ຂະແໜງທ່ອງທ່ຽວ ພະແນກ ຖວທ ສະຫວັນນະເຂດ ຈັດປະຊຸມຫາລື ຈັດກິດຈະກໍາສົ່ງເສີມການທ່ອງທ່ຽວ ປີ 2022-2023.

ເພື່ອເປັນການ ສົ່ງເສີມວຽກງານການທ່ອງທ່ຽວ ໃນທ້າຍປີ 2022 ແລະ ປີ 2023 ໃຫ້ມີບັນຍາກາດຟົດຟື້ນ ພາຍຫຼັງທີ່ມີການເປີດການຕ້ອນຮັບນັກທ່ອງທ່ຽວເຕັມຮູບແບບ, ດັ່ງນັ້ນ ໃນວັນທີ 30 ສິງຫາ 2022 ຂະແໜງທ່ອງທ່ຽວ ພະແນກ ຖະແຫຼງຂ່າວ ວັດທະນະທຳ ແລະທ່ອງທ່ຽວ ແຂວງສະຫວັນນະເຂດ ໄດ້ຈັດກອງປະຊຸມ ເພື່ອປຶກສາຫາລື ກ່ຽວກັບການຈັດກິດຈະກຳຕ່າງໆ ເພື່ອສົ່ງເສີມການທ່ອງທ່ຽວຂຶ້ນ ທີ່ຫ້ອງປະຊຸມພະແນກ ດັ່ງກ່າວ ໂດຍການເປັນປະທານ ຂອງທ່ານ ປອ ໂພໄຊ ສິດທິຊົນ ຮອງຫົວໜ້າພະແນກ ຖະແຫຼງຂ່າວ ວັດທະນະທໍາ ແລະທ່ອງທ່ຽວແຂວງ,ມີຫົວໜ້າຂະແໜງທ່ອງທ່ຽວ,ພະນັກງານວິຊາການ, ພາກສ່ວນທຸລະກິດ, ສະຫະພັນກິລາລົດຖີບ, ກິລາເຈັດສະກີ, ພາກສ່ວນນັກທຸລະກິດໜຸ່ມ ແລະພາກສ່ວນກ່ຽວຂ້ອງ ອື່ນໆເຂົ້າຮ່ວມ.

ໃນການກ່າວເປີດ ກອງປະຊຸມ ທ່ານ ປອ ໂພໄຊ ສິດທິຊົນ ຍົກໃຫ້ເຫັນວ່າ: ໃນໄລຍະຜ່ານມາ ວຽກງານການທ່ອງທ່ຽວ ຢູ່ແຂວງສະຫວັນນະເຂດ ກໍ່ຄືແຂວງ ອື່ນໆ ຖືກຢຸດສະງັກຊົ່ວຄາວ ເນື່ອງຈາກການແຜ່ລະບາດຂອງພະຍາດ ໂຄວິດ 19,ສະນັ້ນຫຼັງຈາກ ທີ່ມີການເປີດປະເທດ ພວກເຮົາກໍ່ຈະຕ້ອງມີການຊຸກຍູ້ ແລະສົ່ງເສີມການທ່ອງທ່ຽວໃຫ້ມີຄວາມຟົດຟື້ນຂຶ້ນ, ຊຶ່ງເນື້ອໃນຂອງການສົ່ງເສີມການທ່ອງທ່ຽວ ແບບລາວທ່ຽວລາວ ກໍ່ແມ່ນການຈັດກິດຈະກໍາຕ່າງໆ ໂດຍການມີສ່ວນຮ່ວມ ຂອງທຸກພາກສ່ວນ ພະແນກການ,ກົມກອງ ລວມທັງພາກລັດ ແລະເອກະຊົນ.

ຈາກນັ້ນ ທ່ານ ນາງພອນສຸກ ເພັດກົງຈັກ ຫົວໜ້າຂະແໜງທ່ອງທ່ຽວ ກໍ່ໄດ້ນໍາສະເໜີ ບັນດາກິດຈະກໍາຕ່າງໆ ທີ່ຈະໄດ້ຈັດຂຶ້ນ,ໃນນີ້ຈະມີກິດຈະກໍາຄາລາວານ ລົດຖີບ ສອງຝັ່ງຂອງ,ກິດຈະກໍາແຂ່ງຂັນເຮືອເຈັດສະກີ ຕາມລຳນໍ້າຂອງ,ນິທັດສະການ ອາຫານ 4 ແຜ່ນດິນ 4 ປະເທດ ແລະງານເທດສະການ ອາຫານລີງ ທີ່ບ້ານດົງເມືອງ ເມືອງຈໍາພອນ .

ໃນກອງປະຊຸມ ໄດ້ມີການປຶກສາຫາລື ເພື່ອຄວາມເປັນເອກະພາບກັນ ທາງດ້ານເນື້ອໃນ,ດ້ານເວລາ,ດ້ານສະຖານທີ່ ລວມທັງຮູບແບບແລະຂັ້ນຕອນອື່ນໆ.

 

แชร์