ເມືອງນານຄົ້ນຄວ້າແຜນໄຕມາດ 3 ການຄຸ້ມຄອງປ່າໄມ້ແບບພູມມີທັດ ແລະສົ່ງເສີມຊີວິດການເປັນຢູ່ຂອງປະຊາຊົນ

ໃນລະຫວ່າງວັນທີ 1-2 ກັນຍາ 2022 ທີ່ຫ້ອງປະຊຸມໃຫຍ່ຂອງເມືອງນານ ແຂວງຫຼວງພະບາງ ໄດ້ຈັດກອງປະຊຸມຄົ້ນຄວ້າຜ່ານແຜນໄຕມາດ 3 ການຈັດຕັ້ງປະຕິບັດການຄຸ້ມຄອງປ່າໄມ້ແບບພູມມີທັດ ແລະ ສົ່ງເສີມຊີວິດການເປັນຢູ່ຂອງໂຄງການ I-GFLL ໂດຍການເປັນປະທານຂອງທ່ານ ແສງເພັດ ເພັດດວງຈັນ ຮອງເຈົ້າເມືອງ-ເມືອງນານ, ທ່ານ ສົມໝາຍ ຄອນສະຫວັນ ຫົວໜ້າຂະແໜງປ່າໄມ້ຜູ້ປະສານງານໂຄງການຂັ້ນແຂວງ, ມີຄະນະປະສານງານໂຄງການຂັ້ນເມືອງ, ວິຊາການປະສານງານ, ທີມງານຂອງແຂວງ ແລະທີມງານໂຄງການ Giz ເຂົ້າຮ່ວມ.

ທ່ານ ແສງເພັດ ເພັດດວງຈັນ ຮອງເຈົ້າເມືອງ-ເມືອງນານ ກໍ່ໄດ້ກ່າວເປີດກອງປະຊຸມ ໃນຄັ້ງນີ້ເພື່ອໃຫ້ກໍາໄດ້ບັນດາໜ້າວຽກ, ງົບປະມານ ແລະຄວາມສ່ຽງຕ່າງໆທີ່ອາດເກີດຂຶ້ນໄດ້ໃນການຈັດຕັ້ງປະຕິບັດໂຄງການ, ທັງເປັນການທົບທວນຄືນຮູບແບບ, ຂະບວນການ, ວິທີການ ແລະ ເຄື່ອງມືໃນການຈັດຕັ້ງປະຕິບັດເຂົ້າໃນວຽກງານ, ໄຈ້ແຍກບັນຫາສິ່ງທ້າທາຍ ແລະກໍານົດທິດທາງໃຫ້ສອດຄ່ອງກັບສະພາບຕົວຈິງຂອງແຕ່ລະທ່ອງຖິ່ນແນໃສ່ເຮັດໃຫ້ເຈົ້າຂອງໂຄງການ POs ແຂວງ ແລະ ເມືອງໄດ້ມີຄວາມເຂົ້າໃຈໃນໜ້າວຽກ, ຄໍານຶງໄດ້ຄວາມສ່ຽງສິ່ງທ້າທາຍ ແລະທິດທາງທີ່ມີປະສິດທິຜົນໃນການຈັດຕັ້ງປະຕິບັດລວມເຖິງການປະສານງານໂຄງການມີຄວາມແໜ້ນແຟ້ນ, ຮັດກຸມຄຸ້ມຄອງໄດ້ໃນລະບົບລວມສູນ.

ຈາກນັ້ນ ທ່ານ ສຸລິໂຍ ໄຊວິສິດ ຫົວໜ້າຫ້ອງການກະສິກໍາ ແລະປ່າໄມ້ເມືອງນານກໍ່ໄດ້ຜ່ານບົດລາຍງານການຈັດຕັ້ງປະຕິບັດວຽກງານໂຄງການຈັດຕັ້ງປະຕິບັດການຄຸ້ມຄອງປ່າໄມ້ແບບພູມມີທັດ ແລະ ສົ່ງເສີມຊີວິດການເປັນຢູ່ (ໂຄງການ I-GFLL) ໃນໄລຍະຜ່ານມາເມືອງນານໄດ້ຈັດຕັ້ງປະຕິບັດຢູ່ 5 ກຸ່ມບ້ານ, ມີ 13 ບ້ານເປົ້າໝາຍ ມີ 1.830 ຄອບຄົວ ແລະໄດ້ແບ່ງເປັນແຕ່ລະໄຕມາດ ໂດຍໄດ້ຮັບເງີນງົບປະມານຈາກໂຄງການໃນເວລາຈັດຕັ້ງປະຕິບັດກິດຈະກໍາ ໃນໄຕມາດ 1 ແລະໄຕມາດ 2 ປີ 2021 ລວມທັງໝົດ 513.162.280ກີບ, ຈັດຕັ້ງປະຕິບັດແລ້ວ 482.711.900 ກີບ,ໃນການຈັດຕັ້ງປະຕິບັດວຽກງານດັ່ງກ່າວແມ່ນມີຜົນສໍາເລັດໃນຫຼາຍດ້ານເປັນຕົ້ນສໍາເລັດການເຊັນສັນຍາການຄຸ້ມຄອງປ່າໄມ້ 4 ບ້ານ, ການວາງແຜນນໍາໃຊ້ທີ່ດິນກະສິກໍາ ແລະປ່າໄມ້ແບບມີສ່ວນຮ່ວມຂັ້ນບ້ານ 6 ບ້ານ, ໃນນີ້ຍັງໄດ້ຈັດຕັ້ງປະຕິບັດກິດຈະກໍາສົ່ງເສີມ ແລະວາງແຜນການຜະລິດໃຫ້ປະຊາຊົນບ້ານເປົ້າໝາຍ 5 ບ້ານ, ເຊິ່ງໄດ້ຄັດເລືອກຄົວເຮືອນເຂົ້າຮ່ວມໂຄງການທັງໝົດ 145 ຄອບຄົວ, ມີເນື້ອທີ່ຕອນດິນທັງໝົດ 180.89 ເຮັກຕາ ແລະວຽກງານອຶ່ນໆ.

ຈາກນັ້ນບັນດາຜູ້ເຂົ້າຮ່ວມກອງປະຊຸມຍັງໄດ້ຮັບຟັງການນໍາສະເໜີສິ່ງທ້າທາຍໃນການຈັດຕັ້ງປະຕິບັດ ແລະການປະສານງານຈາກຂະແໜງສົ່ງເສີມ, ຮັບຟັງການຊີ້ແຈງລາຍການກິດຈະກໍາງົບປະມານພາຍໃນແຜນໄຕມາດ 3 ປີ 2022 ແລະ ຄວາມສ່ຽງທີ່ຕ້ອງຄໍານຶງເຖິງຈາກທີມງານວິຊາການໂຄງການ Giz ຈາກນັ້ນກໍ່ໄດ້ແບ່ງເປັນ 3 ກຸ່ມເພື່ອທົບທວນຄົ້ນຄ້ວາລາຍລະອຽດກ່ຽວກັບຫົວຂໍ້ກິດຈະກໍາວິເຄາະບັນຫາສິ່ງທ້າທາຍຕ່າງໆ ເພື່ອໃຫ້ທຸກພາກສ່ວນມີຄວາມເຂົ້າໃຈໃນການຈັດຕັ້ງປະຕິບັດໃນແຜນໄຕມາດ. ກອງປະຊຸມດັ່ງກ່າວດໍາເນີນເປັນເວລາ 2 ວັນເຖິງຈະສໍາເລັດ.
ຂ່າວ: ຫຸມແພງ ສີດາໄລ

แชร์