ສະຫວັນນະເຂດປາຖະກະຖາວັນສ້າງຕັ້ງສະຫະພັນນັກຮົບເກົ່າ ຄົບຮອບ 20 ປີ

ໃນວັນທີ 29 ສິງຫາ 2022 ທີ່ສະຫະພັນນັກຮົບເກົ່າແຂວງສະຫວັນນະເຂດ ຈັດປາຖະກະຖາຫວນຄືນວັນສ້າງຕັ້ງສະຫະພັນນັກຮົບເກົ່າ ຄົບຮອບ 20 ປີ ( 9 ກັນຍາ 2002-9 ກັນຍາ 2022) ຢູ່ຫໍວັດທະນະທຳໄກສອນ ພົມວິຫານ ໂດຍການປາຖະກະຖາຂອງ ທ່ານ ພົນໂທ ແສງນວນ ໄຊຍະລາດ ປະທານສະຫະພັນນັກຮົຍເກົ່າແຫ່ງຊາດລາວ, ມີທ່ານ ຄຳແພງ ເພັດທຸມພອນ ປະທານແນວລາວສ້າງຊາດແຂວງ, ບັນດາການນຳພັກ-ລັດຂັ້ນແຂວງ, ຄະນະສະຫະພັນນັກຮົບເກົ່າແຂວງ, 14 ເມືອງ 1 ນະຄອນ ແລະ ພາກສ່ວນກ່ຽວຂ້ອງເຂົ້າຮ່ວມຮັບຟັງ.

ໂອກາດນີ້, ທ່ານ ພົນໂທ ແສງນວນ ໄຊຍະລາດ ກໍໄດ້ເລົ່າຄືນປະຫວັດ ແລະສະພາບແວດລ້ອມ, ຄວາມສໍາຄັນ ແລະຄວາມຈຳເປັນຂອງການສ້າງຕັ້ງສະຫະພັນນັກຮົບ ເກົ່າ, ທັດສະນະຂອງພັກປະຊາຊົນປະຕິວັດລາວຕໍ່ກັບສະຫະພັນນັກຮົບເກົ່າ, ມູນເຊື້ອ, ການເຕີບໃຫຍ່ຂະຫຍາຍຕົວ ແລະ ຜົນງານທີ່ພົ້ນເດັ່ນຂອງວັນດັ່ງກ່າວ ຕະຫລອດ 20 ປີຜ່ານມາ ໂດຍທ່ານໄດ້ກ່າວວ່າ: “ນັກຮົບ” ແມ່ນຜູ້ທີ່ມີຄວາມອົງອາດກ້າຫານ, ຊຳນິຊຳ ນານໃນການສູ້ຮົບ, ແມ່ນນັກຕໍ່ສູ້ປະຈັນບານໂດຍກົງຢູ່ສະໜາມຮົບ, ນັກຮົບຂອງກອງທັບປະຊາຊົນລາວ ແມ່ນຜູ້ທີ່ໄດ້ຝຶກອົບຮົມ, ເຊື່ອມຊຶມທາງດ້ານທິດສະດີການເມືອງ, ບຳລຸງ-ກໍ່ສ້າງທາງດ້ານວິຊາການທະຫານ, ສິນລະປະຍຸດ-ຍຸດທະວິທີ ແລະ ວິຊາສະເພາະອື່ນໆຢູ່ໃນກົມກອງ, ຈາກບັນດາໂຮງຮຽນຢູ່ພາຍໃນ ແລະຕ່າງປະເທດ, “ນັກຮົບເກົ່າລາວ” ໝາຍເຖິງອະດີດນັກຮົບປະຕິວັດ ໃນຖັນແຖວກຳລັງປະກອບອາວຸດຂອງປະຊາຊົນລາວ, ແມ່ນນາຍ ແລະພົນທະຫານ, ນາຍ ແລະພົນຕຳຫລວດ ທີ່ໄດ້ຮັບບຳນານ, ບຳເນັດ ຫລືເສຍອົງຄະຍ້ອນການສູ້ຮົບ, ຮັບໃຊ້ການສູ້ຮົບ, ການປະຕິບັດໜ້າທີ່ໃນພາລະກິດຕໍ່ສູ້ປົດປ່ອຍຊາດປົກປັກຮັກສາ ແລະສ້າງສາພັດທະນາປະເທດຊາດ.

ໂອກາດດຽວກັນ, ທ່ານ ໄກສອນ ອິນທິຈັກ ຮອງຫົວໜ້າຄະນະຈັດຕັ້ງແຂວງໄດ້ຜ່ານຂໍ້ຕົກລົງຂອງທ່ານເຈົ້າແຂວງວ່າດ້ວຍການແຕ່ງຕັ້ງທ່ານທ່ານ ພັອ ສຸລິວຽງ ຊ່ຽນສະຫວັນ ເປັນປະທານສະຫະພັນນັກຮົບເກົ່າແຂວງ ແລະມະຕິຕົກລົງຂອງຄະນະປະຈຳພັກແຂວງວ່າດ້ວຍບົ່ງຕົວແຕ່ງຕັ້ງສະຫາຍ ພັອ ສຸລິວຽງ ຊ່ຽນສະຫວັນ ເປັນເລຂາໜ່ວຍພັກຮາກຖານສະຫະພັນນັກຮົບເກົ່າແຂວງສະຫວັນນະເຂດ. ພ້ອມນີ້, ກໍໄດ້ມີການມອບໃບຍ້ອງຍໍໃຫ້ກົມກອງ ແລະ ບຸກຄົນທີ່ດີເດັ່ນທີ່ປະກອບສ່ວນໃນວຽກງານສະຫະພັນນັກຮົບເກົ່າ ຈຳນວນ 42 ກົມກອງ ແລະ 513 ທ່ານ ຢ່າງສົມກຽດ.

แชร์