ຫົວໜ້າ ຫສນຍ ເຄື່ອນໄຫວຕິດຕາມຊຸກຍູ້ວຽກງານຢູ່ແຂວງຈໍາປາສັກ

ທ່ານ ອາລຸນໄຊ ສູນນະລາດ ລັດຖະມົນຕີ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ພ້ອມດ້ວຍຄະນະໄດ້ເຄື່ອນໄຫວຕິດຕາມ, ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ຢູ່ແຂວງຈໍາປາສັກເມື່ອບໍ່ດົນມານີ້ໂດຍການຕ້ອນຮັບຂອງທ່ານ ໂສມ ບຸດຕະກຸນ ຮອງເຈົ້າແຂວງຈໍາປາສັກ, ມີການນຳຂອງແຂວງເຂົ້າຮ່ວມ.

ໃນໂອກາດນີ້, ທ່ານລັດຖະມົນຕີຫົວໜ້າຫ້ອງວ່າການສໍານັກງານນາຍົກລັດຖະມົນຕີໄດ້ແຈ້ງຈຸດປະສົງໃນການມາເຮັດວຽກຢູ່ແຂວງຈຳປາສັກໃຫ້ທ່ານຮອງເຈົ້າແຂວງ ພ້ອມຄະນະໄດ້ຮັບຊາບ ເປັນຕົ້ນ ເພື່ອຕິດຕາມ, ກວດກາ ແລະຊຸກຍູ້ວຽກງານຄຸ້ມຄອງບໍລິຫານລັດຕາມກົດໝາຍ, ນິຕິກຳຕ່າງໆ ຂອງລັດຖະບານ, ແຜນພັດທະນາເສດຖະກິດ-ສັງຄົມ; ການຈັດຕັ້ງປະຕິບັດແຜນດຳເນີນງານ ແລະການຊີ້ນຳຂອງທ່ານນາຍົກລັດຖະມົນຕີ ແລະບັນດາທ່ານຮອງນາຍົກລັດຖະມົນຕີ; ຊຸກຍູ້ ແລະ ແລກປ່ຽນບົດຮຽນການຍົກສູງຄຸນນະພາບວຽກງານເສນາທິການໃນໄລຍະໃໝ່ ໃຫ້ເດັດຂາດ, ໂປ່ງໃສ ແລະມີຫຼັກວິຊາການ (ເປັນມືອາຊີບ); ລົງຕິດຕາມຊຸກຍູ້ບາງສະຖານທີ່ຕົວຈິງ ພາຍໃນແຂວງຈໍານວນໜຶ່ງ.

ໃນໂອກາດດຽວກັນ, ທ່ານລັດຖະມົນຕີ, ຫົວໜ້າ ຫສນຍ ພ້ອມດ້ວຍຄະນະໄດ້ຮັບຟັງການລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງ 6 ເດືອນ ທ້າຍປີ 2022 ຂອງແຂວງຈໍາປາສັກ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍຍົກໃຫ້ເຫັນບາງຄາດໝາຍ ແຜນພັດທະນາເສດຖະກິດ-ສັງຄົມ ໂດຍສະເພາະແມ່ນການສົ່ງເສີມການຜະລິດ ເພື່ອທົດແທນການນໍາເຂົ້າ ແລະການຜະລິດເປັນສິນຄ້າສົ່ງອອກເພື່ອສ້າງຖານລາຍຮັບທີ່ເຂັ້ມແຂງ, ຍືນຍົງ, ໂຄງການສົ່ງເສີມການຕະຫຼາດ ແລະຈໍາໜ່າຍສິນຄ້າ, ໂຄງການຂະຫຍາຍຕາໜ່າງຕະຫຼາດ, ຮ້ານຄ້າທັນສະໄໝ, ເກັບຊື້ ແລະຈໍລະຈອນສິນຄ້າ, ການຊຸກຍູ້ສົ່ງເສີມໂຄງການພະລັງງານໄຟຟ້າທີ່ມີປະສິດທິຜົນ, ພັດທະນາໂຄງການຜະລິດພະລັງງານໄຟຟ້າ (ພະລັງງານນໍ້າ, ໄຟຟ້າພະລັງງານລົມ, ໄຟຟ້າແສງອາທິດ ແລະ ໄຟຟ້າຊີວະມວນ) ເພື່ອຕອບສະໜອງຄວາມຕ້ອງການພະລັງງານທີ່ເພີ່ມຂຶ້ນ ແລະເພື່ອທົດແທນການນຳເຂົ້າພະລັງງານຈາກປະເທດເພື່ອນບ້ານ.

ສໍາລັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດແຂວງໄດ້ຜັນຂະຫຍາຍເປັນແຜນການ, ແຜນງານ ໃນ 5 ວຽກຈຸດສຸມ ຄື: ສ້າງຄວາມຮັບຮູ້ໃນທົ່ວສັງຄົມໂດຍການສຶກສາອົບຮົມ, ໂຄສະນາເຜີຍແຜ່ກົດໝາຍ ແລະຜົນຮ້າຍຂອງຢາເສບຕິດ; ວຽກງານປັບປຸງການຈັດຕັ້ງ ແລະຍົກລະດັບຄວາມສາມາດໃນການເຄື່ອນໄຫວເຮັດໜ້າທີ່ການເມືອງຂອງອົງການສືບສວນ - ສອບສວນ ແລະພາກສ່ວນທີ່ກ່ຽວຂ້ອງ ຕໍ່ການແກ້ໄຂບັນຫາຢາເສບຕິດ; ປະສິດທິພາບທາງດ້ານການຄຸ້ມຄອງຊີ້ນໍາການຈັດຕັ້ງປະຕິບັດຮອບດ້ານໃນການແກ້ໄຂບັນຫາຢາເສບຕິດ; ວຽກງານປັບປຸງຂີດຄວາມສາມາດໃນການເຮັດໜ້າທີ່ຂອງລະບົບການເມືອງແຕ່ລະຂັ້ນ ເພື່ອນໍາພາ-ຊີ້ນໍາແກ້ໄຂບັນຫາຢາເສບຕິດທີ່ເກີດຂຶ້ນຢູ່ໃນຄວາມຮັບຜິດຊອບຂອງຕົນ ແລະວຽກງານອື່ນໆ.

ທ່ານ ອາລຸນໄຊ ສູນນະລາດ ໄດ້ສະເໜີຄະນະພັກ, ຄະນະນໍາອົງການປົກຄອງແຂວງພິຈາລະນາເປັນຕົ້ນການເພີ່ມທະວີວຽກງານການຕ່າງປະເທດ, ການຮັກສາຄວາມສະຫງົບ ແລະຄວາມເປັນລະບຽບຮຽບຮ້ອຍຕາມຊາຍແດນ; ເອົາໃຈໃສ່ການຊຸກຍູ້ສົ່ງເສີມການຈັດເກັບລາຍຮັບງົບປະມານແຫ່ງລັດໃຫ້ໄດ້ຕາມແຜນການທີ່ວາງໄວ້, ຄຸ້ມຄອງລາຍຈ່າຍມີການຕິດຕາມກວດກາຢ່າງເຂັ້ມງວດ, ຖືກຕ້ອງ, ສອດຄ່ອງກັບກົດໝາຍ, ລະບຽບການທີ່ກໍານົດອອກ; ເອົາໃຈໃສ່ດຶງດູດການລົງທຶນທັງພາຍໃນ ແລະຕ່າງປະເທດໃຫ້ນັບມື້ນັບເພີ່ມຂຶ້ນ, ເອົາໃຈໃສ່ຕິດຕາມກວດກາການຈັດຕັ້ງປະຕິບັດວຽກງານ 3 ສ້າງ ຢູ່ທ້ອງຖິ່ນຮາກຖານ ທີ່ເຫັນວ່າເຮັດບໍ່ທັນໄດ້ດີ ແລະ ສືບຕໍ່ເອົາໃຈໃສ່ຕິດຕາມ, ເຝົ້າລະວັງພະຍາດຕາມລະດູການ ແລະ ການແຜ່ລະບາດຂອງພະຍາດໂຄວິດ-19 ພາຍຫຼັງທີ່ມີການເປີດປະເທດ, ທັງນີ້ກໍເພື່ອເຮັດໃຫ້ການພັດທະນາເສດຖະກິດ-ສັງຄົມ ພາຍໃນແຂວງສືບຕໍ່ໄດ້ຮັບການຂະຫຍາຍຕົວຂຶ້ນໄປເລື້ອຍໆ.

ໃນໂອກາດເຄື່ອນໄຫວເຮັດວຽກຢູ່ແຂວງຈໍາປາສັກຄັ້ງນີ້ທ່ານລັດຖະມົນຕີຫົວໜ້າ ຫສນຍ ພ້ອມດ້ວຍຄະນະຍັງໄດ້ລົງຕິດຕາມສະພາບການຈັດຕັ້ງປະຕິບັດວຽກງານຕົວຈິງ ຢູ່ດ່ານສາກົນໜອງນົກຂຽນ, ດ່ານສາກົນວັງເຕົ່າ, ພົບປະກັບກອງຮ້ອຍປ້ອງກັນຊາຍແດນ 526 ແລະໂຄງການພັດທະນາມະຫານະທີສີທັນດອນຕື່ມອີກ.
ຂ່າວ-ພາບ: ຫສນຍ

แชร์