ສຳມະນາວິທະຍາສາດ “60 ປີ ສາຍພົວພັນການທູດ 45 ປີ ວັນເຊັນສົນທິສັນຍາມິດຕະພາບ ແລະການຮ່ວມມື ລາວ-ຫວຽດນາມ”

ສະພາທິດສະດີສູນກາງພັກໄດ້ຈັດກອງປະຊຸມສໍາມະນາວິທະຍາສາດ ຫົວຂໍ້ “60 ປີ ສາຍພົວພັນການທູດ, 45 ປີວັນເຊັນສົນທິສັນຍາມິດຕະພາບ ແລະການຮ່ວມມື ລາວ-ຫວຽດນາມ” ຂຶ້ນໃນວັນທີ 29 ສິງຫາ 2022 ທີ່ສະໂມສອນຄະນະໂຄສະນາອົບຮົມສູນກາງພັກ (ຄອສພ); ພາຍໃຕ້ການເປັນປະທານຂອງສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກຫົວໜ້າ ຄອສພ ປະທານສະພາທິດສະດີສູນກາງພັກ; ເຂົ້າຮ່ວມເປັນຄະນະປະທານມີທ່ານ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງສູນກາງພັກອະດີດຮອງນາຍົກລັດຖະມົນຕີທີ່ປຶກສາສະພາທິດສະດີສູນກາງພັກ, ທ່ານ ຫງວຽນ ບ໋າ ຮຸ່ງ ເອກອັກຄະລັດຖະທູດແຫ່ງ ສສ ຫວຽດນາມ ປະຈຳ ສປປ ລາວ; ມີພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມສຳມະນາດັ່ງກ່າວ, ດຳເນີນໄປດ້ວຍບັນຍາກາດອັນຟົດຟື້ນທີ່ທົ່ວພັກ-ລັດ ແລະທົ່ວປວງຊົນໃນທົ່ວປະເທດພວມຈັດຕັ້ງປີສະເຫຼີມສະຫຼອງສອງວັນປະຫວັດສາດສອງຊາດຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 45 ປີ ເພື່ອແນໃສ່ທົບທວນຄືນມູນເຊື້ອສາຍພົວພັນອັນເຂັ້ມຂຸ້ນໄປດ້ວຍໄມຕີຈິດມິດຕະພາບແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ, ຫວຽດນາມ-ລາວ ຊຶ່ງໃນໂອກາດທີ່ມີຄວາມໝາຍນີ້ ສະພາທິດສະດີສູນກາງພັກ ໄດ້ຈັດຕັ້ງກອງປະຊຸມສຳມະນາຂຶ້ນພາຍໃຕ້ຫົວດັ່ງກ່າວ ເພື່ອຕີລາຄາໝາກຜົນແຫ່ງການພົວພັນຮ່ວມມືໃນການຄົ້ນຄວ້າທິດສະດີ ແລະ ພຶດຕິກຳ ລະຫວ່າງສອງພັກ, ລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ.
ໃນກອງປະຊຸມ, ວິທະຍາກອນຈາກສະພາທິດສະດີສູນກາງພັກ ແລະ ພາກສ່ວນກ່ຽວຂ້ອງໄດ້ນຳສະເໜີບົດວິທະຍາສາດ 4 ບົດ ທີ່ມີເນື້ອໃນສ່ອງແສງໃຫ້ເຫັນເຖິງບົດຮຽນໃນການຮ່ວມມືທາງດ້ານທິດສະດີ ແລະ ພຶດຕິກຳ ຄື: ໜຶ່ງ, ການພົວພັນຮ່ວມມືໃນການຄົ້ນຄວ້າທິດສະດີ ແລະພຶດຕິກໍາລະຫວ່າງສອງພັກ ລາວ-ຫວຽດນາມ (ຜົນສໍາເລັດ ແລະ ບົດຮຽນຖອນໄດ້); ສອງ, 60 ປີແຫ່ງການພົວພັນການທູດ ລາວ-ຫວຽດນາມ (ຜົນສໍາເລັດ ແລະ ບົດຮຽນຖອນໄດ້); ສາມ, ການຮ່ວມມືໃນການກໍ່ສ້າງ-ບຳລຸງພະນັກງານ ລາວ-ຫວຽດນາມ; ສີ່, ຄຸນຄ່າທິດສະດີ ແລະ ພຶດຕິກໍາຂອງສົນທິສັນຍາມິດຕະພາບ ແລະ ການຮ່ວມມືຮອບດ້ານ ລາວ-ຫວຽດນາມ.ພ້ອມກັນນັ້ນ, ກໍມີບັນດາຄຳເຫັນປິ່ນອ້ອມກອງປະຊຸມ,ຄຳເຫັນແລກປ່ຽນຈາກຄະນະຜູ້ແທນເຂົ້າຮ່ວມກອງປະຊຸມຈາກພາກສ່ວນຕ່າງໆ ຊຶ່ງສ່ອງແສງໃຫ້ເຫັນເຖິງເນື້ອໃນສຳຄັນ ແລະ ບົດຮຽນໃນການພົວພັນຮ່ວມມືຮອບດ້ານ ເວົ້າລວມ, ເວົ້າສະເພາະ ການຮ່ວມມືໃນການຄົ້ນຄວ້າດ້ານທິດສະດີ ແລະ ພຶດຕິກຳ ຂອງສອງພັກ-ສອງລັດ ໃນໄລຍະຜ່ານມາ.

ທ່ານ ຄໍາພັນ ເຜີຍຍະວົງ ໄດ້ຕີລາຄາສູງກອງປະຊຸມດັ່ງກ່າວໂດຍຍົກໃຫ້ເຫັນສະພາບການຂອງໂລກ ແລະພາກພື້ນຍັງສືບຕໍ່ຜັນແປຢ່າງສັບສົນ, ມີທັງຂໍ້ສະດວກ ແລະ ຂໍ້ຫຍຸ້ງຍາກສະຫຼັບສັບຊ້ອນ, ສອງຊາດລາວ-ຫວຽດນາມ ເຫັນຄວນຕ້ອງໄດ້ພ້ອມກັນເສີມຂະຫຍາຍສາຍພົວພັນໄມຕີຈິດມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານໃຫ້ກ້າວຂຶ້ນສູ່ລະດັບສູງອັນໃໝ່ ຄື: ໜຶ່ງ, ເພີ່ມທະວີແລກປ່ຽນບົດຮຽນທາງດ້ານທິດສະດີ ແລະ ພຶດຕິກໍາ ເພື່ອສະໜອງຂໍ້ມູນໃຫ້ແກ່ການກຳນົດແນວທາງ, ວິໄສທັດຍຸດທະສາດໃນການພັດທະນາປະເທດຊາດ; ເພີ່ມທະວີຄວາມຜູກພັນ, ຄວາມໄວ້ເນື້ອເຊື່ອໃຈ ແລະ ປະສານສົມທົບກັນຢ່າງແໜ້ນແຟ້ນເປັນປະຈຳໃນບັນດາບັນຫາທີ່ມີລັກສະນະຍຸດທະສາດລະຫວ່າງສອງພັກ, ສອງລັດ. ສອງ, ປັບປຸງກົນໄກການຮ່ວມມືທາງດ້ານການເມືອງ-ການທູດໃຫ້ນັບມື້ເຂົ້າສູ່ລວງເລິກ; ແກ້ໄຂສິ່ງທີ່ອຸດຕັນການຮ່ວມມືທາງດ້ານເສດຖະກິດລະຫວ່າງ ສອງປະເທດ, ສ້າງເງື່ອນໄຂອຳນວຍຄວາມສະດວກໃນການແລກປ່ຽນສິນຄ້າລະຫວ່າງສອງປະເທດ; ປະສານສົມທົບຊ່ວຍເຫຼືອຊຶ່ງກັນ ແລະ ກັນ. ສາມ, ສືບຕໍ່ຮ່ວມມືດ້ານການກໍ່ສ້າງ ແລະ ບຳລຸງພະນັກ ງານ, ກໍ່ສ້າງຊັບພະຍາກອນມະນຸດໃນຫຼາຍດ້ານ, ບຳລຸງສ້າງລະດັບທິດສະດີການເມືອງ, ລະດັບວິຊາການສະເພາະດ້ານໃຫ້ມີຄວາມອຸດົມສົມບູນ; ເອົາໃຈໃສ່ສ້າງຊັບພະຍາກອນມະນຸດທີ່ມີຄຸນນະພາບສູງເພື່ອປະກອບສ່ວນຮັບໃຊ້ພາລະກິດປົກປັກຮັກສາ ແລະພັດທະນາປະເທດຊາດ.
(ຂ່າວ: ຫ້ອງການສະພາທິດສະດີສູນກາງພັກ, ພາບ: ສຸກສະຫວັນ)

แชร์