ຈຳປາສັກ-ດົງຖັບ ລົງນາມບົດບັນທຶກການຮ່ວມມື ໄລຍະ 2022-2025

ໃນວັນທີ 27 ສິງຫາ ຜ່ານມາ, ຢູ່ແຂວງດົ່ງຖັບ ສສ ຫວຽດນາມ ໄດ້ມີກອງປະຊຸມພົບປະ ແລະລົງນາມບົດບັນທຶກຊ່ວຍຈຳການຮ່ວມມື ລະຫ່ວາງ ແຂວງຈຳປາສັກ ສປປ ລາວ ແລະ ແຂວງດົງຖັບ ທ່ານ ຫວຽດນາມ ໄລຍະປີ 2022-2025, ຝ່າຍແຂວງຈໍາປາສັກນຳໂດຍທ່ານ ວິໄລວົງ ບຸດດາຄຳ ກຳມະການສູນກາງພັກ, ເລຂາພັກແຂວງ, ເຈົ້າແຂວງຈໍາປາສັກ ແລະ ຝ່າຍແຂວງ ດົງຖັບ ນຳໂດຍ ທ່ານ ເລ ກວັກ ຟອງ ກຳມະການສູນກາງພັກຄອມມູນິດຫວຽດນາມ, ເລຂາພັກແຂວງ, ຫົວໜ້າຄະນະກໍາມະການສະພາແຫ່ງຊາດ ແຂວງດົງຖັບພ້ອມດ້ວຍຄະນະຜູ້ແທນຂອງສອງຝ່າຍເຂົ້າຮ່ວມ.

ການພົບປະຄັ້ງນີ້, ສອງຝ່າຍໄດ້ລາຍງານສະພາບເສດຖະກິດ-ສັງຄົມ ຂອງແຕ່ລະແຂວງ ແລະພ້ອມກັນຕີລາຄາໝາກຜົນການຮ່ວມມືລະຫວ່າງສອງຝ່າຍໃນສົກປີຜ່ານມາ ແລະ ເພື່ອສືບຕໍ່ຮັດແໜ້ນ ແລະເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ໂດຍສະເພາະແຂວງຈຳປາສັກ ແລະແຂວງດົ່ງຖັບ. ພ້ອມນີ້, ສອງຝ່າຍໄດ້ເຫັນດີເປັນເອກະພາບກັນສືບຕໍ່ ຜັນຂະຫຍາຍເນື້ອໃນການຮ່ວມມືໃນໄລຍະສົກປີຕໍ່ໜ້າເປັນຕົ້ນສືບຕໍ່ຮັກສາການຜັດປ່ຽນການຢ້ຽມຢາມແລກປ່ຽນຄະນະຜູ້ແທນແນໃສ່ການຢ້ຽມຢາມພົບປະ, ແລກປ່ຽນບົດຮຽນ, ເສີມຂະຫຍາຍຄວາມເຂົ້າໃຈເຊິ່ງກັນ ແລະກັນ, ເພີ່ມທະວີຄວາມສາມັກຄີ ແບບພິເສດ ແລະຊຸກຍູ້ການຮ່ວມມືໃນແຕ່ລະຂົງເຂດ; ສືບຕໍ່ຊຸກຍູ້ສົ່ງເສີມ ແລະສ້າງເງື່ອນໄຂອຳນວຍຄວາມສະດວກໃຫ້ແກ່ບັນດານັກທຸລະກິດຂອງສອງຝ່າຍ; ສອງຝ່າຍເປັນເອກະພາບກັນຄົ້ນຄ້ວາ, ສ້າງແຜນການຮ່ວມມືພັດທະນາບັນດາການລົງທຶນ, ການຄ້າການບໍລິການການທ່ອງທ່ຽວ, ກະສິກຳ, ໃນນັ້ນສຸມໃສ່ດ້ານເຕັກນິກກະສິກຳການປູກຝັງ, ລ້ຽງສັດ ແລະປູກດອກໄມ້ປະດັບ.

ສ່ວນການກໍ່ສ້າງຊັບພະຍາກອນມະນຸດແຂວງດົງຖັບເຫັນດີໃຫ້ການສະໜັບສະໜູນທຶນການສຶກສາຊັ້ນສູງ ຈຳນວນ 10 ທຶນ ໃຫ້ແຂວງຈໍາປາສັກ ແລະແຂວງຈຳປາສັກ ເຫັນດີສືບຕໍ່ມອບທຶນກໍ່ສ້າງພາສາລາວໃຫ້ແກ່ພະນັກງານ, ນັກສຶກສາຂອງແຂວງດົ່ງຖັບ ຈຳນວນ 02 ທຶນ/ປີ ຫລື ກໍ່ສ້າງພາສາລາວຂັ້ນປະລິນຍາຕີຢູ່ທີ່ມະຫາວິທະຍາໄລ ຈຳປາສັກ ຈຳນວນ 2 ທຶນ. ນອກນັ້ນກໍມີການຮ່ວມມືມິດຕະພາບ ແລະສະຫວັດດີການ ສັງຄົມ ແລະສືບຕໍ່ຍົກສູງປະສິດທິຜົນການເຄື່ອນໄຫວການທູດປະຊາຊົນໃນການຈັດຕັ້ງຄະນະເຄື່ອນໄຫວພົບປະແລກປ່ຽນ ມິດຕະພາບ, ການຮ່ວມມື.

ຈາກນັ້ນ, ສອງຝ່າຍກໍໄດ້ລົງນາມບົດບັນທຶກຊ່ວຍຈຳການຮ່ວມມືໂດຍການຮ່ວມລົງນາມລະຫວ່າງ ສະຫາຍ ວິໄລວົງ ບຸດດາຄຳ ເຈົ້າແຂວງຈໍາປາສັກ ແລະສະຫາຍ ຟ້າມ ທ໊ຽນ ເຫງ໋ຍ ປະທານຄະນະກໍາມະການປະຊາຊົນ ແຂວງດົງຖັບ ໂດຍມີການນໍາຂັ້ນສູງສອງຝ່າຍເຂົ້າຮ່ວມ.
ຂ່າວ: ທັດຊະນະ

แชร์