ທະນາຄານ ເອຊີລີດາ ລາວ ຈຳກັດ ເປີດນຳໃຊ້ ຕູ້ຝາກ-ຖອນເງິນ ຢ່າງເປັນທາງການ

ໃນວັນທີ 01 ກັນຍາ 2022, ທະນາຄານ ເອຊີລີດາ ລາວ ຈໍາກັດ, ປະຊາທະນາຄານທີ່ທ່ານໄວ້ວາງໃຈ ແລະ ມີວິໄສທັດເປັນຜູ້ນໍາໃນດ້ານທະນາຄານເພື່ອທຸລະກິດຂະໜາດນ້ອຍ ແລະ ຂະໜາດກາງໃນ ສປປ ລາວ ໄດ້ເປີດຕົວນໍາໃຊ້ ຕູ້ຝາກ-ຖອນເງິນ "Cash Recycling Machine (CRM)" ທີ່ລູກຄ້າສາມາດຝາກເງິນ ແລະຖອນເງິນໄດ້ໃນຕູ້ດຽວກັນ.

ທ່ານ ນາງ ໄກສອນ ລິນທອງ, ຫົວໜ້າພະແນກການຕະຫຼາດຂອງທະນາຄານ ເອຊີລີດາ ລາວ ຈຳກັດ ໄດ້ກ່າວວ່າ: ເພື່ອອຳນວຍຄວາມສະດວກໃຫ້ແກ່ລູກຄ້າໃນການຝາກ-ຖອນເງິນດ້ວຍຕົນເອງ, “ຕູ້ຝາກ-ຖອນເງິນ (CRM) ເປັນອີກການບໍລິການໝຶ່ງທີ່ສາມາດຕອບໂຈດໄດ້ເປັນຢ່າງດີ, ລູກຄ້າສາມາດ ຝາກເງິນ, ຖອນເງິນ, ກວດສອບຍອດເງິນ ແລະ ບໍລິການອື່ນໆໄດ້ຄືກັນກັບຕູ້ເອທີເອັມໂດຍບໍ່ຕ້ອງເຂົ້າມາປ່ອງບໍລິການທະນາຄານ ແລະ ປະຢັດເວລາອີກດ້ວຍ. ລູກຄ້າສາມາດຝາກເປັນສະກຸນເງິນກີບ, ໂດລາ ແລະ ບາດ ແລະ ສາມາດຝາກໄດ້ບໍ່ເກີນ 200 ໃບຕໍ່ຄັ້ງ ໂດຍບໍ່ຈຳກັດຈຳນວນຄັ້ງຕໍ່ວັນ. ຈຸດບໍລິການຕູ້ຝາກ-ຖອນເງິນເປີດໃຫ້ບໍລິການ 04 ຈຸດຄື: ສໍານັກງານໃຫຍ່, ສາຂາຈັນທະບູລີ, ສາຂາດອນໜູນ, ສາຂາໄຊເສດຖາ ແລະຈະເພີ່ມຈຸດບໍລິການຕາມສາຂາອື່ນໆອີກໃນໄວໆນີ້ ເພື່ອໃຫ້ການບໍລິການຄອບຄຸມທົ່ວປະເທດ. ເນື່ອງໃນໂອກາດນີ້ ຂ້າພະເຈົ້າຂໍຮຽນເຊີນລູກຄ້າທຸກໆເຂົ້າມານຳໃຊ້ບໍລິການຝາກ-ຖອນຜ່ານຕູ້ CRM ຂອງພວກເຮົາໄດ້.

ທະນາຄານ ເອຊີລີດາ ລາວ ຈຳກັດ ເປັນທະນາຄານທຸລະກິດຕ່າງປະເທດທີ່ດຳເນີນທຸລະກິດໃນສ ສປປ ລາວ ມາຫຼາຍກວ່າ 14 ປີ. ໃນລະດັບພູມີພາກ, ກຸ່ມເອຊີລີດາມີ ທະນາຄານ ເອຊີລີດາ ມະຫາຊົນ ເຊິ່ງເປັນບໍລິສັດແມ່ ແລະ ມີ 4 ບໍລິສັດລູກທີ່ດຳເນີນທຸລະກິດໃນປະເທດກຳປູເຈຍ, ລາວ ແລະມຽນມາ ທີ່ໃຫ້ບໍລິການລູກຄ້າຫລາຍລ້ານຄົນ ແລະບໍລິການໂອນເງິນໄປທົ່ວໂລກ.

แชร์