ຫວຽດນາມ ອະນຸມັດຜ່ານແຜນຍຸດທະສາດແຫ່ງຊາດ ກ່ຽວກັບການປ່ຽນແປງຂອງດິນຟ້າອາກາດ ຮອດປີ 2050

ໃນວັນທີ 29 ສິງຫາຜ່ານມາຢູ່ຮ່າໂນ້ຍ, ທ່ານ ຟ້າມມິງຈິງ ນາຍົກລັດຖະມົນຕີຫວຽດນາມ ໄດ້ຕ້ອນຮັບທ່ານ ອາລົກ ຊາມາ ລັດຖະມົນຕີປະຈໍາສໍານັກງານນາຍົກລັດຖະມົນຕີອັງກິດປະທານກອງປະຊຸມບັນດາຝ່າຍເຂົ້າຮ່ວມສົນທິສັນຍາແມ່ຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດຄັ້ງທີ 26 (COP26) ແລະຄະນະປະຕິບັດງານຂອງລາຊະອານາຈັກອັງກິດ ຢ້ຽມຢາມ ແລະເຮັດວຽກຢູ່ ຫວຽດນາມ.

ຂ່າວລະບຸວ່າ: ສອງຝ່າຍພ້ອມກັນຕີລາຄາການປ່ຽນແປງຂອງດິນຟ້າອາກາດທີ່ນັບມື້ນັບຍາກທີ່ຈະຄາດຄະເນລ່ວງໜ້າໄດ້ໃນຂອບເຂດທົ່ວໂລກ. ດັ່ງນັ້ນ, ຕ້ອງມີຈິດໃຈສາມັກຄີສາກົນ ແລະ ພ້ອມກັນຮ່ວມມືໃນທົ່ວໂລກ ເພື່ອຮັບມືກັບການປ່ຽນແປງຂອງດິນຟ້າອາກາດ. ດ້ວຍຈິດໃຈຜັນຂະຫຍາຍບັນດາຄຳໝັ້ນສັນຍາທີ່ COP26 ຢ່າງຂ້ຽວຂາດນັ້ນ, ຫວຽດນາມ ໄດ້ອະນຸມັດຜ່ານແຜນຍຸດທະສາດແຫ່ງຊາດກ່ຽວກັບການປ່ຽນແປງຂອງດິນຟ້າອາກາດຮອດປີ 2050. ຫວຽດນາມ ຖືເປົ້າໝາຍການປ່ອຍອາຍກາກບອນລົງລະດັບ “0”, ຫັນປ່ຽນພະລັງງານຟອດຊິວໄປສູ່ພະລັງງານສະອາດ ແລະ ພະລັງງານທົດແທນແມ່ນທ່າອ່ຽງພັດທະນາຂອງໂລກ ແລະ ຫວຽດນາມ. ທ່ານ ຟ້າມມິງຈິງ ສະເໜີໃຫ້ລັດຖະບານອັງກິດ ແລະ ບັນດາຄູ່ຮ່ວມມືພັດທະນາໃນວິວັດການເຈລະຈາສ້າງຕັ້ງການພົວພັນຄູ່ຮ່ວມມືຫັນປ່ຽນພະລັງງານຢ່າງຍຸຕິທຳໜູນຊ່ວຍຫວຽດນາມ ດ້ານເຕັກໂນໂລຊີ ແລະ ການເງິນ, ໄປພ້ອມກັບການພັດທະນາແຫຼ່ງຊັບພະຍາກອນມະນຸດ, ສ້າງລະບອບລະບຽບການໃຫ້ສົມບູນແບບ ແລະແບ່ງປັນບົດຮຽນ.

ທ່ານ ອາລົກ ຊາມາ ໃຫ້ຮູ້ວ່າ: ທ່ານຈະສົ່ງສານຂອງທ່ານນາຍົກລັດຖະມົນຕີຫວຽດນາມກ່ຽວກັບຄວາມສະເໝີພາບ, ຄວາມຍຸຕິທຳໃນການຮ່ວມມືຫັນປ່ຽນພະລັງງານ ແລະການຮັບມືກັບການປ່ຽນແປງຂອງດິນຟ້າອາກາດໃຫ້ບັນດາຄູ່ຮ່ວມມືພັດທະນາ.ທ່ານສະແດງຄວາມປາຖະໜາວ່າ: ຖະແຫຼງການດ້ານການເມືອງກ່ຽວກັບການສ້າງຕັ້ງການພົວພັນຄູ່ຮ່ວມມືຫັນປ່ຽນພະລັງງານດ້ວຍຄວາມຍຸຕິທຳຈະໄດ້ຮັບຮອງເອົາເນື່ອງໃນໂອກາດຈັດກອງປະຊຸມ COP 27 ຢູ່ອີຢິບໃນທ້າຍປີນີ້.

แชร์