ທົບທວນການປະຕິບັດ ນະໂຍບາຍການພັດທະນາໄຟຟ້ານໍ້າຕົກ ແບບຍືນຍົງຂອງ ສປປ ລາວ

ກະຊວງພະລັງງານ ແລະບໍ່ແຮ່ ຈັດກອງປະຊຸມຄະນະກຳມະການການຊີ້ນໍາການຈັດຕັ້ງປະຕິບັດນະໂຍບາຍການພັດທະນາໄຟຟ້ານໍ້າຕົກແບບຍືນຍົງຂອງ ສປປ ລາວ ໃນວັນທີ 30 ສິງຫາ 2022 ທີ່ແຂວງຫລວງພະບາງເພື່ອປຶກສາຫາລື ແລະປະກອບຄຳເຫັນຖອດຖອນບົດຮຽນກ່ຽວກັບການຈັດຕັ້ງປະຕິບັດນະໂຍບາຍພັດທະນາໄຟຟ້ານໍ້າຕົກແບບຍືນຍົງໄລຍະຜ່ານມາຂອງກົມນະໂຍບາຍ ແລະແຜນພະລັງງານທີ່ຈະມອບໃຫ້ກົມທຸລະກິດພະລັງງານເປັນຜູ້ຈັດຕັ້ງປະຕິບັດຕາມພາລະບົດບາດໃໝ່.

ໂອກາດນີ້, ທ່ານ ນາງ ຈັນສະຫວາດ ບຸບຜາ ຮອງລັດຖະມົນຕີກະຊວງພະລັງງານ ແລະບໍ່ແຮ່ ໄດ້ກ່າວວ່າ: ການພັດທະນາໄຟຟ້ານໍ້າຕົກມີບົດບາດສໍາຄັນໃນການບັນລຸເປົ້າໝາຍໃນການຫລຸດຜ່ອນຄວາມທຸກຍາກ, ການພັດທະນາເສດຖະກິດ ແລະ ຕອບສະໜອງຄວາມຕ້ອງການພະລັງງານໄຟຟ້າຂອງພາກພື້ນ; ເພື່ອໃຫ້ບັນລຸຄວາມຍືນຍົງການພັດທະນາເສດ ຖະກິດ-ສັງຄົມ, ລັດຖະບານຈະພັດທະນາບັນດາທ່າແຮງທາງດ້ານໄຟຟ້ານໍ້າຕົກໃຫ້ເປັນສິນຄ້າສົ່ງອອກ ແລະຕອບສະໜອງຕາມຄວາມຕ້ອງການນຳໃຊ້ໄຟຟ້າພາຍໃນປະເທດ, ພັດທະນາເສດຖະກິດ-ສັງຄົມຂອງຊາດ, ປະກອບສ່ວນໃນການສ້າງຄວາມໝັ້ນຄົງຂອງປະເທດ ແລະການປັບປຸງເງື່ອນໄຂຊີວິດການເປັນຢູ່ຂອງປະຊາຊົນ, ລັດຖະບານ ຈະຮັບປະກັນວ່າຜົນກະທົບໃນທາງລົບຕໍ່ສິ່ງແວດລ້ອມ ແລະສັງຄົມ ທີ່ເກີດຈາກໂຄງການໄຟຟ້ານໍ້າຕົກຈະໄດ້ຮັບການເອົາໃຈໃສ່ຄວບຄຸມຊຶ່ງລວມມີມາດຕະການການຫຼີກລ້ຽງ, ການຫລຸດຜ່ອນ, ການຊົດເຊີຍ ແລະ ການປັບປຸງແມ່ນໄດ້ນຳມາຈັດຕັ້ງປະຕິບັດ ແລະຮັບປະກັນຕາມພັນທະທາງດ້ານສະພາບແວດລ້ອມ ແລະ ສັງຄົມ.

ກອງປະຊຸມໃນຄັ້ງນີ້, ໄດ້ຮັບຟັງບົດສະເໜີກ່ຽວກັບຄວາມເປັນມາ, ຜົນໄດ້ຮັບ, ຂໍ້ຄົງຄ້າງຂອງການຈັດຕັ້ງປະຕິບັດນະໂຍບາຍການພັດທະນາໄຟຟ້ານໍ້າຕົກແບບຍືນຍົງ ຂອງ ສປປ ລາວ ໃນໄລຍະເລີ່ມຕົ້ນ ຈົນຮອດປີ 2022, ລາຍງານກ່ຽວກັບໜ້າທີ່ ແລະຄວາມຮັບຜິດຊອບຂອງກົມທຸລະກິດພະລັງງານທີ່ໄດ້ສືບຕໍ່ຈັດຕັ້ງປະຕິບັດວຽກງານຄວາມຍືນຍົງຕາມກອບນະໂຍບາຍ, ພ້ອມທັງຂໍ້ຕົກລົງຄະນະກໍາມະການຊີ້ນໍາຊຸດໃໝ່ ແລະ າຍງານກ່ຽວກັບແຜນການຈັດຕັ້ງປະຕິບັດໃນຕໍ່ໜ້າຂອງກົມທຸລະກິດພະລັງງານ.
ຂ່າວ: ເພັດສາຄອນ

แชร์