ຮອງນາຍົກຕ້ອນຮັບການເຂົ້າຢ້ຽມອໍາລາຂອງທູດ ສ ເກົາຫຼີ ປະຈໍາ ສປປ ລາວ

ໃນວັນທີ 2 ກັນຍາ 2022 ທ່ານ ສະເຫຼີມໄຊ ກົມມະສິດ ຮອງນາ ຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອໍາລາຂອງ ທ່ານ ອິມ ມູ ຮົງ (Im Moo-hong) ເອກອັກຄະລັດຖະທູດ ແຫ່ງ ສາທາລະນະລັດ ເກົາຫລີ ປະຈໍາ ສປປ ລາວ ໃນໂອກາດທີ່ສໍາເລັດການປະຕິບັດໜ້າທີ່ການທູດ ຢູ່ ສປປ ລາວ.

ໂອກາດດັ່ງກ່າວ, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະຊົມເຊີຍຕໍ່ຜົນສໍາເລັດທີ່ຍາດມາໄດ້ໃນການປະຕິບັດໜ້າທີ່ຢູ່ ສປປ ລາວ ຂອງ ທ່ານ ອິມ ມູ ຮົງ ຕະລອດໄລຍະເວລາເກືອບ 2 ປີ ຜ່ານມາ (ນັບຕັ້ງແຕ່ເດືອນກຸມພາ 2021- ກັນຍາ 2022), ຊຶ່ງທ່ານທູດໄດ້ປະກອບສ່ວນອັນສໍາຄັນເຂົ້າໃນການຊຸກຍູ້ການພົວພັນ ແລະການຮ່ວມມືສອງຝ່າຍຂອງສອງປະເທດເປັນຕົ້ນແມ່ນການແລກປ່ຽນການຢ້ຽມຢາມຂອງການນໍາຂັ້ນຕ່າງໆ ຂອງສອງປະເທດ, ຊຸກຍູ້ ແລະຕິດຕາມການຈັດຕັ້ງປະຕິບັດບັນດາໂຄງການຊ່ວຍເຫຼືອທາງການເພື່ອການພັດທະນາ (ODA) ເຊັ່ນ: ໂຄງການພັດທະນາຊົນນະບົດແບບ ສ ເກົາຫຼີ ໃນຂອບ ເຂດທົ່ວປະເທດ, ໂຄງການປ້ອງກັນຕາຝັ່ງເຈື່ອນແມ່ນໍ້າຂອງ (ໄລຍະ II), ພິເສດແມ່ນການຊຸກຍູ້ການຊ່ວຍເຫຼືອດ້ານທຶນການສຶກສາຂອງ ສ ເກົາຫຼີ ໃຫ້ແກ່ພະນັກງານ ແລະນັກສຶກສາລາວ. ພ້ອມນີ້, ທ່ານກໍໄດ້ຕີລາຄາສູງຕໍ່ການພົວພັນຮ່ວມມືສອງຝ່າຍລະຫວ່າງ ສປປ ລາວ ແລະ ສ ເກົາຫຼີ ທີ່ໄດ້ຮັບການເສີມຂະຫຍາຍຫລາຍດ້ານ ແລະກວ້າງຂວາງຍິ່ງຂຶ້ນ ເປັນຕົ້ນດ້ານການຄ້າ, ການລົງທຶນ, ການທ່ອງທ່ຽວ, ການພັດທະນາຊັບພະຍາກອນມະນຸດ, ສາທາລະນະສຸກ, ດ້ານແຮງງານ, ໂຄງລ່າງພື້ນຖານ ແລະ ອື່ນໆ. ການຊ່ວຍເຫລືອ ODA ຂອງ ສ ເກົາຫລີ ຈັດຢູ່ໃນອັນດັບຕົ້ນໆຂອງການຊ່ວຍເຫຼືອ ODA ໃນ ສປປ ລາວ, ການລົງທຶນຂອງ ສ ເກົາຫລີ ຢູ່ ສປປ ລາວ ຈັດເປັນອັນດັບທີ 5 ຂອງການລົງທຶນໂດຍກົງຈາກຕ່າງປະເທດໃນ ສປປ ລາວ. ນອກນີ້, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ແຈ້ງໃຫ້ຊາບກ່ຽວກັບແຜນການເດີນທາງຢ້ຽມຢາມ ສ ເກົາຫຼີ ຢ່າງເປັນທາງການໃນລະຫວ່າງວັນທີ 5-8 ກັນຍາ 2022.

ໃນໂອກາດດຽວກັນນີ້, ທ່ານ ອິມ ມູ ຮົງ ກໍໄດ້ສະແດງຄວາມຂອບໃຈຕໍ່ການຕ້ອນຮັບຂອງທ່ານຮອງນາຍົກລັດຖະມົນຕີ ສະເຫລີມໄຊ ກົມມະສິດ ພ້ອມທັງໄດ້ສະແດງຄວາມຂອບໃຈຕໍ່ລັດຖະບານ ແລະປະຊາຊົນລາວໂດຍສະເພາະກະຊວງການຕ່າງປະເທດທີ່ໄດ້ອໍານວນຄວາມສະດວກໃຫ້ແກ່ ການເຄື່ອນໄຫວປະຕິບັດໜ້າທີ່ຈົນປະສົບຜົນສໍາເລັດຢ່າງຈົບງາມ ແລະຢືນຢັນວ່າເຖິງວ່າຈະສໍາເລັດໜ້າທີ່ການທູດ ຢູ່ ສປປ ລາວ ແລ້ວກໍຕາມ, ແຕ່ຍັງຈະສືບຕໍ່ເປັນຂົວຕໍ່ປະກອບສ່ວນເຂົ້າໃນການຮັດແໜ້ນ ແລະເສີມຂະຫຍາຍສາຍພົວພັນມິດຕະພາບ ແລະການຮ່ວມມືທີ່ດີລະຫວ່າງສອງປະເທດໃຫ້ສືບຕໍ່ມີບາດກ້າວຂະຫຍາຍຕົວ ແລະແໜ້ນແຟ້ນຍິ່ງໆຂຶ້ນໃນອະນາຄົດ.

แชร์