບັນດາຜົນສໍາເລັດທີ່ປະຊາຊົນຫວຽດນາມຍາດໄດ້ຕະຫຼອດ 77 ປີຜ່ານມາພາຍໃຕ້ການນໍາພາອັນຖືກຕ້ອງ, ສະຫຼາດສ່ອງໃສຂອງພັກກອມມູນິດຫວຽດນາມ. ພ້ອມນັ້ນ, ທ່ານເຈົ້າແຂວງເຊກອງຍັງໄດ້ສະແດງຄວາມພາກພູມໃຈ ແລະຕີລາຄາສູງຕໍ່ການພົວພັນຮ່ວມມືຮອບດ້ານລະຫວ່າງ ສອງປະເທດລາວ ແລະຫວຽດນາມ ເວົ້າລວມ ໂດຍສະເພາະແຂວງເຊກອງ ກັບ ສສ ຫວຽດນາມ ທີ່ນັບມື້ນັບໜັກແໜ້ນ ແລະ ເລິກຊຶ່ງ, ສະແດງຄວາມຂອບໃຈຢ່າງຈິງໃຈ ແລະຮູ້ບຸນຄຸນຢ່າງສູງຕໍ່ພັກ, ລັດ ແລະປະຊາຊົນຫວຽດນາມອ້າຍນ້ອງທີ່ໄດ້ໃຫ້ການຊ່ວຍເຫຼືອແຂວງເຊກອງເປັນຢ່າງດີຕະຫຼອດມາ. ພ້ອມອວຍພອນ ໂດຍຜ່ານທ່ານ ຫງວຽນ ວັນ ຈຸງ ສະຖານກົງສູນແຫ່ງ ສສ ຫວຽດນາມ ປະຈໍານະຄອນປາກເຊ ສປປ ລາວ ໄປຍັງບັນດາທ່ານການນໍາພັກ-ລັດ ແລະປະຊາຊົນຫວຽດນາມ ຈົ່ງຍາດໄດ້ໄຊຊະນະໃໝ່ຍິ່ງໃຫຍ່ກວ່າເກົ່າ ແລະອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງຊາດ ລາວ-ຫວຽດນາມ ຈົ່ງໝັ້ນຄົງຂະໜົງແກ່ນຕະຫຼອດກາລະນານ.

ໃນໂອກາດດຽວກັນນີ້, ທ່ານ ຫງວຽນ ວັນ ຈຸງ ກໍໄດ້ສະແດງຄວາມຂອບໃຈຕໍ່ ທ່ານ ເຫຼັກໄຫຼ ສີວິໄລ ທີ່ໄດ້ນໍາພາຄະນະມາອວຍພອນໃນຄັ້ງນີ້ພ້ອມທັງໄດ້ຕີລາຄາສູງຕໍ່ການພົວພັນຮ່ວມມືລະຫວ່າງແຂວງເຊກອງກັບບັນດາແຂວງຕ່າງໆຂອງ ສສ ຫວຽດນາມ ໃນຕະຫຼອດໄລຍະຜ່ານມາ ແລະອວຍພອນໃຫ້ທ່ານເຈົ້າແຂວງເຊກອງພ້ອມດ້ວຍການນໍາແຂວງຈົ່ງປະສົບຜົນສຳເລັດໃນການນໍາພາປະຊາຊົນບັນດາເຜົ່າຊາວແຂວງເຊກອງຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນ ປະຕິວັດລາວ ແລະມະຕິກອງປະຊຸມໃຫຍ່ຄັ້ງທີ X ຂອງອົງຄະພັກແຂວງເຊກອງວາງອອກຢ່າງມີໄຊ.
(ຂ່າວ-ພາບ: ສັນຍາ)

แชร์