ບົດປາໄສ ຂອງທ່ານ ຫງວຽນ ບາຮຸ່ງ ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ສປປ ລາວ

 

ເນື່ອງໃນໂອກາດສະເຫຼີມສະຫຼອງວັນຊາດ ສາທາລະນະລັດ ຫວຽດນາມ ຄົບຮອບ 77 ປີ (02/9/ 1945- 02/9/2022)

ກ່ອນໜ້ານີ້ 77 ປີ, ປະຊາຊົນຫວຽດນາມ ພາຍໃຕ້ການນຳພາຂອງພັກກອມມູນິດຫວຽດນາມ ຍາດໄດ້ໄຊຊະນະຢ່າງຍິ່ງໃຫຍ່ໃນການເຮັດການປະຕິວັດເດືອນສິງຫາ, ໂຄ່ນລົ້ມລະບອບສັກດີນາ, ທັບມ້າງແອກປົກຄອງຂອງລ່າເມືອງຂຶ້ນ, ຍາດອຳນາດການປົກຄອງສູ່ກຳມືຂອງປະ ຊາຊົນ. ວັນທີ 2/9/1945, ຢູ່ໃນພິທີໂຮມຊຸມນຸມ ໃນສວນສະໜາມບາດິ່ງອັນເປັນປະຫວັດສາດ, ປະທານ ໂຮ່ຈີມິິນ ໄດ້ອ່ານຖະແຫຼງການປະກາດເອກະລາດ ຕໍ່ປວງຊົນທັງຊາດ ແລະ ທົ່ວໂລກ ຕໍ່ການສະ ຖາປະນາ ລັດຫວຽດນາມປະຊາທິປະໄຕ ສາທາລະນະ, ປັດຈຸບັນແມ່ນສາທາ ລະນະລັດ ສັງຄົມນິຍົມ ຫວຽດນາມ. ນີ້ແມ່ນຂີດໝາຍທີ່ເປັນແສງປະກາຍໃນປະຫວັດ ສາດ ຂອງຊົນຊາດຫວຽດນາມ, ນໍາພາຫວຽດນາມກ້າວເຂົ້າສຸ່ສັງກາດໃໝ່ “ສັງກາດແຫ່ງ ເອກະລາດ, ເສລີພາບ, ເປັນເຈົ້າຊາຕະກຳຂອງຕົນ”.

ນັບແຕ່ນັ້ນມາຈົນເຖິງປັດຈຸບັນ, ພາຍໃຕ້ການນຳພາອັນສະຫຼາດສ່ອງໃສຂອງພັກກອມມູນິດຫວຽດນາມ, ປະຊາຊົນຫວຽດນາມໄດ້ຜ່ານຜ່າຄວາມຫຍຸ້ງຍາກ, ສິ່ງທ້າທາຍຫຼາຍປະການ ແລະ ຍາດໄດ້ໄຊຊະນະອັນໃຫຍ່ຫຼວງ, ມີຄວາມ ໝາຍປະຫວັດສາດ, ບັນດາການຕໍ່ສູ້ຕ້ານຜູ້ຮຸກຮານ ໄດ້ດໍາເນີນໄປຢ່າງມີໄຊ, ປະຕິ ບັດພາລະກິດປ່ຽນແປງໃໝ່ຢ່າງສຳ ເລັດຜົນ, ໄດ້ບັນລຸຜົນສຳເລັດອັນຍິ່ງໃຫຍ່ຫຼາຍຢ່າງ ແລະ ສຳຄັນ.

ຫວຽດນາມໄດ້ພົ້ນອອກຈາກສະພາບ ການດ້ອຍພັດທະນາຢ່າງເຕັມປ່ຽມ, ຍູ້ແຮງການຫັນເປັນອຸດສາຫະກຳ, ຫັນເປັນທັນສະໄໝ, ຊີວິດການເປັນຢູ່ຂອງປະຊາ ຊົນໄດ້ປັບປຸງ, ດ້ານປ້ອງກັນຊາດ-ປ້ອງ ກັນຄວາມສະຫງົບໄດ້ມີຄວາມເຂັ້ມແຂງ, ການເມືອງ-ສັງຄົມ ມີສະຖຽນລະພາບ, ວັດທະນະທຳ, ການສຶກສາ, ສາທາລະນະສຸກບັນລຸຫຼາຍຜົນສຳເລັດອັນສຳຄັນ; ໄດ້ຍູ້ແຮງວຽກງານການຕ່າງປະເທດ ແລະ ເຊື່ອມໂຍງສາກົນ, ບົດບາດ ແລະ ຖານະຂອງຫວຽດນາມໃນເວທີສາກົນ ແລະ ພາກພື້ນໄດ້ຮັບການຍົກສູງຢ່າງບໍ່ຢຸດຢັ້ງ. ພິເສດ, ນັບແຕ່ພາຍຫຼັງກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດ ນາມ ມາເຖິງປັດຈຸບັນ, ປະເທດຫວຽດ ນາມ ໄດ້ມີຫຼາຍບາດກ້າວພັດທະນາໃຫຍ່ຢ່າງຕັ້ງໜ້າ ແລະ ແຂງແຮງ, ພາລະກິດກໍ່ສ້າງພັກໃຫ້ປອດໃສ ແລະ ຍົກສູງຄວາມສາມາດໃນການນຳພາຂອງພັກໄດ້ຜັນຂະຫຍາຍຢ່າງເຂັ້ມແຂງ, ບັນລຸໄດ້ຫຼາຍຜົນສຳເລັດອັນສຳຄັນ. ໃນປີນີ້, ພັກກອມມູນິດຫວຽດນາມ ໄດ້ປະກາດໃຊ້ບັນດາມະຕິທີ່ມີຄວາມສຳຄັນຍິ່ງກ່ຽວກັບການພັດທະນາເສດຖະກິດ ແລະ ຈະສືບຕໍ່ວາງອອກບັນດານະໂຍບາຍຊີ້ຂາດກ່ຽວກັບເສດຖະກິດ, ການເມືອງທີ່ມີຄວາມໝາຍຕັດສິນຕໍ່ການພັດທະນາ ເສດຖະກິດ-ສັງຄົມຂອງຫວຽດນາມໃນຊຸ່ມປີຕໍ່ໜ້າ. ວຽກງານຄຸ້ມຄອງ, ບໍລິຫານລັດສືບຕໍ່ໄດ້ເພີ່ມທະວີ ແລະ ຜັນຂະ ຫຍາຍຢ່າງຄົບຊຸດກັບການຍູ້ແຮງວຽກງານກໍ່ສ້າງລັດຖະບານຊື່ກົງບໍລິສຸດ, ມີແນວຄິດສ້າງສັນ, ລົງມືເຮັດ, ຮັບໃຊ້ປະຊາຊົນ ແລະ ວິສາຫະກິດ.

ເປັນເວລາ 2 ປີກວ່າ ຕ້ອງຕ້ານກັບການແຜ່ລະບາດຂອງພະຍາດໂຄວິດ-19 ໃນທົ່ວປະເທດ, ຫວຽດນາມ ໄດ້ປະຕິບັດສອງເປົ້າໝາຍພ້ອມໆກັນ ໄດ້ປະສົບຜົນສໍາເລັດຢ່າງມີໄຊ ທັງຕ້ານກັບການແຜ່ລະບາດຂອງພະຍາດ ທັງພັດທະນາເສດ ຖະກິດ, ເປັນໜຶ່ງໃນຈຳນວນໜ້ອຍປະ ເທດຢູ່ທະວີບອາຊີ ທີ່ມີການເຕີບໂຕດ້ານເສດຖະກິດໃນທາງບວກ. ກ້າວເຂົ້າສູ່ປີ 2022, ຫວຽດນາມ ໄດ້ຕັ້ງໜ້າເສີມຂະ ຫຍາຍຈິດໃຈຄວາມເປັນເຈົ້າການຢ່າງມີພິກໄຫວ ແລະ ຫົວຄິດປະດິດສ້າງ, ສຸມໃສ່ຟື້ນຟູ, ພັດທະນາເສດຖະກິດພາຍຫຼັງພະຍາດໂຄວິດ-19, ສ້າງທ່ວງທ່າເພື່ອໃຫ້ສຳເລັດຄາດໝາຍຂອງແຜນການ 5 ປີ ໃນການພັດທະນາເສດຖະກິດ-ສັງຄົມ ໄລຍະ 2021-2025, ດ້ວຍເຫດ, ບັນດາການເຄື່ອນໄຫວຜະລິດ, ດຳເນີນທຸລະກິດໄດ້ກັບຄືນສູ່ສະພາບການປົກກະຕິຄືດັ່ງເວລາກ່ອນບໍ່ມີການແຜ່ລະບາດຂອງພະຍາດໂຄວິດ-19, ເສດຖະກິດ-ສັງຄົມໃນ 7 ເດືອນຕົ້ນປີ 2022 ຮັກສາສະຖຽນລະພາບໄດ້ດີ, ຄວາມດຸນດ່ຽງທຸກຂົງເຂດມະຫາພາກມີຄວາມຮັບປະກັນ, ເງິນເຟີ້ຢູ່ໃນລະດັບທີ່ຄວບຄຸມໄດ້ ແລະ ຫຼາຍຢ່າງທີ່ພົ້ນເດັ່ນດັ່ງຄື: CPI ເພີ່ມ 2,54% ທຽບກັບໄຕມາດດຽວກັນຂອງປີ 2021; ມູນຄ່າການຄ້າ ການນໍາເຂົ້າ-ສົ່ງອອກ ບັນລຸກວ່າ 431,94 ຕື້ USD, ເພີ່ມຂຶ້ນ 14,8%; ຈຳນວນແຂກທ່ອງທ່ຽວມາຫວຽດນາມຄາດວ່າບັນລຸ 9 ແສນກວ່າ ຖ້ຽວຄົນ, ຫຼາຍກວ່າ 10 ທົບທຽບໄຕມາດວຽວກັນຂອງປີຜ່ານມາ; ທຶນລົງທຶນຕ່າງປະເທດໂດຍກົງຄາດວ່າບັນລຸ 11,57 ຕື້ USD, ເພີ່ມ 10,2%.

ບົນພື້ນຖານຈິດໃຈ “ຫວຽດນາມມີຄວາມປາຖະໜາຢາກເປັນເພື່ອນກັບທຸກໆປະ ເທດໃນວົງຄະນາຍາດສາກົນ, ສູ້ຊົນເພື່ອຄວາມສັນຕິພາບ, ເອກະລາດ ແລະ ພັດ ທະນາ”, ຫວຽດນາມໄດ້ສ້າງສຳເລັດຜົນສາຍພົວພັນຄູ່ຮ່ວມມືຢ່າງມີປະສິດທິຜົນກັບບັນດາປະເທດທີ່ເຄີຍເປັນສັດຕູໃນສົງຄາມ; ມີສາຍພົວພັນກັບກວ່າ 500 ອົງການຈັດຕັ້ງສາກົນ, ມີສາຍພົວພັນການທູດກັບ 189/193 ປະເທດທີ່ເປັນສະມາຊິກຂອງສະຫະປະຊາຊາດ; ສ້າງຕັ້ງສາຍພົວພັນການທູດກັບ 30 ຄູ່ຮ່ວມມືຍຸດທະສາດ ແລະ ຮອບດ້ານ (ເປັນປະ ເທດດຽວໃນອາຊີອາຄະເນສ້າງຂອບສາຍພົວພັນລະດັບນີ້ກັບທັງໝົດ 5 ປະເທດສະມາຊິກຖາວອນສະພາຄວາມໝັ້ນຄົງສະຫະປະຊາຊາດ); ມີສາຍພົວ ພັນດ້ານເສດຖະກິດກັບ 224 ຄູ່ຮ່ວມມື, ເຂົ້າ ຮ່ວມ 90 ສົນທິສັນຍາການຄ້າສອງຝ່າຍ, ເກືອບ 60 ສົນທິສັນຍາວ່າດ້ວຍການສົ່ງ ເສີມ ແລະ ປົກປ້ອງການລົງທຶນ, ລົງນາມ ແລະ ປະຕິບັດ 17 ສົນທິສັນຍາການຄ້າເສລີ (AFT), ເປັນຕົ້ນແມ່ນຫວຽດນາມໄດ້ກາຍເປັນໜຶ່ງໃນບັນດາປະເທດແຖວໜ້າຂອງພາກພື້ນໃນການສ້າງບັນດາຂອບການຮ່ວມມືເສດຖະກິດຫຼາຍຝ່າຍ; ເຊື່ອມໂຍງເສດຖະກິດຢ່າງເລິກເຊິ່ງ ແລະ ກວ້າງຂວາງໃນຫຼາຍລະດັບ ແລະ ຫຼາຍຮູບແບບຜ່ານການເຂົ້າຮ່ວມບັນດາກົນໄກລະບຽບການເສດຖະກິດໂລກຢ່າງຕັ້ງໜ້າ ແລະ ເລິກເຊິ່ງກວ່າ, ຕັ້ງໜ້າຜັນຂະຫຍາຍຢ່າງມີປະສິດທິຜົນບັນດາສົນທິສັນຍາການຄ້າເສລີ, ໃນນັ້ນມີການລົງນາມບັນ ດາສົນທິສັນຍາລຸ້ນໃໝ່ຂອງໂລກ (CPTPP) ແລະ ພາກພື້ນ (RCEP, EVFTA, EVIPA); ຕັ້ງໜ້າເຂົ້າຮ່ວມບັນ ດາການເຄື່ອນໄຫວຮັກສາຄວາມສັນ ຕິພາບຂອງສະຫະປະຊາຊາດ; ເປັນເຈົ້າ ການ, ຕັ້ງໜ້າເພື່ອສ້າງບັນດາກົນໄກລະບຽບການ, ກົດໝາຍ, ບັນທັດຖານຫຼາຍຝ່າຍ, ຕັ້ງໜ້າມີບົດບາດໃນບັນດາກົນໄກຄຸ້ມຄອງບໍລິຫານທົ່ວໂລກ. ພິເສດ, ປີນີ້ ເປັນຄັ້ງທຳອິດ ຫວຽດນາມເປັນເຈົ້າພາບຈັດຕັ້ງກອງປະຊຸມຄົບຄະນະປະ ຈຳປີ ແລະ ກອງປະຊຸມສະຫະສະມາຄົມບັນດາໃຈກາງຮັກສາຄວາມສັນຕິພາບອາຊີ-ປາຊີຟີກ ໄດ້ສຳເລັດຢ່າງຈົບງາມ; ຫວຽດນາມໄດ້ສຳເລັດຢ່າງດີເລີດໃນບົດບາດສະມາຊິກບໍ່ຖາວອນສະພາຄວາມໝັ້ນຄົງ ສະຫະປະຊາຊາດສະໄໝ 2020 - 2021, ໄດ້ປະກອບສ່ວນຢ່າງຕັ້ງໜ້າເຂົ້າໃນວຽກງານລວມຂອງສະພາຄວາມໝັ້ນຄົງ, ເປັນການສົ່ງສານຢ່າງແຂງແຮງຕໍ່ກັບຄວາມເປັນເອກະລາດຂອງຫວຽດນາມ, ຄວາມເປັນເຈົ້າຕົນ ເອງ, ປ່ຽນແປງໃໝ່, ຮັກຫອມສັນຕິພາບ, ເຄົາລົບກົດໝາຍສາກົນ, ໄວ້ເນື້ອເຊື່ອໃຈ, ຈິງໃຈ, ໝັ້ນທ່ຽງໃນການປະພຶດ, ປະ ກອບສ່ວນຢ່າງຕັ້ງໜ້າ ແລະ ມີຄວາມຮັບຜິດຊອບໃຫ້ແກ່ຄວາມສັນຕິພາບ, ການຮ່ວມມື, ພັດທະນາ ແລະ ກ້າວໜ້າໃນໂລກ.

ປີນີ້, ຫວຽດນາມກໍສະເຫຼີມສະຫຼອງວັນກຳເນີດຂອງພື້ນການທູດທັນສະໄໝ ຄົບຮອບ 77 ປີ, ມີກຽດຢ່າງສູງເຊິ່ງໄດ້ປະທານໂຮ່ຈີມິນເປັນລັດຖະມົນຕີກະ ຊວງການຕ່າງປະເທດຜູ້ທຳອິດ, ນຳພາໂດຍກົງ. ໃນຕະຫຼອດ 77 ປີຜ່ານມາ, ຂະແໜງການທູດໄດ້ປະກອບສ່ວນອັນສຳຄັນໃຫ້ແກ່ພາລະກິດແຫ່ງການຕໍ່ສູ້ເພື່ອເອກະລາດຊົນຊາດ, ປະເທດຊາດເປັນອັນໜຶ່ງອັນດຽວ ກໍຄືພາລະກິດແຫ່ງການປ່ຽນແປງໃໝ່, ເຊື່ອມໂຍງ ແລະ ປົກປັກຮັກສາປະເທດຊາດ, ປະກອບສ່ວນເຂົ້າໃນການຍົກສູງຖານະຂອງຫວຽດນາໃນເວທີສາກົນ.

ພັກ, ລັດ ແລະ ປະຊາຊົນຫວຽດນາມຍາມໃດກໍມີຄວາມຮັບຮູ້ຢ່າງເລິກເຊິ່ງວ່າ, ໃນພາລະກິດສ້າງສາ ແລະ ປົກປັກຮັກສາປະເທດຫວຽດນາມ, ຄຽງຄູ່ກັບບັນດາຄວາມມານະພະຍາຍາມຂອງຕົນເອງ, ພວກເຮົາຍາມໃດກໍໄດ້ຮັບການສະ ໜັບສະໜູນ, ການຊ່ວຍເຫຼືອອັນປະເສີດຂອງເພື່ອນມິດສາກົນ, ພິເສດແມ່ນຄວາມສາມັກຄີ ແລະ ການຊ່ວຍເຫຼືອອັນໃຫຍ່ ຫຼວງ, ມິດຈິດມິດໃຈຂອງພັກ, ລັດ ແລະ ປະຊາຊົນລາວ. ເນື່ອງໃນການສະເຫຼີມສະຫຼອງອັນສະຫງ່າລາສີນີ້, ຂໍຕາງໜ້າພັກ, ລັດ ແລະ ປະຊາຊົນຫວຽດນາມ, ຂ້າພະເຈົ້າຂໍສະແດງຄວາມຮູ້ບຸນຄຸນອັນເລິກເຊິ່ງຕໍ່ພັກ, ລັດ ແລະ ປະຊາຊົນລາວ ອ້າຍນ້ອງຍາມໃດກໍສາມັກຄີ, ສະໜັບ ສະໜູນ ແລະ ຊ່ວຍເຫຼືອຫວຽດນາມ.

ຂ້າພະເຈົ້າກໍສະແດງຄວາມຂອບອົກຂອບໃຈ ມາຍັງອົງຄະນະພັກຂັ້ນຕ່າງໆ, ອຳນາດການປົກຄອງ ແລະ ປະຊາຊົນລາວໄດ້ເອົາໃຈໃສ່ສ້າງເງື່ອນໄຂໃຫ້ແກ່ວົງຄະນາຍາດ ຄົນຫວຽດນາມຢູ່ລາວມີຊີວິດການເປັນຢູ່ໝັ້ນຄົງ, ປະກອບສ່ວນເຂົ້າໃນພາລະກິດແຫ່ງການສ້າງສາປະເທດລາວວັດທະນາ ຖາວອນ ແລະ ເປັນຂົວຕໍ່ໜັກແໜ້ນໃຫ້ແກ່ສາຍພົວພັນພິເສດລະຫວ່າງສອງປະເທດ.

ພວກເຮົາປິຕິຊົມຊື່ນເປັນຢ່າງຍິ່ງ ແລະ ເອກອ້າງທະນົງໃຈສັງເກດເຫັນວ່າ ໃນຊຸມປີຜ່ານມາ, ສາຍພົວພັນມິດຕະພາບ, ສາມັກຄີພິເສດ ແລະ ການຮ່ວມມືຮອບດ້ານຫວຽດນາມ-ລາວ ໄດ້ພັດທະນາຢ່າງຕໍ່ເນື່ອງ, ນັບມື້ນັບເລິກເຊິ່ງ ແລະ ກວ້າງ ຂວາງ, ແທດເໝາະຕົວຈິງ ແລະ ມີປະສິດທິຜົນ, ນຳເອົາຜົນປະໂຫຍດຢ່າງແທ້ຈິງ ແລະ ໃຫຍ່ຫຼວງໃຫ້ແກ່ສອງປະເທດ. ພິເສດ ແມ່ນໃນປີ 2022, ສອງຝ່າຍໄດ້ປະສານສົມທົບຈັດຕັ້ງສຳເລັດຢ່າງຈົບງາມພິທີໂຮມຊຸມນຸມມິດຕິງສະເຫຼີມສະຫຼອງວັນສ້າງຕັ້ງສາຍພົວພັນການທູດຄົບຮອບ 60 ປີ ແລະ ວັນເຊັນສົນທິ ສັນຍາມິດຕະພາບ ແລະ ການຮ່ວມມືຫວຽດນາມ-ລາວ ຄົບຮອບ 45 ປີ ຢູ່ທີ່ນະຄອນຫຼວງຂອງສອງປະເທດ ແລະ ຫຼາຍກິດຈະກຳສະເຫຼີມສະຫຼອງດ້ວຍຫຼາກຫຼາຍຮູບແບບ, ສົມກຽດ, ແທດຈິງ ບໍ່ພຽງແຕ່ຢູ່ແຕ່ລະປະເທດ ຫາກຍັງຢູ່ທັງບັນດາອົງການຕາງໜ້າຂອງຫວຽດນາມ ແລະ ລາວ ຢູ່ຕ່າງປະເທດ. ການຮ່ວມມືດ້ານເສດຖະກິດມີບາດກ້າວກະໂດດ, ຫວຽດນາມສືບຕໍ່ແມ່ນໜຶ່ງໃນບັນດາປະເທດນຳໜ້າກ່ຽວກັບການລົງທຶນ ແລະ ເປັນຄູ່ຮ່ວມມືການຄ້າໃຫຍ່ຂອງລາວ, ຄຸນນະພາບການລົງທຶນຂອງຫວຽດນາມພວມໄດ້ຍົກສູງຂຶ້ນ. ການເຊື່ອມຈອດລະຫວ່າງສອງພື້ນເສດຖະກິດ, ເປັນຕົ້ນແມ່ນເຊື່ອມຈອດພື້ນຖານໂຄງລ່າງ, ຄົມມະນາຄົມຂົນສົ່ງພວມໄດ້ຮັບການຍູ້ແຮງ. ຂ້າພະເຈົ້າເຊື່ອໝັ້ນວ່າໃນອະນາຄົດຂ້າງໜ້ານີ້, ລາວຈະກາຍເປັນໃຈກາງເຊື່ອມຈອດ, ສະຖານທີ່ຂົນສົ່ງຜ່ານສຳຄັນຢູ່ອາຊີອາຄະເນດ້ວຍການຮ່ວມມືຂອງຫວຽດນາມ ແລະ ບັນດາປະເທດຕ່າງໆໃນພາກພື້ນ. ການຮ່ວມມືລະຫວ່າງຫວຽດນາມ ແລະ ລາວໃນບັນດາຂົງເຂດປ້ອງກັນຊາດ-ປ້ອງກັນຄວາມສະຫງົບ, ການຕ່າງປະເທດ, ວັດທະນະທຳ-ສັງຄົມ, ການທູດປະຊາຊົນ… ກໍໄດ້ເພີ່ມທະວີຢ່າງແທດຈິງ ແລະ ເລິກເຊິ່ງກວ່າ.

ຫວນຄືນບົນເສັ້ນທາງປະຫວັດສາດອົງ ອາດກ້າແກ່ນທີ່ຜ່ານມາ, ພວກເຮົາມີຄວາມເອກອ້າງທະນົງໃຈຍິ່ງຕໍ່ຂະບວນ ການປະກົດຕົວ ແລະ ພັດທະນາຂອງສາຍພົວພັນພິເສດ, ຫາຍາກລະຫວ່າງສອງຊົນຊາດ. ນັ້ນແມ່ນສາຍພົວພັນໄດ້ ພັດທະນາຢ່າງບໍ່ຢຸດຢັ້ງຈາກສາຍພົວພັນມູນເຊື້ອເປັນມິດກາຍເປັນສາຍພົວພັນພິເສດ ໂດຍປະທານ ໂຮ່ຈີມິນ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະ ທານ ສຸພານຸວົງ ທີ່ແສນເຄົາລົບຮັກ ເປັນຜູ້ກໍ່ຮ່າງສ້າງຕົວໂດຍກົງ, ໄດ້ບັນດາລຸ້ນ ການນຳສືບທອດ ແລະ ປະຊາຊົນສອງຊາດເພີ່ມພູນຄຸນສ້າງ, ຜ່ານຜ່າຄວາມລຳບາກຍາກເຂັນ, ສິ່ງທ້າທາຍນາໆປະ ການ, ສາຍພົວພັນນັ້ນໄດ້ສະຫຼຸບແມ່ນສາຍພົວພັນທີ່ຕັດສິນຄວາມເປັນຕາຍ, ເປັນແບບຢ່າງ, ບໍລິສຸດດຸດດື່ມ, ຜ່ອງໃສ, ຫາຍາກໃນສາຍ ພົວພັນສາກົນ, ແມ່ນສາຍພົວພັນຖືລັກສະນະກົດເກນ, ແມ່ນປັດໄຈຮັບປະກັນໄຊຊະນະໃຫ້ແກ່ພາລະ ກິດການປະຕິວັດຂອງແຕ່ລະປະເທດ ແລະ ແມ່ນຊັບສິນລວມອັນປະເສີດຂອງສອງຊົນຊາດ ແລະ ເປັນເຫງົ້າພະລັງອັນໃຫຍ່ຫຼວງໃຫ້ແກ່ພາລະກິດແຫ່ງການສ້າງສາ ແລະ ປົກປັກຮັກສາປະເທດຂອງແຕ່ລະປະເທດພວກເຮົາ.

ພິເສດ, ໃນເວລາຜ່ານມາ, ສາຍໃຈຫວຽດ -ລາວ ຍັງໄດ້ສະແດງຢ່າງເລິກເຊິ່ງໃນບັນດາເວລາທີ່ສອງປະເທດຮ່ວມກັນຜ່ານຜ່າຄວາມຫຍຸ້ງຍາກຫຼາຍຢ່າງຍ້ອນການແຜ່ລະບາດຂອງພະຍາດໂຄວິດ-19 ເກີດຂຶ້ນ. ປີ 2021, ພັກ, ລັດລາວ ໄດ້ມີຫຼາຍຮູບແບບໃນການສະໜັບສະໜູນ, ຊ່ວຍເຫຼືອ, ໃນນັ້ນມີການສະໜັບສະໜູນເງິນທອງ, ວັດຖຸ, ປະກອບສ່ວນເຂົ້າ ໃນຜົນສຳເລັດຂອງການສະກັດກັ້ນກັບພະຍາດຂອງຫວຽດນາມ. ພວກເຮົາມີຄວາມຕື່ນຕັ້ນໃຈຢ່າງຍິ່ງເມື່ອໄດ້ຮັບການສະໜັບສະໜູນຂອງການນຳ ແລະ ປະ ຊາຊົນລາວ ເຖິງແມ່ນວ່າຍັງພົບຂໍ້ຫຍຸ້ງຍາກຫຼາຍປະການ ແຕ່ຍັງໄດ້ບິແບ່ງ, ຊ່ວຍເຫຼືອໃຫ້ແກ່ປະຊາຊົນຫວຽດນາມ. ເນື່ອງໃນໂອກາດນີ້, ພວກເຮົາກໍສະແດງຄວາມຮູ້ບຸນຄຸນຢ່າງຈິງໃຈມາຍັງພັກ, ລັດ ແລະ ປະຊາຊົນລາວອ້າຍນ້ອງ, ບັນດາປະເທດເພື່ອນມິດ ແລະ ວົງຄະນາຍາດສາກົນໄດ້ສະໜັບສະໜູນຫວຽດນາມຢ່າງທັນການ. ໃນຂະນະພະຍາດໄດ້ມີການແຜ່ລະບາດຢູ່ປະເທດລາວອ້າຍນ້ອງ, ເຖິງແມ່ນວ່າຫວຽດນາມພວມຕ້ອງໄດ້ຮັບມືກັບພະ ຍາດ ເກີດຂຶ້ນ, ບັນດາກະຊວງ, ຂະແໜງການ, ອຳນາດການປົກຄອງ ແລະ ປະຊາ ຊົນໃນທົ່ວປະເທດຫວຽດ ນາມ ລ້ວນແລ້ວແຕ່ ຫັນມາສູ່ປະເທດລາວອ້າຍນ້ອງ, ຮ່ວມໄມ້ຮ່ວມມືປະກອບກຳລັງແຮງຊ່ວຍເຫຼືອດ້ວຍຫຼາຍຮູບແບບ ທັງກຳລັງແຮງງານຄົນ, ກຳລັງວັດຖຸສິ່ງຂອງ ແລະ ຈິດໃຈ. ຕໍ່ກັບການປ່ຽນແປງຢ່າງຄາດ ຄະເນຍາກຂອງດິນຟ້າອາກາດ ແລະ ພະ ຍາດລະບາດ, ຍິ່ງກວ່າເວລາໃດ, ປະຊາ ຊົນລາວ ແລະ ຫວຽດນາມ ພ້ອມກັນວົງຄະນາຍາດສາກົນຍິ່ງຮັດແໜ້ນການຮ່ວມ ມືໃນການຕໍ່ສູ້ກັບໄພທຳມະຊາດ, ຕ້ານກັບພະຍາດລະບາດ. ສາຍພົວພັນພິເສດຫວຽດນາມ-ລາວ, ລາວ-ຫວຽດນາມ ຍີ່ງໄດ້ຜ່ານການທົດສອບ, ຊຸບຫຼໍ່ໃນການຕໍ່ສູ່ຮ່ວມກັນ.

ປັດຈຸບັນ, ສອງປະເທດພວກເຮົາພວມຢືນຢູ່ຫຼາຍກາລະໂອກາດແຫ່ງການພັດ ທະນາ ແຕ່ກໍຕ້ອງປະເຊີນກັບຄວາມ ຫຍຸ້ງຍາກ, ສິ່ງທ້າທາຍບໍ່ໜ້ອຍ. ຍິ່ງກວ່າເວລາໃດ, ພວກເຮົາຕ້ອງເພີ່ມທະວີ ແລະ ເສີມຂະຫຍາຍສາຍພົວພັນສາມັກຄີພິເສດຫວຽດນາມ-ລາວ ຫລາຍກວ່າເກົ່າ. ປະຫວັດສາດແຫ່ງການພັດທະນາຢູ່ສອງປະເທດໃຫ້ເຫັນວ່າ, ຖ້າບໍ່ມີສາຍພົວພັນພິເສດນັ້ນ ແມ່ນພາລະກິດຕໍ່ສູ້ປົດປ່ອຍຊົນຊາດໃນເມື່ອກ່ອນ, ກໍຄືພາລະກິດສ້າງສາ ແລະ ປົກປັກຮັກສາປະເທດຊາດຂອງສອງປະເທດປັດຈຸບັນ, ບໍ່ສາມາດມີໄດ້ຜົນສຳເລັດອັນໃຫຍ່ຫຼວງ. ພັກ, ລັດ ແລະ ປະຊາຊົນຫວຽດນາມ ຍາມໃດກໍຢູ່ຄຽງຂ້າງກັບປະຊາຊົນລາວອ້າຍນ້ອງ, ເປັນຕົ້ນແມ່ນໃນຂະນະປະເທດລາວພົບກັບຄວາມຫຍຸ້ງຍາກ, ຮ່ວມແຮງກາຍແຮງໃຈ, ຊ່ວຍເຫຼືອລາວຜ່ານຜ່າຄວາມຫຍຸ້ງ ຍາກ, ສືບຕໍ່ພັດທະນາແບບຍືນຍົງ. ພວກເຮົາພ້ອມກັບພັກ, ລັດ ແລະ ປະຊາ ຊົນລາວອ້າຍນ້ອງປົກປັກຮັກສາ, ເພີ່ມພູນຄຸນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດໃຫ້ຍືນຍົງ ແລະ ພັດທະນາຢ່າງບໍ່ຢຸດຢັ້ງ.

ເນື່ອງໃນໂອກາດອັນສະຫງ່າລາສີນີ້, ຂ້າ ພະເຈົ້າຂໍອວຍພອນໃຫ້ໄຊປະຊາຊົນລາວອ້າຍນ້ອງພາຍໃຕ້ການນຳພາຂອງພັກປະຊາຊົນ ປະຕິວັດ ລາວ ສືບຕໍ່ຍາດໄດ້ຜົນສຳເລັດໃໝ່, ໃຫຍ່ຫຼວງກວ່າເກົ່າໃນພາລະກິດປ່ຽນແປງໃໝ່, ປະຕິບັດ ຢ່າງມີໄຊມະຕິກອງປະຊຸມໃຫຍ່ຄັ້ງທີ XI ຂອງພັກ, ສ້າງປະເທດລາວຮັ່ງມີເຂັ້ມແຂງ, ປະຊາຊົນມີຄວາມຜາສຸກ, ອີ່ມໜຳສຳ ລານ, ສັງຄົມສາມັກຄີ, ປອງດອງ, ປະຊາ ທິປະໄຕ, ຍຸຕິທຳ ແລະ ສີວິໄລ, ບົດບາດ ແລະ ຖານະຂອງສາທາ ລະນະລັດ ປະຊາ ທິປະໄຕ ປະຊາຊົນ ລາວ ນັບມື້ນັບຍົກສູງໃນພາກພື້ນ ແລະ ໃນໂລກ.

ອວຍພອນສາຍພົວພັນມິດຕະພາບຍິ່ງໃຫຍ່, ສາມັກຄີພິເສດ ແລະ ການຮ່ວມມືຮອບດ້ານຫວຽດນາມ-ລາວ ຂຽວສົດງົດງາມ, ໝັ້ນຄົງຂະໜົງແກ່ນຕະຫຼອດກາລະນານ.

 

แชร์