ວຽງຈັນເຊັນເຕີສະຫຼອງຄົບຮອບ 4 ປີ

   ສູນການຄ້າວຽງຈັນເຊັນເຕີໄດ້ຈັດພິທີສະເຫຼີມສະຫຼອງການເປີດໃຫ້ບໍລິການສັງຄົມຄົບຮອບ 4 ປີ, ຂຶ້ນໃນວັນທີ 28 ມີນາ 2019, ໄປພ້ອມກັບກິດຈະກຳຄັ້ງໃຫຍ່ທີ່ເປັນການປະກອບສ່ວນຊ່ວຍເຫຼືອສັງຄົມຄືການຈັດກິດຈະກຳໃຈອາສາບໍລິຈາກເລືອດເທົ່າກັບໃຫ້ຮ່ວມກັບອົງການກາແດງລາວໃນພາກເຊົ້າກ່ອນຈະມີງານລ້ຽງໃນຕອນຄ່ຳຂອງວັນດຽວກັນ, ໂດຍການເຂົ້າຮ່ວມຂອງ ທ່ານ ນາງ ອໍລະໄທ ສັນຕິຄົງຄາ ຮອງປະທານບໍລິສັດພັດທະນາສູນເສດຖະກິດການຄ້າຄົບວົງຈອນດອນຈັນຕອນເໜືອຈຳກັດ, ທ່ານກຽດຕິຄຸນຊາດປະເສດເອກອັກຄະຣາຊະທູດໄທປະຈຳລາວ, ທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວ ແຫ່ງ ສປປ ລາວ, ພ້ອມດ້ວຍບັນດາທ່ານທູດ, ຮອງອຳນວຍການການສູນການຄ້າ, ຜູ້ຕາງໜ້າເມືອງສີສັດຕະນາກ ແລະແຂກຖືກເຊີນເຂົ້າຮ່ວມ.

  ທ່ານ ຊຸຍປໍ ກ່າວວ່າ: ຕະຫຼອດໄລຍະ 4 ປີທີ່ຜ່ານມາສູນການຄ້າວຽງຈັນເຊັນເຕີໄດ້ພັດທະນາ ແລະປະສົບຜົນສຳເລັດໃນຫຼາຍດ້ານເປັນຕົ້ນແມ່ນດ້ານການບໍລິການ, ດ້ານການບໍລິຫານສິນຄ້າ, ດ້ານການພັດທະນາແບນສິນຄ້າ, ນອກນັ້ນກໍຍັງມີຮ້ານຄ້າ ແລະສິນຄ້າແບນດັງເຂົ້າໃໝ່ຫຼາກຫຼາຍແບນ, ພ້ອມນັ້ນກໍຍັງມີອີກຫຼາຍສິນຄ້າດັງທີ່ກຳລັງຈະເຂົ້າມາໃນປີນີ້ ແລະມີຫຼາຍສິນຄ້າດັງທີ່ໃຫ້ຄວາມສົນໃຈເຂົ້າຮ່ວມ, ພ້ອມນັ້ນຍັງມີໂປຣໂມຊັນຫຼຸດລາຄາ ແລະກິດຈະກຳຕ່າງໆຫຼາກຫຼາຍໃນແຕ່ລະເດືອນ,ລວມທັງການສົ່ງເສີມກິດຈະກຳຕ່າງໆເພື່ອສັງຄົມ,ເປັນສູນລວມງານອີເວັ້ນລະດັບສາກົນ ແລະຍັງເປັນເວທີໃຫ້ເຍົາວະຊົນໃນຂອບ ເຂດທົ່ວປະເທດລາວໄດ້ສະແດງຄວາມສາມາດອີກດ້ວຍ ແລະເພື່ອເຣັດໃຫ້ສູນການຄ້າແຫ່ງນີ້ກາຍເປັນສູນລວມດັ່ງທີ່ກ່າວມານັ້ນ, ສູນການຄ້າຍັງຈະສືບພັດ ທະນາ ແລະເພີ່ມກິດຈະກຳໃຫ້ຫຼາຍຂຶ້ນເພື່ອຕອບສະໜອງຄວາມຕ້ອງການຂອງລູກຄ້າທັງພາຍໃນ ແລະຕ່າງປະເທດ, ເປີດກວ້າງການນຳເຂົ້າສິນຄ້າພາຍໃນພື້ນທີ່ ແລະປະເທດໃກ້ຄຽງ, ເປີດການບໍລິການຈອດລົດຟີ,ເພີ່ມພາບລັກຂອງຫ້າງທາງດ້ານງານຕົບແຕ່ງໃຫ້ກາຍເປັນ Land mark ແຫ່ງການທ່ອງທ່ຽວຂອງນະຄອນຫຼວງວຽງຈັນ, ນອກນັ້ນໃນປີນີ້ສູນການຄ້າວຽງຈັນເຊັນເຕີກໍໄດ້ກ້າວເຂົ້າສູ່ຕະຫຼາດຫຼັກຊັບຂອງລາວ ແລະ ໄດ້ເລີ່ມມີການຈຳໜ່າຍສັ່ງຈອງຫຸ້ນ ຕັ້ງແຕ່ວັນທີ 18 ມີນາຈົນເຖິງວັນທີ 30 ເມສາ 2019 ຊຶ່ງກໍນັບວ່າເປັນປະສົບຜົນສຳເລັດຄັ້ງຍິ່ງໃຫຍ່ອີກກ້າວຂອງສູນການຄ້າ.

  ນອກຈາກນັ້ນ, ເນື່ອງໃນໂອກາດສະເຫຼີມສະຫຼອງຄົບຮອບ 4 ປີ ສູນການຄ້າວຽງຈັນເຊັນເຕີຈຶ່ງຮ່ວມກັບສູນເລືອດແຫ່ງຊາດອົງການກາແດງ, ມູນນິທິຊ່ວຍ ເຫຼືອຄົນທຸກຍາກແຫ່ງ ສປປ ລາວ 1623, ມູນນິທິໜ່ວຍກູ້ໄພນະຄອນຫຼວງ 1624 ແລະມູນນິທິໃຈຮ່ວມໃຈໄດ້ຈັດໂຄງການດັ່ງກ່າວຂຶ້ນເພື່ອໃຫ້ທຸກຄົນທີ່ມີຈິດສັດທາຮ່ວມເຮັດບຸນດ້ວຍການບໍລິຈາກເລືອດໃຫ້ກັບຜູ້ປ່ວຍທີ່ກຳລັງຂາດແຄນເລືອດ,ພ້ອມດຽວກັນນັ້ນຍັງເປັນການສຳຮອງເລືອດໄວ້ໃຊ້ໃນເວລາສຸກເສີນໃຫ້ກັບອົງການການແດງອີກດ້ວຍຊຶ່ງໃນແຕ່ລະປີຍອດບໍລິຈາກເລືອດໄດ້ເຖິງ 150 ກວ່າຖົງ, ນອກຈາກຈັດງານສະເຫຼີມສະຫຼອງຄົບຮອບ 4 ປີແລ້ວຍັງມີກິດ ຈະກຳຊ່ວຍສັງຄົມອີກຫຼາຍກິດຈະກຳ.

ຂ່າວ: ພິມພອນ    

แชร์