ຈີນ ຖືສໍາຄັນໃນການຄົ້ນຄວ້າວິໄຈ ແລະ ນໍາໃຊ້ພະລັງງານສະອາດ

ລັດຖະບານ ຈີນໃຫ້ຄວາມສໍາຄັນເປັນພິເສດໃນການຄົ້ນຄວ້າ, ພັດທະນາ ແລະນໍາໃຊ້ພະລັງງານສະອາດເພື່ອໃຫ້ເປັນມິດຕໍ່ສະພາບແວດລ້ອມກໍຄືແນໃສ່ຫຼຸດຜ່ອນການນໍາໃຊ້ພະລັງງານຈາກເຊື້ອໄຟແນໃສ່ເຮັດໃຫ້ການປ່ອນກາກບອນພາຍໃນປະເທດນັບມື້ຫລຸດລົງ, ດັ່ງນັ້ນຈິ່ງເກີດມີການວິໄຈ ແລະພັດທະນາດ້ານພະລັງງານສະອາດຂອງບັນດາບໍລິສັດກໍຄືສະຖາບັນວິໄຈຕ່າງໆ ຢ່າງຫຼວງຫຼາຍ.

ສະຖາບັນວິໄຈພະລັງງານສະອາດ Huaneng ຂອງຈີນ (China Huaneng Clean Energy Research Institute: CERI) ແມ່ນສະຖາບັນໜຶ່ງທີ່ຂຶ້ນກັບກຸ່ມບໍລິສັດ Huaneng ຂອງຈີນ (China Huaneng Group: CHNG), ມີສໍານັກງານຕັ້ງຢູ່ນະຄອນຫຼວງປັກກິ່ງ,ຊຶ່ງມີໜ້າທີ່ຄົ້ນຄວ້າວິໄຈ ແລະ ພັດທະນາເຕັກໂນໂລຊີກ່ຽວກັບພະລັງງານສະອາດ ລວມມີ: ພະລັງງານລົມ, ພະລັງງານແສງຕາເວັນ, ການເກັບຮັກສາພະລັງງານ, ໄຮໂດຣເຈນສີຂຽວ, ການເຊື່ອມຕໍ່ເຄືອຂ່າຍໄຟຟ້າ, ລະບົບພະລັງງານລວມ, ຄວາມຮ້ອນແບບອັດສະລິຍະ, ການຈັບກາກບອນ, ການນໍາໃຊ້ປະໂຫຍດ ແລະ ການເກັບຮັກສາ (CCUS).

CERI ຍັງມີໜ້າທີ່ສະໜອງການບໍລິການວິໄຈ, ການພັດທະນາ ແລະວິສະວະກໍາໃນຂະແຫນງການທີ່ກ່າວມາຂ້າງເທິງ ເຊັ່ນ: ການຖ່າຍທອດເຕັກໂນໂລຊີ, ການອອກແບບອຸປະກອນທີ່ສໍາຄັນ ແລະ ການພັດທະນາ, ການໃຫ້ຄໍາປຶກສາໂຄງການ, ວິສະວະກໍາ, ການຈັດຊື້ ແລະ ການກໍ່ສ້າງ. ນອກຈາກນີ້ CERI ຍັງແມ່ນອົງກອນສະໜັບສະໜູນຂອງສູນວິໄຈພະລັງງານທົດແທນ, ສູນເຕັກໂນໂລຊີລົມນອກແຄມຝັ່ງ ແລະສູນຊັບສິນທາງປັນຍາຂອງ CHNG.

ທ່ານ ຫຼີ ເຫວ໋ຕົງ (Li Weidong), ປະທານຄະນະກໍາມະການບໍລິຫານສະຖາບັນວິໄຈພະລັງງານສະອາດ Huaneng ຂອງຈີນ ໃຫ້ຮູ້ໃນໂອກາດທີ່ສື່ມວນຊົນຈາກຕ່າງປະເທດໄປຢ້ຽມຊົມສະຖາບັນດັ່ງກ່າວໃນ ວັນທີ 31 ສິງຫາ 2022 ຜ່ານມານີ້ວ່າ: ຄວາມຫວັງຂອງ CERI ແມ່ນການບັນລຸເປົ້າໝາຍ “ ການຫຼຸດກາກບອນຄວບຄູ່ສອງປະການ ” ຊຶ່ງມີບົດບາດຢ່າງຕັ້ງຫນ້າໃນການປັບໂຄງສ້າງ, ການສ້າງທີມງານ ແລະ ການເສີມສ້າງຄວາມອາດສາມາດຂອງສະຖາບັນໃຫ້ນັບມື້ດີຂຶ້ນຢ່າງຕໍ່ເນື່ອງໂດຍໄດ້ຍົກລະດັບການຄົ້ນຄວ້າວິໄຈຈາກພະລັງງານສະອາດທີ່ໃຊ້ຖ່ານຫີນມາເປັນພະລັງງານໃຫມ່ທີ່ໄດ້ຮັບຜົນສໍາເລັດໂດຍສະເພາະພະລັງງານລົມ, ພະລັງງານແສງຕາເວັນ, ພະລັງງານໄຮໂດຣເຈນ ແລະການເກັບຮັກສາພະລັງງານເຊີ່ງມີທີມງານຄົ້ນຄວ້າວິໄຈໜຸ່ມເກືອບ 400 ຄົນ ທີ່ມີການສຶກສາສູງ ແລະ ເຕັມໄປດ້ວຍຄຸນນະພາບ, ມີຫລາຍຄົນຈົບຈາກຕ່າງປະເທດ ແລະເປັນຜູ້ສືບທອດທີ່ດີໃນອະນາຄົດ.

CHNG ເປັນກຸ່ມບໍລິສັດທີ່ລັດຖະບານຈີນເປັນເຈົ້າຂອງ, ມາຮອດປັດຈຸບັນໄດ້ລົງທຶນດ້ານພະລັງງານສະອາດຫຼາຍໂຄງການທຸກລະດັບຢູ່ຫຼາຍປະເທດທົ່ວໂລກ ແລະ ເປັນບໍລິສັດທໍາອິດໃນບັນດາວິສາຫະກິດຜະລິດໄຟຟ້າຂອງຈີນທີ່ເຂົ້າຮ່ວມໃນການຈັດອັນດັບຂອງ Fortune Global 500 ໂດຍຖືກຈັດຢູ່ໃນອັນດັບທີ 215 ໃນປີ 2022, ເພີ່ມສູງຂຶ້ນ 33 ອັນດັບເມື່ອທຽບໃສ່ປີ 2021 ຜ່ານມາ.

ຈາກຜົນສໍາເລັດດັ່ງກ່າວ ປະຕິເສດບໍ່ໄດ້ວ່າ CERI ແມ່ນມີສ່ວນສໍາຄັນໜຶ່ງທີ່ຂາດບໍ່ໄດ້ເພາະເປັນສະຖາບັນທີ່ຂຶ້ນກັບ CHNG ທີ່ມີໜ້າທີ່ຄົ້ນຄວ້າວິໄຈ ແລະພັດທະນາເຕັກໂນໂລຊີກ່ຽວ ກັບພະລັງງານສະອາດເຮັດໃຫ້ CERI ໄດ້ຮັບຜົນສໍາເລັດ ແລະໄດ້ຮັບລາງວັນສໍາຄັນຕ່າງໆ ເປັນຕົ້ນ: ດໍາເນີນໂຄງການວິທະຍາສາດລະດັບຊາດ 39 ໂຄງການ, ໄດ້ຮັບລາງວັນທາງວິທະຍາສາດ ແລະເຕັກໂນໂລຊີຫລາຍກວ່າ 80 ລາງວັນ, ລາງວັນທີ 1 ແລະ 2 ໃນດ້ານວິທະຍາສາດ ແລະເຕັກໂນໂລຊີຂອງລັດ ແລະ ລາງວັນສໍາຄັນອື່ນໆ ຢ່າງຫຼວງຫຼາຍ.
Cr: BT

แชร์