ລາວໂທລະຄົມ ເປີດຮຽນທິດສະດີການເມືອງ-ການປົກຄອງ ໄລຍະສັ້ນ

ບໍລິສັດ ລາວໂທລະຄົມມະນາຄົມມະຫາຊົນເປີດຊຸດອົບຝຶກອົບຮົມທິດສະດີການເມືອງ-ການປົກຄອງ 45 ວັນ ຊຸດທີ III ໃນວັນທີ 29 ສິງຫາ ຜ່ານມາໂດຍມີທ່ານ ສັນຕິສຸກ ສິມມາລາວົງ ຮອງເລຂາຄະນະພັກ, ຮອງລັດຖະມົນຕີ ກະຊວງເຕັກໂນໂລຊີ ແລະການສື່ສານ(ຕສ), ມີທ່ານ ສຸພົນ ຈັນທະວີໄຊ ກໍາມະການຄະນະບໍລິຫານງານພັກກະຊວງ ຕສ, ເລຂາຄະນະພັກຮາກຖານ, ຜູ້ອໍານວຍການໃຫຍ່ບໍລິສັດ ລາວໂທ ລະຄົມມະນາຄົມ ມະຫາຊົນ, ມີພາກສ່ວນກ່ຽວຂ້ອງເຂົ້າຮ່ວມ ເພື່ອເຊື່ອມຊຶມ ແລະ ກໍາ ແໜ້ນແນວທາງ, ແຜນນະໂຍບາຍຂອງພັກເປັນຕົ້ນແນວທາງການປ່ຽນແປງໃໝ່ຮອບ ດ້ານຢ່າງມີຫລັກການຂອງພັກ, ພ້ອມກັນນັ້ນກໍຍັງເປັນການສ້າງຄວາມເປັນເອກະພາບກັບແນວທາງ, ແຜນນະໂຍບາຍຂອງພັກເພື່ອນໍາໄປຜັນຂະຫຍາຍ ແລະ ຈັດຕັ້ງປະຕິບັດໃນຂົງເຂດວຽກງານຕົວຈິງໃຫ້ເກີດດອກອອກຜົນ, ທັງເປັນການຕ້ານທັດສະນະຜິດເຂວອອກຈາກແນວທາງ, ແຜນນະໂຍບາຍຂອງພັກເຊັ່ນ: ແນວຄິດຄອງເດີມ, ກົນຈັກລອກແບບ, ຈຸ້ມເຈື້ອ, ເຊື້ອສາຍ, ຫລາຍພັກຫລາຍເຄົ້າການເມືອງ ແລະ ອື່ນໆ.

ການຝຶກອົບຮົມໃນຊຸດນີ້, ເພື່ອປະກອບຄວາມຮູ້ພື້ນຖານ ດ້ານທິດສະດີການເມືອງໃຫ້ແກ່ພະນັກງານຫລັກແຫຼ່ງພາຍໃນ ບໍລິສັດ ລາວໂທລະຄົມມະນາຄົມມະຫາຊົນ, ເປັນ ຕົ້ນ ແມ່ນຫລັກມູນພື້ນຖານຂອງທິດສະດີມາກ-ເລນິນ ແນວທາງນະໂຍບາຍຂອງພັກ (ມະ ຕິ X, XI ຂອງພັກ), ທັງເປັນການຍົກລະດັບທາງດ້ານທິດສະດີການເມືອງ, ຫລັກໝັ້ນ ແລະ ທັດສະນະຊົນຊັ້ນກໍາມະກອນ, ຮູ້ຈໍາແນກມິດ-ສັດຕູ, ເຊື່ອໝັ້ນຕໍ່ການນໍາພາຂອງພັກກໍຄື ຈຸດໝາຍການປະຕິວັດຂອງປະເທດເຮົາ; ເພື່ອຝຶກຝົນຫລໍ່ຫລອມຄຸນສົມບັດ, ຄຸນທາດປະຕິວັດ,ສ້າງແບບແຜນການດໍາລົງຊີວິດທີ່ປອດໃສຂາວສະອາດ, ຍົກສູງສະຕິລະວັງຕົວຕໍ່ທຸກເລ່ລ່ຽມກົນອຸບາຍຍຸດທະສາດ ຫັນປ່ຽນໂດຍສັນຕິຂອງສັດຕູ, ກຽມພ້ອມຮັບໃຊ້ຊາດ, ຮັບໃຊ້ປະຊາຊົນ ແລະ ປະຕິບັດສອງໜ້າທີ່ຍຸດທະສາດໃຫ້ສໍາເລັດຜົນ.

ການຝຶກອົບຮົມທິດສະດີການເມືອງ-ການປົກຄອງ ຄັ້ງນີ້ຈະດໍາເນີນໄປເຖິງວັນທີ 28 ຕຸລາ 2022, ມີສໍາມະນາກອນເຂົ້າຮ່ວມທັງໝົດ 55 ສະຫາຍ, ຍິງ 23 ສະຫາຍ ເຊິ່ງສໍາມະນາກອນເຂົ້າຮຽນຊຸດນີ້ໄດ້ເລືອກເອົາພະນັກງານທີ່ເປັນຫົວຈັກຫລັກແຫລ່ງ, ເປັນແກ່ນສານໃນການນໍາພາ-ຄຸ້ມຄອງ ເພື່ອຮັບປະກັນດ້ານຄຸນທາດການເມືອງໃຫ້ມີຄວາມໜັກແໜ້ນ, ເພີ່ມຄວາມຮູ້ທາງດ້ານທິດສະດີມາກ-ເລນິນ, ແນວຄິດ ໄກສອນ ພົມວິຫານ, ແນວທາງນະໂຍບາຍຂອງພັກ-ລັດ ໃຫ້ເລິກເຊິ່ງສາມາດວາງແຜນການ, ຈັດຕັ້ງນໍາພາການປະຕິບັດແຜນການທີ່ແຕ່ລະໜ່ວຍງານວາງອອກໃຫ້ເປັນຮູບປະທໍາທັງມີປະສິດທິຜົນ ແລະປະສິດທິພາບສູງເພື່ອປະຕິບັດໃຫ້ໄດ້ຕາມແຜນພັດທະນາບຸກຄະລາກອນ ແລະແຜນກໍ່ສ້າງພະນັກງານສືບທອດປ່ຽນແທນຂອງບໍລິສັດເປັນແຕ່ລະໄລຍະ.

แชร์