ລັດຖະມົນຕີກະຊວງການເງິນ ຕິດຕາມການຈັດຕັ້ງປະຕິບັດ ຖານລາຍຮັບ ຢູ່ບໍ່ຄໍາເຊໂປນ

ເມື່ອບໍ່ດົນມານີ້, ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ພ້ອມຄະນະໄດ້ເຄື່ອນໄຫວຢ້ຽມຢາມ ບໍລິສັດ ລ້ານຊ້າງມິເນໂຣນ ລີມີເຕັດ ຢູ່ບໍ່ຄໍາເຊໂປນ ແຂວງສະຫວັນນະເຂດ, ມີຄະນະນໍາຂອງຂະ ແໜງການເງິນ ພ້ອມດ້ວຍບັນດາທ່ານຕາງໜ້າພະແນກການທີ່ກ່ຽວຂ້ອງອ້ອມຂ້າງແຂວງ ແລະ ເມືອງເຂົ້າຮ່ວມ.

ການເຄື່ອນໄຫວຄັ້ງນີ້, ລັດຖະມົນຕີກະຊວງການເງິນ ພ້ອມຄະນະໄດ້ຮັບຟັງການລາຍງານໂດຍຫຍໍ້ກ່ຽວກັບການດໍາເນີນທຸລະກິດຂອງ ບໍລິສັດ ລ້ານຊ້າງມິເນໂຣນ ລີມີເຕັດ, ພ້ອມນັ້ນບໍລິສັດກໍໄດ້ມອບພັນທະໃຫ້ລັດຖະບານຈໍານວນ 10.671.135,95 ໂດລາ. ຕາງໜ້າມອບໂດຍທ່ານຜູ້ອໍານວຍການໃຫຍ່ບໍລິສັດຝ່າຍລາວ ແລະ ຕາງໜ້າຮັບແມ່ນທ່ານຫົວໜ້າກົມຄຸ້ມຄອງຊັບສິນແຫ່ງລັດ ແລະ ທ່ານຮອງຫົວໜ້າກົມສ່ວຍສາອາກອນ. ຫຼັງຈາກ ນັ້ນ, ກໍໄດ້ສືບຕໍ່ຢ້ຽມຢາມຈຸດຂຸດຄົ້ນຄໍາ ແລະ ໂຮງງານຫຼອມຄໍາເພື່ອເບິ່ງກໍາມະວິທີການຜະລິດຕົວຈິງແຕ່ລະຂັ້ນຕອນ.

ໃນວັນດຽວກັນນີ້, ຢູ່ທີ່ພະແນກການເງິນແຂວງ, ທ່ານ ບຸນໂຈມ ອຸບົນປະເສີດ ກໍໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາໃນການເຄື່ອນໄຫວຊຸກຍູ້ການຈັດຕັ້ງປະຕິບັດວຽກງານຂະຫຍາຍຖານລາຍຮັບຕິດພັນກັບວາລະແຫ່ງຊາດຢູ່ແຂວງສະຫວັນນະເຂດ ຊຶ່ງມີບັນດາທ່ານຄະນະພະແນກການເງິນແຂວງ, ພາກສ່ວນສ່ວຍສາອາກອນ, ພາສີປະຈໍາແຂວງ ແລະ ພະນັກງານຫຼັກແຫຼ່ງທີ່ກ່ຽວຂ້ອງເຂົ້າຮ່ວມ.

ໂອກາດນີ້, ໄດ້ຮັບຟັງການລາຍງານຂອງທ່ານຮອງຫົວໜ້າພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2022 ໂດຍສະເພາະແມ່ນສະພາບການປະຕິບັດແຜນງົບປະມານແຫ່ງລັດ ປະຈຳ 8 ເດືອນປີ 2022 ແລະ ແຜນການ 4 ເດືອນທ້າຍປີ ຊຶ່ງມີໂອກາດອັນເອື້ອອໍານວຍ, ສິ່ງທ້າທາຍ ແລະ ຜົນກະທົບຫຼາຍຢ່າງຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ IX ຂອງລັດຖະບານກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ IX ຂອງແຂວງສະຫວັນນະເຂດ ເວົ້າລວມ,ແຕ່ວ່າອີງໃສ່ມາດຕະການແກ້ໄຂຄວາມຫຍຸງຍາກທາງດ້ານເສດຖະກິດ-ການເງິນຂອງລັດຖະບານ ໂດຍສະເພາະຄຳສັ່ງເລກທີ 18/ນຍ, ວາລະແຫ່ງຊາດຂອງແຂວງສະຫວັນນະເຂດ ສະບັບເລກທີ 2626/ຈຂ, ພະແນກການເງິນແຂວງພ້ອມດ້ວຍ 3 ຂະແໜງສາຍຕັ້ງໄດ້ເອົາໃຈໃສ່ບຸກບືນໃນການຈັດເກັບລາຍຮັບໃນ 7 ເດືອນຕົ້ນປີ 2022 ສາມາດຈັດເກັບລາຍຮັບປະຕິບັດຮອດວັນທີ 30 ສິງຫາ 2022 ປະຕິບັດໄດ້ທັງໝົດ 1.091,15 ຕື້ກີບ ເທົ່າ 64,71% ຂອງແຜນການປີ, ສ່ວນລາຍຈ່າຍຮອດວັນທີ 30 ສິງຫາ 2022 ປະຕິບັດໄດ້ 510,44 ຕື້ກີບ ເທົ່າກັບ 62,29% ຂອງແຜນການປີ.

ສຳລັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການຫັນເປັນທັນສະໄໝຂອງຂະແໜງການເງິນແຂວງສະຫວັນນະເຂດໃນໄລຍະຜ່ານມາສຸມໃສ່ຈັດຕັ້ງປະຕິບັດມາດຕະການຕ່າງໆທີ່ໄດ້ກໍານົດໄວ້ໃນຄໍາສັ່ງເລກທີ 18/ນຍ, ລົງວັນທີ 16 ກັນຍາ 2021 ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ; ຫັນເອົາແຜນຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນຂອງແຂວງເຂົ້າສູ່ຕົວຈິງໂດຍສະເພາະການຫັນເປັນທັນສະໄໝຂອງຂະແໜງການເງິນ, ເພື່ອສູ້ຊົນຈັດເກັບລາຍຮັບງົບປະມານໃຫ້ສາມາດບັນລຸຕາມໂຕເລກແຜນການ, ລື່ນແຜນການໃນແຕ່ລະປີເພື່ອກ້າວໄປສູ່ເຮັດໃຫ້ລາຍຮັບພູດຂອງແຂວງ ກຸ້ມລາຍຈ່າຍພາຍໃນແຂວງ.

ໃນໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວທີ່ແຂວງກໍຄືພະແນກການເງິນປະຕິບັດໄດ້ໃນໄລຍະ 7 ເດືອນຕົ້ນປີ 2022, ພ້ອມທັງໄດ້ເນັ້ນໜັກໃນບາງບັນຫາເປັນຕົ້ນ: ສືບຕໍ່ເພີ່ມທະວີຍົກສູງນໍ້າໃຈຮັກຊາດ, ນໍ້າໃຈສາມັກຄີ, ນໍ້າໃຈເສຍສະຫຼະ ແລະ ປະຢັດມັດທະຍັດ, ເພື່ອພ້ອມກັນສູ້ຊົນຜ່ານຜ່າວິກິດການທີ່ກໍາລັງປະເຊີນໃນປັດຈຸບັນ ແລະ ໄດ້ແນະນໍາໃນການພັດທະນາວຽກງານບຸກຄະລາກອນການກໍານົດແຜນກໍ່ສ້າງພະນັກງານນໍາພາຄຸ້ມຄອງໃນຂະແໜງການເງິນ, ຍົກລະດັບຄວາມຮູ້ຄວາມສາມາດຂອງພະນັກງານໃຫ້ມີຄຸນນະພາບໃນການເຮັດໜ້າທີ່ບົນພື້ນຖານຕາມລະບຽບຫຼັກການຮັບປະກັນການຄຸ້ມຄອງເກັບລາຍຮັບໃຫ້ຄົບຖ້ວນແລະໂປ່ງໃສ.

ທ່ານລັດຖະມົນຕີກະຊວງການເງິນ ຍັງໄດ້ແນະນໍາໃຫ້ເຈົ້າໜ້າທີ່ຂະແໜງການການເງິນກໍຄືກົມທີ່ກ່ຽວຂ້ອງຈົ່ງປະສານສົມທົບກັບຜູ້ປະກອບການທຸລະກິດ, ເພື່ອເຮັດໜ້າທີ່ດ້ວຍຄວາມໂປ່ງໃສຫຼີກລ່ຽງການສວຍໂອກາດໃນການລັກລອບນໍາເຂົ້າ ແລະ ສົ່ງອອກສິນຄ້າທີ່ບໍ່ຖືກຕ້ອງ. ທັງນີ້, ກໍເພື່ອແນໃສ່ເຮັດໃຫ້ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ສ້າງເງື່ອນໄຂສະດວກໃນການຄຸ້ມຄອງ,ການຈັດເກັບລາຍຮັບງົບປະມານໃຫ້ເຂົ້າສູ່ລະບົບທັນສະໄໝ ແລະ ດ້ວຍຄວາມໂປ່ງໃສ.

(ຂ່າວ: ກະຊວງການເງິນ)

 

แชร์